Read Karang Mbete Ten sa̧wɓay 1 Bible Online

Mbete Ten sa̧wɓay 1 - Karang bible

Mbete Ten sa̧wɓay 1

¹Mbete-ay ƴo ten sa̧wɓay Ŋgermbay Zezu. Ŋgerzah hi̧ Ŋgermbay ten sa̧w fe a mu̧h-uri ké zah le, ɓay laɓu hi̧ gun yeri ko. Ku ɓa gun-laɓ pihna yeri. Fe-uri ɓay kalu gaŋ. Ke pih tem nzak pihna ye si sɔk fe saŋri-aw hi̧ Za̧h, gun-laɓ pihna ye, ke ko ké ɓil lɔlɔ.

²Za̧h te-teh Ɓay Ŋgerzah ké Ŋgermbay Zezu ten, ke ɓah ɓay feri gbam ké-e ko.

³Nzukri ké ƴo ki̧ ɓayay ké mi ya̧ ké ta̧w Ŋgermbay, nzukri ké ƴo lah ɓayu mí si keni siŋ sina le, pol tehna ƴo ziŋ niri ɓayu ké sew ké fe-uri ɓay ka̧h ra ɗih mba-ay.

⁴A bi Za̧h, mi vbeh mbete-ay hi̧ sa̧w in Ŋgermbay ké puhri toŋndɔk say ké tusiɓa Azi. A ye, ke ƴo ri lewsa̧, ke ƴo ri aŋay, ke ƴo gina pi, Tem ye kehr ɓa toŋndɔk say mí ƴo pol arŋgaw mbay, Ŋgermbay Zezu, a ye nzuk-ten tehɓay, ke ƴo tul ɓay a ketina, ke ɓa gun pol ké ti̧h ɗekrekrek ké sakra hulri, ke ɓa Mbay tul mbayri ké tusiɓa, sa̧w lawsuki ke ɗeŋ ur ké ta̧w woyri sayaw na ɓay woiri. A ye, ke sa na, ke lu salɓay hul ké tul wah ke sem ye, ke hi̧ na, nah ti̧h ɓa puh lakna ye, ke hi̧ na, nah ɓa nzuk kani bah ye Ŋgerzah, riŋ ɗina ke ŋgerna ɓa nzuku a ye sew ke sew. Gelu munu.

⁷Í ko ! Ke ƴo gina ɓil ɗikmambam[1], mí nzukri gbam ɓay ko ni, nzukri ké tuŋ gari ye ɓay ko ni pi[2]. Dale sa̧wnzuk tukalari gbam ɓay vba̧ mun woyri zaɗ zaɗ vuh keni rew ɓay tul ye. Ketina, gelu munu.

⁸« A bi, mi ɓa sa̧w fe, mi ɓa tul fe[3]. » Kaŋ mí Ŋgerzah, Gaŋ tul feri riw, Nzuk huhrumun a luki ɓah. A ye ké-e ƴo ri aŋay, ke ƴo ri lewsa̧, ke ƴo gina.

⁹Fe ké kal mí na-ay : A bi Za̧h, yi̧n woiri ɓil Zezu ké mi ɓa bɔh gun puh lakna Ŋgermbay ziŋ wuri, mi ko seh kandɔk a woiri, mi ɓer gi̧w kandɔk a woiri pi, mí ku mgba mi gi ɓu tusiɓa Paɗmos ké mahmbih ɗoŋ ri, ɓayu ké mi ƴo tul Ɓay Ŋgerzah ké Zezu ten.

¹⁰Nam a hani mbew ɓa nam Gaŋ tul feri riw, Tem ye mgba tem bi si gel ƴona ye. Mi lah kusol mgbe ké fal bi kandɔk tiri baw ti̧w ɓahri : « Fe ké mu ƴo ko-u, mú vbeh ɓayu ku̧ ɓil mbete. Mú pih si hi̧ sa̧w in Ŋgermbay ké puhri toŋndɔk sayay : Efeze, Simir, Pergama, Tiyatir, Sarde, Filadelfi, Lawdisi. »

¹²Mí-i sɔɓ nun bi ɓay ko nzuk ké ɓah ɓay ziŋ mi ra le, mi ko lampe lari lɔr toŋndɔk say[4].

¹³Ké haŋsekle lamperi-aw, nzuk ƴo ri. Ke eŋ gun nzuk pirmatul[5]. Mah gar nzuku peh ka̧h diŋ bɔk ye ɓa gar nzuk kani. Sal lari lɔr a ah-u kpeɓre ŋga̧h haŋ ye.

¹⁴Pirmatul ye fu kuɓ kuɓ pu kal puna hum ka-kal. Nun ye su nda̧w nda̧w kandɔk hɔrɔ.

¹⁵Bɔk ye ndu̧y kandɔk lari ké ƴo si̧h ɓil hɔrɔ vul tiw kaŋ. Kusol ye mgbe kandɔk tiri mbih ké nzɔk gbɔh gbɔh.

¹⁶Ke mgba gunwu̧y nunmbam toŋndɔk say ké ndɔk lakna ye. Mahwu̧y ké oh fál seɗe mba̧h mba̧h ti̧h ke haw ye. Nzakpol ye ke nun ye gbam ba, su nzar nzar kandɔk seh kaŋ.

¹⁷Mi ko ni kaŋ bale, mi lih gbirik ké pol bɔk ye kandɔk hul, mí ke ɓaŋ ndɔk lakna ye kan tul bi ɓahri : « Mú laɓ hȩkme ya. A bi Mi ƴo ri, mi ti fe, mi ɔh fe[6].

¹⁸Mi ɓa Ŋgɔhnzuk. Mi hu da. Mú ko, mi el ƴo ke ɔkna ɓa ŋgɔh. Lakele puh hulri na ndɔk bi, mi ŋger mba hul.

¹⁹Kaŋ dale mú vbeh fe ké mu ko, feri ké ƴo laɓu ke feri ké ɓay laɓu ké fal pi.

²⁰Sa̧wɓay gunwu̧y nunmbam toŋndɔk say ké ndɔk lakna bi ke lampe toŋndɔk say ra mí na-ay : Gunwu̧y nunmbam toŋndɔk say ɓa tem nzak pihnari ké ƴo fal sa̧w in Ŋgermbay ké puhri toŋndɔk say. Lamperi ba, ɓa sa̧w in Ŋgermbay ké puhri toŋndɔk say pi. »