Read Karang Mbete Ten sa̧wɓay 13 Bible Online

Mbete Ten sa̧wɓay 13 - Karang bible

Mbete Ten sa̧wɓay 13

¹mi ko fe mgbam ti̧h ke ɓil mahmbih ra. Ke ƴo ke ti̧w ɓa boh, tul ba, ɓa toŋndɔk say. Ti̧w mbew mbew le, fe gama mbay ɗoŋri ɗoŋri. Tul mbew mbew le, fe vbehna-ɓeɓ riŋ Ŋgerzah na ri, na ri.

²Fe mgbam ké mi ko, mun ye ba hani ke mun wa̧hra. Fu̧hrundɔk ye sa ɓa fe se hȩkme, haw ye ba hani ke haw mbaki. Dragoŋ mbi ni ɓa ŋgermbay tukala, mí ke hi̧ ni arŋgaw-lak mbay, ke el hi̧ ni lak mbay ke huhrumun a luki.

³Tul fe mgbam mbew ké sakra tul yeri-aw le, korono̧k na solu eŋ sol kú-u vbeh i-i. Nzuk tukalari gbam ko ni ɓa fe saŋ, mí ku dih fal fe mgbam ra.

⁴Ku dim dragoŋ ɓayu ké-e hi̧ fe mgbam ŋgerna. Ku mbi siŋ ɗi dim keni fe mgbam ɓahri : « Fe mgbam, mu ɓa nzuk riŋ wo, nzuk a ɓoru ké na ko ko, ta-a. A ge mí mah ruh ŋgermu ziŋ mu le ? »

⁵Fe mgbam ziŋ ful ɓéɓ riŋ Ŋgerzah. Ke ziŋ ful láɓ fe ke ŋgerna ye-aw mah few bon niŋ falu seɗe.

⁶Ke ah haw mbi riŋ Ŋgerzah, ke ɓeɓ riŋ ye, ke far gel ƴona ye ke gun hɔndal yeri ké nunmbam[34].

⁷Ke ziŋ ful-haw ŋgermu tul sa̧w nzuk Ŋgerzahri. Ke ziŋ ful-lak mbay tul sa̧wkaniri, nzak ɓay ɓahnari, sa̧wnzuk Izarayel ke sa̧wnzuk a ɓoruri, gbam.

⁸Nzuk tukalari gbam dim ni a woyri nzukri ké riŋ woyri ta ɓil mbete ɔkna gun sami ya, gun sami kú-u vbeh ɓa fe puhna ke titilu da̧y ra.

⁹Nzuk ké ƴo ke suk-lah ɓay le, ké lah ɓayay :

¹⁰Nzuk ké vul mgbal lek ɓay tul ye le, ku mbíh ni gaŋ. Nzuk ké hul mahwu̧y lek ɓay tul ye le, ku í ni gaŋ. Sa̧wu mí su-su ɓay gun Ŋgerzahri, í su̧h law, í kan law tul Ŋgerzah ma.

¹¹Mi ko fe mgbam a seɗe-u ti̧h ke tusiɓa. Ke eŋ gun sami mí ƴo ke ti̧w seɗe. Kusol ye eŋ kusol dragoŋ.

¹²Ke ziŋ ŋgerna mbay ké ta̧w fe mgbam a titilu ra, mí ke laɓ feri gbam ke riŋ mbay ye ra. Ke hi̧ tukala ke nzuk tukalari gbam dim fe mgbam a titilu, a ye ké nɔk sol ye nze ra.

¹³Fe mgbam a seɗe-u ra laɓ fe saŋ a bawu bawuri ké nun nzukri gbam ko. Ke hi̧ hɔrɔ ké nunmbam kara ɗer gi nzuh gel ké tusiɓa pi[35].

¹⁴Ke rɔk nzuk tukalari ke fe saŋri. Ke laɓ fe saŋri-aw ke riŋ fe mgbam a titilu ké mahwu̧y vbeh sol ye, mí ke el kaɓ ke nun ra. Ke hi̧ nzukri mboh fe tem záh eŋ fe mgbam a titilu ra dim ni keni pi.

¹⁵Fe mgbam a seɗe-u ra ziŋ ful ul ɔkna ku̧ ɓil fe tem záh kú-u mboh ra hi̧ fe-u ɓah ɓay. Fe tem záh kú-u mboh ra hi̧ ku i nzuk a a̧yri ké sa dim ni ye ya.

¹⁶Fe mgbam a seɗe-u hah nzuk tukalari hi̧ ku vbeh zezele fe mgbam a titilu kan ndɔk lakna ya le, nzakpol woyri : ŋgereri ke gunri, nzuk fe ziŋnari ke ko̧hkori, mgbalri ke nzuk a garuri.

¹⁷Nzuk ta ƴah lari ya, ta yeh fe ya pi, sa ɓa nzuk a a̧yri-ay ké ƴo ke zezele riŋ fe mgbam ra mini suy fe ki̧na riŋ ye mí ɓay ziŋ ful-ƴah lari, ɓay ziŋ ful-yeh fe.

¹⁸Ru̧na mí na-ay : Nzuk ké ƴo ke kerɓay le, ké ten sa̧w suy fe ki̧na fe mgbamay. Suy fe ki̧na-aw ɓa suy fe ki̧na nzuk pirmatul. Suy fe ki̧na-u ɓa sɔɗ sɔɗ tɔtɔklɔ ke bon tɔtɔklɔ falu tɔtɔklɔ (666)[36].