Read Karang Mbete Ten sa̧wɓay 11 Bible Online

Mbete Ten sa̧wɓay 11 - Karang bible

Mbete Ten sa̧wɓay 11

¹Mí ku hi̧ mi ka̧wkpuh-leh fe. Ku sɔk mi ɓahri, mí ur síɓa, mí leh gel ƴona Ŋgerzah ké ɓil vul kani ye ke gel kani ye pi. Mí ki̧ sa̧w nzuk yeri ké ƴo dim ni ké ri.

²Mí ɓil ila a fál kala vul kani Ŋgerzah le, mí poŋ ma fal. Mí leh ya ɓayu ké gelu ku poŋ hi̧ sa̧wnzuk a ɓoruri, ku ndákla puh a luki ké law Ŋgerzah te tulu mah few bon niŋ falu seɗe[21].

³Mi el lah kusol ɓahri se : « Mi píh nzuk-teh ɓay biri seɗe. Ku ɓáh ɓay ké mi ɓaŋ kan nzak woyri ɓil namri-aw, nam sɔɗ sɔɗ boh falu seɗe ke bon tɔtɔklɔ (1.260). Gar ndohna woyri ɓa sal kú-u kaŋ kandɔk gar seh gun nzak pihna a lewsa̧ri[22]. »

⁴Nzuk-teh ɓayri ké seɗe ra, ku ɓa kpuh olivehri seɗe, ku ɓa lamperi seɗe ké mgbe hɔrɔ ke num kpuh oliveh ké ƴo pol Ŋgermbay tusiɓa[23].

⁵Gelke nzukbaa yih ɓeɓ niri le, hɔrɔ ti̧h ké haw woyri i niri. Kaŋ mí nzuk yih ɓeɓ niri le, nzuku ziŋ hul keni.

⁶Nam-sɔk ɓay woyri-aw, ku ƴo ke ŋgerna-gboh mbam ɓá to ya[24]. Ŋgerna woyri mah sɔɓ mbih ɓa sem, mah vba̧ tukala ke fe saŋri ɓoɗ ɓoɗ kandɔk kú-u yih[25].

⁷Kú ɔh pihna-te-teh ɓayaw dara mí fe mgbam a hani ɓay ti̧h ké ɓil lɔkɔ a ɗih-u sa̧rara ra ɓay ruh ŋgermu ziŋ niri. Ke mbá niri, ke í niri.

⁸Mí hul woyri ɓay ku̧ mahful mgboŋ puh a luki-aw, gel kú-u ɓar Ŋgermbay woyri ké ri. Ku ɗi sam puh-aw ke riŋ Sɔdɔm ya le, ke riŋ Eziɓte.

⁹Nzukri ké sakra sa̧wnzuk Izarayelri, sa̧wkaniri, nzak ɓay ɓahnari, sa̧wnzuk a ɓoruri ɓoɗ ɓoɗ gbam ɓay ko hul woyri-aw mah nam say ke ndi̧. Ku hi̧ ful hi̧ nzuk ɓá gɔr hulri-aw ya.

¹⁰Nzuk tukalari laɓ mun rihna ɗik ɗik ɓay hul woyri-aw, ku laɓ yi̧hna, ku hi̧ fe hi̧ haniri ɓay fe le, gun nzak pihnari ké seɗe-aw laɓ nzuk tukalari koseh mbamba.

¹¹Fal nam say ke ndi̧-aw mí ɔkna Tem Ŋgerzah gi rih mun woyri. Ku ur ƴo tul bɔk woyri ke nun bale, hȩkme a bawu se nzukri gbam ké ko niri.

¹²Ku lah kusol ɗi fe ɓa mgbe-u ké nunmbam ɓahri : « Í hil wuri ma gini. » Bale ku hil ke ɗikmambam si nunmbam. Nzukbaa woyri ƴo ko-u.

¹³Ke sa̧wseh-u-aw, tusiɓa laŋ yik yik. Ké haŋsekle vulri boh boh ké puh a luki-aw le, vul mbew mbew dir wuruk wuruk. Nzukri sɔɗ sɔɗ boh gel toŋndɔk say (7.000) ziŋ ɓeɓna. Tɔr nzukri ké toŋ ba, hȩkme se niri, mí ku pir riŋ Ŋgerzah, nzuk nunmbam ke nzak woyri.

¹⁴Koseh a seɗe-u kal da, mí zah le, koseh a sayu ƴo gina ɓáy.

¹⁵Tem nzak pihna a toŋndɔk sayu ul baw ti̧w ye gbururu gbururu bale, kusolri mgbe gbaw ké nunmbam ɓahri : « Lák mbay Gaŋ wah ke Ŋgermbay ye ké tul feri gbam ti̧h da. Ke lák mbay ɓa ŋgɔh kpatara. »

¹⁶Mí ŋgernzukri ké bon seɗe falu niŋ kú-u kaɓ tul arŋgaw woyri ké pol Ŋgerzah ra guɓ ke nzaklaw pol ye.

¹⁷Ku mbu̧h nzak pir Ŋgerzah ɓahri : « Nah el ke tumbɔl hi̧ mu Ŋgerzah, Gaŋ tul feri riw, Nzuk huhrumun a luki, a wo ké mu ƴo ri lewsa̧, ké mu ƴo ri aŋay, mu ten ŋgerna wo a luki, mí mu el lek lák mbay wo wara.

¹⁸Law sa̧wnzuk a ɓoruri fa̧h niri tuh tuh keni ké tul wo, mí law fa̧hna wo ur da. Sa̧wseh kúŋ salɓay tul hulri[26] ka̧h da. Sa̧wseh wál kpaŋndɔk hi̧ gun nzak pihna wori, a woyri mgbal wori ka̧h da. Sa̧wseh-wal kpaŋndɔk hi̧ sa̧wnzuk wo, ku hȩk riŋ wo, gunri ke ŋgereri ka̧h da. Sa̧wseh-ɓeɓ nzukri ké ɓeɓ tusiɓa ka̧h da. »

¹⁹Wara mí mahful gel ƴona Ŋgerzah ké ɓil vul kani ye ké nunmbam mgbur ŋgah hi̧ nzukri ɓá ko sanduku ké sem[27] gun sami mi̧h ku̧ tulu. Semu ɓa sem-ŋga̧h sal in ziŋ nzuk yeri. Mbam sak yela yela, mbam nduh gbururu gbururu, mbam pom kpa̧y kpa̧y, tusiɓa laŋ yik yik, sa̧ri a baw bawuri ga̧y ɓɔrɔtɔ ɓɔrɔtɔ.