Read Karang Mbete Ten sa̧wɓay 14 Bible Online

Mbete Ten sa̧wɓay 14 - Karang bible

Mbete Ten sa̧wɓay 14

¹Mi ko gun sami ba, ti̧h nun bi ke nzuk yeri. Ku ƴo tul kasaw Siyoŋ[37]. Tul nzuk yeri laɓ sɔɗ sɔɗ boh gel sɔɗ ke bon niŋ falu niŋ (144.000). Riŋ gun sami ke riŋ bah ye mbɔk na nzakpol woyri.

²Mi lah tiri fe ur ke nunmbam mgbe kandɔk mgbena mbih ké nzɔk gbɔh gbɔh, kandɔk tiri mbam ké pom kpa̧y kpa̧y. Tiri fe ké mi lah ra loŋ kandɔk daɓa nzaŋa sal ké nzukri haŋ kaŋ.

³Ku ƴo ɗi siŋ ɓa a foyu ké pol arŋgaw mbay, ké pol sam fe ɔknari ké niŋ, ké pol ŋgernzukri ké bon seɗe falu niŋ[38]. Nzuk a ɓoruri ke fe a ɓoruri mah tu siŋu ya, sa ɓa nzukri ké sɔɗ sɔɗ boh gel sɔɗ ke bon niŋ falu niŋ ké mbɔl nazi hul puh ké tul woyri mí ya̧ niri ɓil fe laɓna tukala mí mah tu siŋu.

⁴A woyri-aw, ku kɔr mun woyri, ku na ke wu̧yri ya[39]. Ku mbi mun woyri ƴo dih fal gun sami si gelri gbam ké-e maŋ niri si ri. A woyri-aw, mbɔl nazi hul woyri puh da mí ya̧ niri ké sakra nzuk tukalari. Ku ɓa tul fe puhna hi̧ Ŋgerzah ke gun sami.

⁵Kuŋɓay ti̧h ké nzak woyri ya, ɓay kara ta tul woyri ya.

⁶Mi ko tem nzak pihna mbew ƴo ha̧rma síɓa kandɔk gundoy ké haŋsekle nunmbam ke tusiɓa. Ke ƴo ka-kah ɓaysuki ké na ɓa ŋgɔh hi̧ sa̧w gun Izarayelri, sa̧wnzuk a ɓoruri, sa̧wkaniri, nzak ɓay ɓahnari, nzuk tusiɓari gbam.

⁷Ke ɓah ɓay ɓa mgbe-u ɓeleŋ ɓahri : « Í hȩk wuri Ŋgerzah, í dim riŋ ɗina ye ɓay fe le, sa̧wseh-kuŋ salɓay ye a luki ka̧h da. Í dim wuri nzuk ké laɓ nunmbam ke tusiɓa ke mahmbih a luki ke gun mbihri pi. »

⁸Tem nzak pihna a seɗe-u dih fal a titilu ra, ke ɓahri : « Ke di-dir ! Ke di-dir ! Babiloŋ puh a luki, vul ye dir wuruk wuruk gbam. A ye ké law ye se-se, ke hi̧ sa̧wnzuk a ɓoruri nzo yim tamgba̧y[40] ye. »

⁹Tem nzak pihna a sayu dih fal a seɗe-uri ra, ke ɓah ɓay ɓa mgbe-u ɓahri : « A ge ge ké dim fe mgbam ke fe tem záh ye ké nzukri mboh hi̧ ni, kú-u ya̧ zezele fe ye kan nzakpol mini ndɔk woyri le, law Ŋgerzah se-se. Ŋgerzah fer yim ye ku̧ ɓil ŋgoro, ke hí̧ nzukuri nzo yimu ɓa haŋ fa̧hna ye. Yimu yi̧-yi̧ŋ, zukru ke mbih ya[41]. Mí ku kó seh ɓil hɔrɔ, ɓil som kasaw-lu hɔrɔ ké pol tem nzak pihna Ŋgerzahri, ké pol gun sami.

¹¹Suh hɔrɔ koseh woyri ɗuh tururu tururu kpatara ɓa ŋgɔh. Kaŋ mí nzukri ké dim fe mgbam ke fe tem záh ye ké nzukri mboh, kú-u ya̧ zezele riŋ ye ra, ɔ́k mun ta ta̧w woyri ya, suŋ ke seh. »

¹²Sa̧wu mí su-su ɓay gun Ŋgerzahri, í ɓer wuri gi̧w kpatara, a woiri ké i hȩk bolkusol Ŋgerzah hȩk, ké i kan law sa tul Zezu.

¹³Mí mi lah kusol ur ké nunmbam ɓah ɓay hi̧ mi ɓahri, mí vbeh ɓayay : « Aŋay le, nzukri ké hu ɓay tul riŋ Gaŋ tul feri riw ra, pol tehna ƴo ziŋ niri. » Tempuki yih nzak ye ɓahri : « Gelu munu. Ta̧hma koseh woyri ɓay lu-u, ɓayu ké suki woyri ta zi ya. »

¹⁴Mi ko gel bale, mi ko ɗikmambam a puki. Nzuk ké eŋ Gun nzuk pirmatul mí kaɓ tulu. Guɓatul lari lɔr na tul ye. Ke mgba ŋgaseŋna a oh-u ké ndɔk ye.

¹⁵Tem nzak pihna a ɓoru ti̧h ké gel ƴona Ŋgerzah. Ke vba̧ nzak ɓeleŋ hi̧ nzuk-kaɓ tul ɗikmambam ra ɓahri : « Í pih ke ŋgaseŋna woiri ɓá si seŋ fe pay ɓay fe le, few-seŋ fe pay ra ka̧h da. Fe pay ké tusiɓa ŋger mah seŋna da. »

¹⁶Mí nzuk-kaɓ tul ɗikmambam ra ndar ŋgaseŋna ye kal tul tusiɓa bale, tusiɓa gbam seŋ gaŋ ba.

¹⁷Tem nzak pihna a ɓoru ti̧h ke gel ƴona Ŋgerzah ké nunmbam. A ye, ke mgba wu̧y a oh-u.

¹⁸Tem nzak pihna a ɓoru ɓáy ti̧h ke gel kani Ŋgerzah. A ye, ke ɓa mbay tul hɔrɔ gel kani. Ke ɓah ɓay ɓa mgbe-u hi̧ tem nzak pihna a mgba wu̧y ra ɓahri : « Mú pih ke wu̧y wo ɓá si vbeh lehna kpuh viyȩh ké tusiɓa. Lehna-u si̧h mah vbehna. »

¹⁹Tem nzak pihna ndar wu̧y ye kal tul tusiɓa vbeh keni lehna kpuh viyȩh ra ku̧ ɓil baw gel-ha̧h mbih-u nzuku a law sena Ŋgerzah.

²⁰Ku ndakla[42] lehna kpuh-u ha̧h mbih-u ké kala Zurusalem, puh a luki[43]. Mbih-u uh ɓa sem mí fɔh ya̧ gel mah ka̧h nzak ɗeŋe. Pehna-u laɓ bon niŋ, ahna-u ba, laɓ bon niŋ. Gbam laɓ sɔɗ sɔɗ boh falu tɔtɔklɔ (1.600)[44].