Read Karang Mbete Ten sa̧wɓay 17 Bible Online

Mbete Ten sa̧wɓay 17 - Karang bible

Mbete Ten sa̧wɓay 17

¹Tem nzak pihna mbew ké sakra tem nzak pihnari ké toŋndɔk say kú-u mgba ŋgoro toŋndɔk say ra, ke ti̧h nun bi. Ke ɓah hi̧ mi ɓahri : « Mú gi ma gini. Mi sɔ́k mu sa̧w salɓay ké mgba Babiloŋ puh a luki, ke ɓa wu̧y nunpuki ké lak mbay tul mahmbihri.

²Mbayri ké tusiɓa laɓ nunpuki ziŋ ni. Nzuk tukalari ba, nzo yim tamgba̧y ye mbah ɓil woyri, mí ku laɓ nunpuki keni ziŋ ni. »

³Tempuki mgba mi hi̧ tem nzak pihna maŋ mi si lawkɔr bale, mi ko wu̧y ra kaɓ tul fe mgbam ké ɓa si̧h-u dororo, tul ye toŋndɔk say, ti̧w ye boh, ke ƴo suk wu̧y ra. Fe vbehna-fah Ŋgerzah mbah mun ye.

⁴Mí wu̧y ra ndoh gar lari mbay ké si̧h dororo mí zel hola hola. Ke mbar mun ye ke fe gamari : lari lɔr-ri, kasaw lari a ŋgeruri, zawri. Ke mgba ŋgoro lari lɔr ké ndɔk ye, mí ɓilu mbah ke fe ra̧mri pi, ke lɔrɔ nunpuki ye pi.

⁵Riŋ vbeh na nzakpol ye, tɔh riŋu sɔk kandɔkay : « Babiloŋ puh a luki, wu̧y nunpuki, wu̧y sa̧w fe ra̧m nzuk tukalari. »

⁶Mi ko mun wu̧y ra laŋ kandɔk nzuk-ta yim ɓay fe nzona ye. Ke nzo sem sa̧wnzuk Ŋgerzah ke sem nzukri ké te-teh ɓay Zezu pi, mí el ta ni ɓa yim kaŋ. Fe saŋaw na mi yer.

⁷Bale tem nzak pihna ɓah hi̧ mi ɓahri : « A fe mí na mu yer le ? » Ke el ɓahri : « Mi tén sa̧wɓay wu̧yaw ke sa̧wɓay fe mgbam ké ƴo ke tul toŋndɔk say ke ti̧w boh, ké suk wu̧yaw ra hi̧ mú lah.

⁸Fe mgbam ké mu ko ni-aw, ke ƴo ri lewsa̧, mí aŋay ba, ke ta-a. Mí ke él ti̧h ke ɓil lɔkɔ a ɗih-u sa̧rara ra ɓay kal si ziŋ ɓeɓna dale, nzuk tukalari ɓay kaɓ yer. A woyri-aw, ur ke sew-laɓ nunmbam ke tusiɓa, riŋ woyri ta ɓil mbete ɔkna ya. Mbete-u, ku vbeh riŋ nzukri ké ƴo ke ɔkna, mí nzuk tukalari ra, ku ɓay kaɓ yer ɓay fe le, ku ko fe mgbam ké ƴo ri lewsa̧, aŋay, ke ta-a, mí ke él gi ƴo pol nzukri.

⁹Sa̧wu mí su-su ɓay í ru̧ ke kerɓay woiri. Fe mgbam ké tul ye toŋndɔk say ra ɓa kasaw a gaŋuri toŋndɔk say ké wu̧y ra kaɓ ri. Ku ɓa mbayri toŋndɔk say.

¹⁰Mbay a ndiɓi-uri sew lak mbay woyri kal da. A tɔtɔklɔ-u ƴo ri, a toŋndɔk sayu gi ya ɓáy, mí ke gi kara, ke ta ɗih sew ya.

¹¹Fe mgbam ké ƴo ri lewsa̧, aŋay, ke ta-a ra, mí ke ɓa mbay a toŋndɔk seɗe-u. Ku ki̧ tul ye ké haŋsekle mbay a toŋndɔk sayuri, mí ke ƴo kal ma gel ɓeɓna.

¹²Ti̧wri boh ké mu ko-aw ɓa mbayri boh. Ku ta ke puh lakna ya ɓáy, mí fe mgbam hi̧ niri ŋgerna-lak mbay ziŋ ni mah sa̧wseh ndi̧[51].

¹³Riw woyri, kerɓay woyri mbew. Ku mbi ŋgerna-lak mbay woyri ke riŋ ɗina woyri ƴo laɓ keni pihna hi̧ fe mgbam ra.

¹⁴Ku rúh ŋgermu ke gun sami, mí gun sami ɓay mba tul woyri ɓay fe le, ke ɓa Mbay tul mbayri, Gaŋ tul gaŋri. Nzukri ké Ŋgerzah tu riŋ woyri, ké-e lu niri ɓa sa̧wnzuk ye, ku ƴo fal ŋgaŋ gun sami ɓay haw ŋgermu ziŋ ni pi[52]. »

¹⁵Mí tem nzak pihna ra el ɓah hi̧ mi ɓahri : « Mahmbihri ké mu ko wu̧y nunpuki lak mbay tulu-aw ɓa daɓa nzukri ɓoɗ ɓoɗ : sa̧wnzuk Izarayelri ke sa̧wnzuk a ɓoruri ke nzak ɓay ɓahnari.

¹⁶Ti̧wri boh ké mu ko ke fe mgbam, ku ɓay fu̧y Babiloŋ wu̧y nunpuki-aw fu̧-fu̧y. Ku náh fe yeri gbam, ku póŋ ni mun ndikpo, ku sú̧ mun hay ye su̧, ku nzúh ni ke hɔrɔ kpɔlɔk kpɔlɔk.

¹⁷Ŋgerzah mí ɓaŋ kerɓay kan ɓil law woyri hi̧ kú laɓ fe ké law ye yih, kú laɓ ke law mbew, kú mbi ŋgerna-lak mbay woyri laɓ keni pihna hi̧ fe mgbam ɓay hi̧ ɓay Ŋgerzah ɓá laɓ ɔh.

¹⁸Wu̧y ké mu ko ni-aw, a ye mí ke ɓa baw puh a luki ké ƴo lak mbay tul mbay tukalari. »