Read Karang Mbete Zuɗ 1 Bible Online

Mbete Zuɗ 1 - Karang bible

Mbete Zuɗ 1

¹A bi Zuɗ mi ɓa yi̧n Zak, mi ɓa mgbal Ŋgermbay Zezu. Mi vbeh mbete-ay hi̧ wuri a woiri nzukri ké riŋ baah Ŋgerzah ke riŋ Ŋgermbay Zezu kan tul woiri. I ɓa gun sana Ŋgerzah, mí Ŋgermbay ƴo kɔr wuri ɓa nzuku a ye.

²Law in ke ɗeŋ ke law sana ɓá seh ma pol pol hi̧ wuri.

³Gun sanari, mi ta mun bi ɗik ƴo vbeh ɓay ti̧hna wahri ɓil salɓay hul hi̧ wuri le, tul bi zaŋ lɔɗ ɓay mí vbeh mbete-ay hi̧ wuri ɓay hew wuri hi̧ ɓo í ruh ŋgermu ɓay kɔr ketina kanlaw wah tul Ŋgermbay. Ŋgerzah ku̧ ɓay kanlawaw ra bɔk mbew ké ndɔk wah sa̧wnzuk ye.

⁴Ɓayu ké nzuk a haniri lɔm mun woyri rih sakra sa̧w nzuk Ŋgerzahri. Sam nzuk-saŋ Ŋgerzahri-aw ra, lewsa̧ ku vbeh ɓay salɓay hul ké ɓay mgba tul woyri. A woyri-aw ku sɔɓ lawsuki Ŋgerzah ɓa fe-laɓ ɗaka haymun si keni wɔrɔk dara mí ku el ma̧y riŋ Nzuk sa̧w fe ké ɓa Gaŋ wah Ŋgermbay Zezu.

⁵Mi mbi tul bi ɓay dum law woiri tul ɓayri ké i tu ɓa teh-u pol sa̧ ra. Bol fal ké Gaŋ tul feri riw ten gun Izarayelri ke ɓil mgbal ké Eziɓte bale, ŋgi̧na woyri sa kan law tul ye ya, mí ke el poŋ niri hi̧ ku zi.

⁶Ɓay a ɓoru ké i tu mí na-ay : tem nzak pihna Ŋgerzahri a woyri kú-u sa ƴo gel-lak mbay woyri ya kú-u poŋ gel ƴona woyri, Gaŋ tul feri riw ŋga̧h niri ku̧ ɓil tirim wu̧m geŋ nam-kuŋ salɓay a luki.

⁷Ra ɓáy nzukri ké Sɔdɔm ke Gɔmɔr ke nzuk puh a ɓeluri[1] kara salɓay ké kuŋ ku̧ tul woyri ke hɔrɔ ké ri-rimna ya ra el na ɓa fe sɔkna hi̧ na aŋay pi. A woyri-aw ku na ke haniri va̧h el poŋ sa̧w yá̧ hani wu̧y ke wo̧ro.

⁸Kandɔkaw mí nzukri ké lɔm mun woyri rih sakra woiri-aw ra lɔlɔ woyri mí ku dih falu. Ku rɔɓlɔ mun ke kɔk kerɓay lɔlɔ woyri-aw, ku sɔɓ fal hi̧ Gaŋ woyri, ku ɓeɓ riŋ nzuk riŋ ɗinari ké tusiɓa ke nunmbam.

⁹Ŋgertem nzak pihna Ŋgerzah a ye Misel ba, sew ké Moyiz hu, Misel ra ƴo fah ɓay ke mbay záh tukala si tul hul Moyiz, mí ke kuŋ salɓay ku̧ tul záh tukala ra dan farna. Le ke ɓahri : « Gaŋ tul feri riw ɓá zɔm mu. »

¹⁰Nzukri ké rih sakra woiri-aw fe kú-u tu ya, ku ƴo ɓeɓ riŋu, mí fe tuna woyri eŋ kerɓay nay ɓa fe tuna ké si ke fe laɓna haymun. Fe kú-u tu ra ƴo si ziŋ niri ma ɓeɓna.

¹¹Kúy, koseh ɓa nzuku a nzukri-aw ɓay fe le, ku mbi siŋ sina Kayin[2]. Ku ndoh mun woyri ƴɔɗ ɓil ɗaka lari, mí ku reh ful keni kandɔk Balam[3]. Ku zi kandɔk a ye Kɔre[4] ɓay kpúh tul woyri.

¹²A woyri-aw mí ku ɓa ndaw ké gel fe su̧na law in ɓil Ŋgermbay, ku ƴo mbu̧h ziŋ wuri ƴah lakna ɓay su̧ ɓil woyri dan hȩkme. Ku ɓa ɗikmambam ké kuna fa̧h kal keni yeŋ. Ku ɓa kpuh ké hɔrɔ zo. Ku hu hul bɔk seɗe, ku le-lehna ya, ku lih ke sa̧wu wɔkɔkɔ.

¹³Ku eŋ mahmbih ké su gbuksu gbuksu sam kufuru ku̧ nzak kɔh. Kaŋ pi mí ku sam lɔrɔ fe laɓna su̧hru woyri ku̧ pol woyri. Ku ɓa gunwu̧y nunmbamri ké ƴo ha̧rma poŋ gel ƴona woyri, mí tirima ké na nduŋ wu̧m lek lewsa̧ kaŋ ɓay tul gunwu̧y nunmbamri-aw[5].

¹⁴Ɓay nzukri ké rih sakra woiri ra, a ye Hanok zih a toŋndɔk sayu ké dih fal Adam ɓah ɓay tul woyri pol sa̧. Ŋgerzah ndoh ɓay ɓil law ye hi̧ ni ɓahri : « Í ko Gaŋ tul feri riw ƴo gina ke sa̧w nzuk yeri. Tul woyri kal fe ki̧na sɔɗ sɔɗ boh gel sɔɗ sɔɗ boh (1.000.000) ka-kal mí el ka-kal ra ɓáy.

¹⁵Ke gi ɓay kuŋ salɓay tul nzukri gbam. Ke gi ɓay ten sa̧w fe laɓna nzuk suyari gbam ɓay fe laɓna-saŋ Ŋgerzah woyri-aw gbam kú-u saŋ ni keni. Ke gi ɓay tuŋ nzuk-saŋ Ŋgerzahri-aw ɓay kɔk ɓayri gbam kú-u dir ku̧ tul ye. » Ɓa ɓay ké Hanok ɓah munu.

¹⁶Nzukri-aw ɓa nzuk-su̧h ɓayri. Ku ƴo vuh mun woyri ɓay fe ké ziŋ niri, siŋ sina woyri mbi mahful ɗaka haymun woyri. Nzak woyri ɓah ɓay fe a lukiri hi̧ nzukri ko kona yi̧m ma tul woyri ɓay ziŋ keni fe.

¹⁷Mí a woiri gun sanari ba, í ker wuri ɓay si tul ɓayri ké gun nzak pihnari ɓah hi̧ na ra a woyri ké Gaŋ wah Ŋgermbay Zezu pih niri.

¹⁸Ku ɓah hi̧ na ɓahri, sew a ɔh tɔru-ay, nzukri ké ƴo sak ɓay Ŋgerzah ɓay ƴo ri. Siŋ sina woyri mbi mahful law-saŋ Ŋgerzah ké laɓ niri.

¹⁹Nzukri-aw ƴo gi ke kéhr hani, ku ɓa nzuk tukalari, ku ta ke Tem Ŋgerzah ya.

²⁰A woiri gun sanari ba, i ƴo hu̧h ɓil kanlaw woiri ké te-teh, Tempuki ké kaɓ ɓil law woiri mí i ƴo ɓah ɓay keni ziŋ Ŋgerzah,

²¹í mgba mun woiri ɓil law sana Ŋgerzah geŋ keni law in Gaŋ wah Ŋgermbay Zezu ɓay ɔkna ké na ɓa ŋgɔh.

²²Nzuk a a̧yri ké law woyri te-tehre le, í laɓ law in ziŋ niri.

²³Nzuk a a̧yri ké hɔrɔ yih ɓay se niri, í nah niri yiw ten niri. Nzuk a a̧yri ké fe tukala ƴo law woyri, í laɓ law in ziŋ niri, í hȩk tul woiri, í ko[6] gar woyri ké fe tukala rɔɓlɔ ɓa fe ȩm.

²⁴A ye ké ŋgerna ye mah kɔr bɔk woiri ƴo ɓa kpuh-u hi̧ i ƴo pol ye ɓa teh-u ké ɓil riŋ ɗina ye ke mun rihna,

²⁵a ye Ŋgerzah mbew yaŋ mí ɓa nzuk riŋ ɗina a luki, ŋgerna mbay, huhrumun ke lák mbay, a ye nzuk-ya̧ na tumbɔl Gaŋ wah Ŋgermbay Zezu sew a lewsa̧, sew a aŋay, sewri gbam ɓa ŋgɔh kpatara. Gelu munu.