Read Karang Mbete Ten sa̧wɓay 10 Bible Online

Mbete Ten sa̧wɓay 10 - Karang bible

Mbete Ten sa̧wɓay 10

¹Mí-i el ko ŋgertem nzak pihna a ɓoru ɗer ké nunmbam. Ɗikmambam kahra ni ɓa gar. Ŋgaburmandi vbeh ɗoŋ tul ye gbuk, nun ye su kandɔk seh. Bɔk ye eŋ hani ke hɔrɔ.

²Ke mgba gun mbete a mgburu ké ndɔk ye. Bɔk ye a lakna nda mahmbih. A kperu ba, nda tusiɓa.

³Mí ke vba̧ nzak ɓa mgbe-u kandɔk pomna mbaki. Ké-e vba̧ nzakaw le, pomna mbam toŋndɔk say mí yih nzak ye.

⁴Ku ɓah ɓay bale, mi lek mun bi ɓay vbeh ɓay woyri, mí-i lah kusol ur ké nunmbam ɓah ɓay hi̧ mi ɓahri : « Mú kɔr ɓay pomna mbamri ké toŋndɔk sayaw ma law wo. Mú vbeh ɓayu ya. »

⁵Mí tem nzak pihna ké mi ko ni nda tul mahmbih ke tusiɓa ra ɔr ndɔk lakna ye ma nunmbam.

⁶Ke hah fe ku̧ tul ye ke riŋ Ŋgɔhnzuk, a ye ké laɓ nunmbam ke feri ké ɓilu, tusiɓa ke feri ké ɓilu, mahmbih ke feri ké ɓilu, gbam. Ke hah fe ɓahri : « Geŋ nam a ɓoru ta mba.

⁷Sew ké tem nzak pihna a toŋndɔk sayu ɓay ul baw ti̧w ye le, suki Ŋgerzah ké na law ye ɓay laɓ ɔh kandɔk ké Tempuki ɓaŋ ɓayu ndoh nzak mgbal yeri ra. »

⁸Mí kusol ké ur ke nunmbam ra ɓah ɓay a ɓoru hi̧ mi ɓáy ɓahri : « Mú si ya̧ gun mbete a mgburu ké na ndɔk tem nzak pihna ké nda mahmbih ke tusiɓa ra. »

⁹Mi si ta̧w tem nzak pihna ra. Mi goŋ ni, ké hi̧ mi mbete ra. Ke ɓah hi̧ mi ɓahri : « Mú ya̧. Mú su̧, ɓay se ɓil wo se, mí ké nzak wo ba, ɓay rih mgbeleleh kandɔk zuhru ké mu lak. »

¹⁰Mi ya̧ gun mbete ké ndɔk tem nzak pihna ra. Mi su̧ gbam, mí rih nzak bi kandɔk zuhru, ɓil bi se mi se gaŋ ba.

¹¹Ku ɓah hi̧ mi ɓahri : « Mú ka-kah ɓayu ɓay daɓa sa̧wnzuk Izarayelri, sa̧wnzuk a ɓoruri, nzak ɓay ɓahnari ke mbayri pi. »