Read Karang Mbete Ten sa̧wɓay 15 Bible Online

Mbete Ten sa̧wɓay 15 - Karang bible

Mbete Ten sa̧wɓay 15

¹Mí mi ko baw fe saŋ a ɓoru ké na nzukri yer ké nunmbam. Tem nzak pihnari toŋndɔk say, ku ƴo ke fe vba̧na toŋndɔk say. Fe vba̧na-uri ɓa saru ɓay fe le, law sena Ŋgerzah gba ké ri.

²Mi ko mahmbih ké teh yerere, hɔrɔ mí mgbe ɓilu. Mi ko nzukri ké poŋ fe mgbam hi̧ lak mbay tul woyri ya, ku dim fe tem záh ye ya, ku ya̧ suy fe ki̧na riŋ ye ya. Ku ƴo tul mahmbih ra, ku mgba nzaŋa Ŋgerzah ké ndɔk woyri gbiri gbiri.

³Ku mbi siŋ gun sami ké Moyiz, gun-laɓ pihna Ŋgerzah a lewsa̧ ten, ku ɗi kandɔkay : Ŋgerzah, Gaŋ tul feri riw, fe laɓna wo ndɔh mbamba, fe laɓna wo ɓa fe saŋ. Ŋgerzah, Nzuk huhrumun a luki, fe laɓna wo si ke gelu gelu ɓa ketina. Ŋgerzah, Mbay tul sa̧wnzukri, a ge gaŋ mí ɓay hȩk mu ya le wo ? A ge gaŋ mí ɓay saŋ dim riŋ Gaŋ tul feri riw le wo ? Nzuk lawpuki, deɓ wo ta-a, sa̧wnzukri gbam ɓay gi pol wo, ku dím mu. Ɓay fe le ketina wo ten mun ƴo gel a teh-u.

⁵Falu mi el ko gel ƴona Ŋgerzah ké nunmbam mgbur, gel-kan sanduku-ku̧ fe vbehna-ŋga̧h sal in[45] ti̧h nun bi.

⁶Mí tem nzak pihna ké toŋndɔk say kú-u ƴo ke fe vba̧na toŋndɔk say ra ti̧h ké gel ƴona Ŋgerzah. Ku ndoh gar a puki kpa̧h kpa̧h ké ndu̧y ver ver. Sal lari lɔr ba, ŋga̧h haŋ woyri.

⁷Nzuk mbew ké sakra sam fe ɔknari niŋ ra hi̧ tem nzak pihnari toŋndɔk sayaw ŋgoro lari lɔr toŋndɔk say ké law sena Ŋgerzah Ŋgɔhnzuk mbah ri, a ye, ke ƴo ri sew ke sew.

⁸Bale suh hɔrɔ ya̧ gel ƴona Ŋgerzah ku̧ri ku̧ri. Sa̧w suh-u ur ke riŋ ɗina Ŋgerzah, ur ke huhrumun ye. Nzuk ta rih ri ya[46] kpu̧ru mah ké fe vba̧na tem nzak pihnari ké toŋndɔk sayaw ɓá kal ɔh.