Read Karang Mbete Ten sa̧wɓay 16 Bible Online

Mbete Ten sa̧wɓay 16 - Karang bible

Mbete Ten sa̧wɓay 16

¹Mí mi lah kusol mgbe ké gel ƴona Ŋgerzah ɓah ɓay hi̧ tem nzak pihnari ké toŋndɔk sayaw ra ɓahri : « Í si fer wuri yim ké na ɓil ŋgoro ké toŋndɔk sayaw ku̧ tusiɓa. Yimu ɓa law sena Ŋgerzah hi̧ nzukri ɓá nzo. »

²Tem nzak pihna a titilu si fer yim ké na ɓil ŋgoro ye bale, no̧k da̧y ké se mbamba laɓ nzukri ké ya̧ zezele fe mgbam, kú-u dim fe tem záh ye.

³Tem nzak pihna a seɗe-u si fer yim ké na ɓil ŋgoro ye ku̧ mahmbih bale, mbih sɔɓ ndiŋ kandɔk sem mun hul. Feri gbam ké ƴo ke ɔkna ɓil mahmbih ra ziŋ hul.

⁴Tem nzak pihna a sayu si fer yim ké na ɓil ŋgoro ye ku̧ mbih a uh-uri ke lawri bale, mbih-uri sɔɓ ɓa sem.

⁵Mi lah tem nzak pihna ké ɓa mbay tul mbihri ɓah ɓay ɓahri : « A wo ké mu ƴo ri lewsa̧, mu ƴo ri aŋay, nzuk lawpuki, mu ɓa nzuk a ketina. Kúŋ salɓay wo-ay ƴo gelu ɓay fe le, nzuk tukalari fer sem gun wori ke sem gun nzak pihna wori, mí mu hi̧ niri ku nzo sem mah ke fe laɓna woyri. »

⁷Bale mi lah kusol ur ké gel kani Ŋgerzah ɓahri : « Gelu munu. Ŋgerzah, Gaŋ tul feri riw, Nzuk huhrumun a luki, kúŋ salɓay wo si ke gelu gelu ɓa ketina. »

⁸Tem nzak pihna a niŋu si fer yim ké na ɓil ŋgoro ye ku̧ nunseh, mí seh zaŋ ɓa hɔrɔ tɔk nzukri.

⁹Hɔrɔ seh ra tɔk nzukri se-se, mí ku fah Ŋgerzah a ye mbay tul fe vba̧nari-aw. Ku kaɓ ke kerɓay woyri, ku sa dim riŋ Ŋgerzah ya gak.

¹⁰Tem nzak pihna a ndiɓi-u si fer yim ké na ɓil ŋgoro ye ku̧ bohro mbay fe mgbam bale, puh lakna ye gbam sih nduŋ ɓa tirim. Nzukri su̧ rim woyri no̧k no̧k ɓay koseh ké ziŋ niri.

¹¹Ku fah Ŋgerzah nzuk nunmbam ɓay koseh woyri ke ɓay no̧k da̧y ké laɓ niri, mí ku sa mbi law woyri ké tul sa̧w fe laɓna woyri ma fal ya.

¹²Tem nzak pihna a tɔtɔklɔ-u si fer yim ké na ɓil ŋgoro ye ku̧ mahmbih Efaraɗ. Mbih-u u̧h, gel ho̧k, poŋ ful kalna mbayri a fál tí̧h seh.

¹³Mi ko záh a suya-uri say ba hani ke gȩh, ƴo ti̧h ké haw dragoŋ[47] ke haw fe mgbam a titilu ke haw fe mgbam a seɗe-u, a ye ké-e laɓ mun ye ɓa gun nzak pihna Ŋgerzah mí ɓa gun nzak pihna fe mgbam a titilu.

¹⁴A woyri-aw, ku ɓa záh tukalari. Ku ƴo fal fe saŋri ké ƴo rɔk nzukri keni. Ku si ta̧w mbay tukalari gbam mí mbu̧h niri geŋ nam ŋgermu a luki ké Ŋgerzah Nzuk huhrumun a luki lek.

¹⁵Gaŋ tul feri riw ɓahri : « Í ko, mi tí̧h tul woiri kandɔk nzuk riɓa, mí pol tehna ɓa nzuku a woiri ké i ƴo tul bɔk woiri, ké i ru̧ ke sa̧w gar[48] woiri rɔkɔ í si mun ndikpo le, ku ko su̧hru woiri. »

¹⁶Záhri ra mbu̧h mbayri ké gel a hani kú-u ɗi ke nzak ebere ɓa Kasaw Megedo.

¹⁷Tem nzak pihna a toŋndɔk sayu si fer yim ké na ɓil ŋgoro ye ku̧ tukala gel-lak mbay mbay záh tukala[49] bale, kusol a mgbe-u ur ke gel ƴona Ŋgerzah ké arŋgaw ye ɓahri : « Laɓ ɔh da[50]. »

¹⁸Bale mbam sak yela yela, mbam nduh gbururu gbururu, mbam pom kpa̧y kpa̧y, tusiɓa laŋ yik yik ke ŋgerna. Sam laŋna tusiɓa-aw, nzuk pirmatul ko bɔk mbew ya ɓáy.

¹⁹Puh a luki kú-u ɗi ke riŋ Babiloŋ, sak gel say. Puh sa̧wnzukri gbam, vuluri dir wuruk wuruk. Ŋgerzah sor baw Babiloŋ mbɔl. Law ye se ni mgbuk mgbuk, ke hi̧ Babiloŋ nzo yim haŋ fa̧hna ye a ŋgeru.

²⁰Tusiɓari ké ƴo haŋsekle mahmbih zi. Kasawri kara, zi̧rma pi.

²¹Sa̧ri a hu̧h-uri ga̧y ɓɔrɔtɔ ɓɔrɔtɔ ké nunmbam vbuk nzukri. Yihna sa̧ri mbew mah hani ke yihna gbaŋ tɔlɔ hum mbew, mí nzukri fah Ŋgerzah ɓay fe vba̧na sa̧ri-aw ɓay fe le, vbukna-u ŋger mbamba.