Read Karang Gun mbete 3 Za̧h 1 Bible Online

Gun mbete 3 Za̧h 1 - Karang bible

Gun mbete 3 Za̧h 1

¹Gayus, a bi ŋgernzuk mi vah mu ke law sana a ketina ké mi sa mu keni.

²Gun sana, mi ƴo goŋ Ŋgerzah tul ɓayri ɓoɗ ɓoɗ gbam ɓay tul wo, ké hi̧ fe laɓna ké mu mbi ɓay laɓu ɓá ti̧h suk, ké hi̧ kuna ɓá ku mun wo ɓa suki kandɔk kuna ké ku law wo na ɓa suki.

³Mi ƴo goŋ ni kaŋ ɓayu ké mun bi rih mi keɗ keɗ. Yi̧n wahri ɓil Ŋgermbay gi lu lakna ɓay ketina wo. Sina wo ké ɓil ketina si ke lakna ɓay ra gaŋ.

⁴Láh ɓay a ɓoru ké rih law bi kal tul lakna ɓayay ta-a. Láh ɓay siŋ sina a ketina gun biri mí rih mi rih.

⁵Gun sana, láɓ law mbew ɓa fe laɓna wo. Mu ƴo mgba in ziŋ yi̧n wahri ɓil Ŋgermbay wara le, yi̧n a a̧yri ké mu tu niri ya kara mu mgba in ziŋ niri pi.

⁶Ku gi lu lakna ɓay law sana wo ké nun sa̧w in Ŋgermbay ké gel-mbu̧h hani woyri. Le su-su ɓay mú so gbɔrɔ yi̧nri-aw, mú pih niri ma pol mah ke riŋ ɗina Ŋgerzah ɓayu kú-u ti̧h ke riŋ ɗina ye. Ku ya̧ sona ké ndɔk sa̧wnzuk a ɓoruri ya.

⁸A wah dale mbɔl na tul wah ɓay so ndɔk yi̧n a kandɔkawri ɓay hi̧ a wah kara nah ti̧h ɓa bɔh pihna ɓil ketina ziŋ niri.

⁹Mi vbeh mbete a hani pih si ma ta̧w sa̧w in Ŋgermbay ké gel-mbu̧h hani woyri, mí Diyotereɓ nah mbete ra kpak el saŋ na. Ke ko mun ye ɓa mbay tul woyri.

¹⁰Sa̧w ɓayu mí ka̧hna bi le, mi túŋ ndɔk tul fe laɓna yeri. Ke ƴo mbi riŋ wah ɓah keni ɓay a pipiri-uri va̧h. Fe laɓna-aw kara mah ni ya, mí ke saŋ yi̧n wahri gun nzak pihnari dara mí ke gboh nzuk-kan law tul Ŋgermbay a ɓoruri yá̧ niri, mí ke el ni̧h nzuk-kan lawri-aw ku̧ kala gel-mbu̧h hani woiri.

¹¹Gun sana, mú ndɔl fe laɓna a suya-aw ya. Mú laɓ suki ma. Nzuk ké hi̧ tul ye ɓay laɓ suki le, sa̧w ye ɓa Ŋgerzah. Nzuk ké hi̧ tul ye ɓay laɓ suya le, ke tu Ŋgerzah bɔk mbew ya.

¹²Demtere ba, yi̧nri gbam lu lakna ɓay ye lu. Mun ketina kara lu lakna ɓay ye pi. A wah kara nah lu lakna ɓay ye pi. Mu tu ɓahri se, lakna ɓay ké nah lu-aw ɓa ketina.

¹³Ɓay a ɓoruri ɓa ŋgi̧-u mí-i ƴo keni ɓay vbeh ku̧ mbete-ay, wara le vbéh ɓayuri ke bik le, mi sa-a.

¹⁴Mi taw ɓay ko mu aŋay ɓa gah-u, náh lu mberem nzak ke nzak.

¹⁵Mi vbar mu ke ɗeŋ. Ya̧h wahri ké gini vah mu. Mú vah ya̧h wahri ké sa̧. Mú vah niri mbew mbew gbam hi̧ na.