Read Karang Mbete Ten sa̧wɓay 12 Bible Online

Mbete Ten sa̧wɓay 12 - Karang bible

Mbete Ten sa̧wɓay 12

¹Fe saŋ a luki ti̧h ké nunmbam. Wu̧ynzuk ti̧h. Seh pɔr ni ɓa gar, few na huh bɔk ye, gunwu̧y nunmbamri boh falu seɗe kahra tul ye ɓa guɓatul.

²Ke ƴo ke ɓil. Mí nam-kaɓ peŋe, ke vuh rew ɓay gun ké ƴo se ni.

³Mí fe saŋ a ɓoru ti̧h ké nunmbam ra ɓáy. Baw fe mgbam a ŋgeru ɓa si̧h-u mba̧w mba̧w ti̧h. Riŋu ɓa dragoŋ. Tul ye ɓa toŋndɔk say, ti̧w ye ɓa boh. Tul mbew le, guɓatul mbay ɗoŋri ɗoŋri.

⁴Ke ƴo ke baw sa̧w. Haŋsekle gunwu̧y nunmbamri say say le, sa̧w ye mbi gunwu̧y nunmbam mbew mbew vbu tusiɓa. Mí ke ƴo pol wu̧y ké kaɓ peŋe ra. Ke geŋ gun ɓá ti̧h le, ké mgba tu̧h yɔlɔk.

⁵Ke mbuŋ gun ɓa gun wo̧ronzuk ké ɓay lak mbay tul sa̧wnzukri gbam kandɔk nzuk-hɔl sami. Ke háh niri ke ka̧w lari mbay ye[28]. Mí ku to gun ra nzem tɔr keni ma ta̧w Ŋgerzah kaɓ ma arŋgaw mbay ye.

⁶Wu̧y ba, ɗuk ma lawkɔr, gel ké Ŋgerzah lek ɓay kú hɔl ni ké ri nam sɔɗ sɔɗ boh falu seɗe ke bon tɔtɔklɔ (1.260)[29].

⁷Mí ŋgermu ur ké nunmbam. Misel, ŋgertem nzak pihna Ŋgerzah[30] ke tem nzak pihna yeri, ku ruh ŋgermu ke dragoŋ ra. A ye ke tem nzak pihna yeri ba, ku ruh ŋgermu ke Misel.

⁸Ŋgerna dragoŋ mah ya dale, gel ƴona woyri ké nunmbam ra ta mba.

⁹Mí ku vbu baw dragoŋ ra ma kala. A ye mí ke ɓa soy a lewsa̧ ké ƴo rɔk nzuk tukalari gbam. Ku ɗi ni ke nzak ebere ɓa satan (sɔk ɓahri, nzukbaa), nzak gerek ba, diyabolo (sɔk ɓahri, nzuk-sek nzukri). Ku vbuk niri kavbaw ké tusiɓa, a ye ke tem nzak pihna yeri gbam[31].

¹⁰Bale mi lah kusol mgbe ɓeleŋ ké nunmbam ɓahri : « Sa̧wseh ké Ŋgerzah lek ɓay ya̧ nzukri ké ndɔk záh ra ka̧h da. Lák mbay Ŋgerzah ke huhrumun ye ke ŋgerna Ŋgermbay ye, sa̧wseh-u ka̧h da, ɓay fe le, nzuk-sek yi̧n wahri ké pol Ŋgerzah, a ye ké-e ƴo sek niri suŋ ke seh gbam, ku vbu ni ké nunmbam ma kala wu̧m.

¹¹Mí yi̧n wahri sa̧wnzuk Ŋgermbayri ké tusiɓa mba tul ye ɓay tumbɔl sem gun sami, ku mba tul ye ɓay tehɓay sal in Ŋgermbay kú-u ɓah. Ku ker ɓay ɔkna woyri ya, hul ziŋ niri kara, ɓá i niri mgbum.

¹²Dale nunmbam mú laɓ mun rihna a woiri gun hɔndal Ŋgerzahri, í laɓ mun rihna. Kúy ! Kúy ! Koseh ɓa nzuku a tukala ke mahmbih ké ɗih sa̧rara ra, ɓay fe le, mbay záh tukala ɗer ma ta̧w woiri. Law ye nzek ni ndɔɓ ndɔɓ. Ke tu-tu, nam ye toŋ ndi̧ kaŋto wara. »

¹³Dragoŋ tu ɓahri, ku vbu ni ké tusiɓa bale, ke dih fal wu̧y ké mbuŋ gun wo̧ronzuk ra.

¹⁴Mí ku hi̧ wu̧y ra ta̧y seɗe eŋ ta̧y baw ŋgíŋ kaŋ hi̧ ke zo keni ké ta̧w soy ra ɓa ɗih-u si ɓil lawkɔr ma gel ké Ŋgerzah lek ɓay tul ye. Ke hɔl ni ké ri mah sew say ke ndi̧[32].

¹⁵Bale soy sam mbih ké ɓil ye kandɔk hawna mbih kaŋ, uh fal wu̧y ra ɓay ɓá kal ni.

¹⁶Mí tusiɓa so wu̧y ra. Tusiɓa te ɓekeke nzo mbih ké dragoŋ sam ra gbam.

¹⁷Law dragoŋ fa̧h ni tuh tuh tul wu̧y ra. Bale ke el si ruh ŋgermu ke tɔr mi̧hri yeri[33], a woyri kú-u ƴo hȩk bolkusol Ŋgerzah, kú-u ƴo te-teh ɓay sal in Zezu.

¹⁸Mí dragoŋ gi ƴo tul sikɔkre ɓel mahmbih a ɗih-u ra dale,