Read Karang Mbete Ten sa̧wɓay 18 Bible Online

Mbete Ten sa̧wɓay 18 - Karang bible

Mbete Ten sa̧wɓay 18

¹Bale mi el ko tem nzak pihna a ɓoru ɗer ké nunmbam. Ke ƴo ke huhrumun ké ŋger mbamba. Tehna mun ye teh gel gberere ké tusiɓa.

²Mí ke vba̧ nzak ke ŋgere ɓeleŋ : « Ke di-dir, ke di-dir, Babiloŋ, puh riŋ ɗina. Mu ti̧h ɓa gel kaɓna záh tukalari, kaŋpele ké záh a pipiri-uri ƴo ri, gel ƴona gundoy a suya-uri[53], gbam ké mah nun Ŋgerzah ya. »

³Ɓay fe le sa̧wnzuk tukalari gbam nzo yim tamgba̧y Babiloŋ. Mbay tusiɓari laɓ nunpuki ziŋ ni. Nzuk-ƴah lariri ziŋ fe hɔtɔk ke ŋgerna-su̧ tukala ye si wɔrɔk.

⁴Mí mi lah kusol a ɓoru ké nunmbam ɓahri : « Sa̧w nzuk biri, í ti̧h wuri poŋ ni, rɔkɔ í mgba bɔh sina ziŋ ni ɓil suya yeri, rɔkɔ fe vba̧na yeri ɓá toh tul woiri ɓay fe le, suya yeri ka̧y tul hani, ka̧y tul hani, ka̧y tul hani gaŋ ka̧h nunmbam, mí Ŋgerzah dum law ye si tul bolkusol ké Babiloŋ ɓeɓaw. »

⁶« Í laɓ ni mah ke[54] fe laɓna ké-e laɓ nzukri[55]. Í dal baa mah ke sa̧na ye. Í zukru yim a yi̧ŋu mbah ŋgoro ye mah ke yi̧ŋna yim ye ké-e hi̧ nzukri nzo.

⁷Kandɔk ké-e vba̧ haŋ ɓay riŋ ɗina ye, kandɔk ké-e kaɓ ɓil bela, kaŋ pi mí í dal baa-u hi̧ ni ɓay ké vba̧ mun zaɗ zaɗ, ɓay ké buklu mun vuh keni rew mgbɔkɔ mgbɔkɔ, a ye Babiloŋ ké-e ɓahri se : “A bi mí-i ɓa mbay wu̧y. Mi ta ɓa wu̧y kaŋpele ya. Mbihnun ta mbaŋ law bi ya.”

⁸Sa̧wu mí fe vba̧nari-ay lek ɓay tul ye, hul, mbihnun, ɗaka, ɓay toh tul ye nam mbew. Hɔrɔ ɓay se ni kpɔlɔk kpɔlɔk. » « Ŋgerzah, Gaŋ tul feri riw, mu ɓa nzuk ké ɓay kuŋ salɓay tul Babiloŋ, mu ɓa nzuk huhrumun. »

⁹Mí mbay tusiɓari ké laɓ nunpuki ziŋ ni, kú-u su̧ tukala wɔrɔk ziŋ ni-aw, ku dúh tul ɓay ko suh hɔrɔ-nzuh ni le, ku vúh rew goɗi goɗi, ku vbá̧ mun zaɗ zaɗ ɓay tul ye.

¹⁰Hȩkme koseh ye-aw mbaŋ law woyri, mí ku ƴo ɓa ɗih-u dale, ku vuh mun ɓahri : « Kúy ! Kúy ! Babiloŋ woo, maaah, puh riŋ ɗina, puh a ŋgere-u, i ! » « Babiloŋ, sa̧wseh mbew yaŋ mí salɓay tul wo kuŋ. »

¹¹Nzuk-ƴah lariri vuh rew, ku vba̧ mun zaɗ zaɗ ɓay fe le, nzuk mbew ké ɓay yeh sukna woyri ta-a :

¹²fe yehna ké ɓa fe gama kandɔk lari lɔr, lari a puki, kasaw lari a ŋgeruri, zawri, fe yehna gar lariri kandɔk gar mbay a si̧h-u hola hola, gar a si̧h-u dororo, gar ké na fi̧nak fi̧nak, ké ta-taŋ, fe yehna fe vulri kandɔk kpuh a feluri, sel mbaliri, kpuh a fu̧ buy buyri, lari a si̧h-uri, lari a garuri, kasaw a feluri, fe yehna fe-kar gahayri ɓoɗ ɓoɗ, fe yehna rekna kpuhri ké ba̧ri-u fu̧ buy buy, fe yehna fe nzona ke fe su̧na kandɔk yim, num, som, naŋ, fe yehna fe hɔlnari kandɔk nday, sami, ɗeŋe, fe yehna a ɓoru kandɔk sareɗ-fa̧h suknari dara mí mun nzukri ke tem nzukuri, ku yeh ɓa mgbal pi.

¹⁴« Babiloŋ, fe ziŋnari ké law wo te sa sa ri zi-zi. Num fe ziŋna wo ke fe gama wori ɗuk ɓa ɗih-u ké ta̧w wo. Fe-uri sa mun wo wu̧m wara. »

¹⁵Nzuk-ƴah lariri ké ziŋ lari ké ta̧w Babiloŋaw, hȩkme koseh ye mbaŋ law woyri, mí ku ƴo ɓa ɗih-u. Ku vuh rew mgbɔkɔ mgbɔkɔ, ku vba̧ mun zaɗ zaɗ.

¹⁶Ku vuh mun woyri ɓahri : « Kúy ! Kúy ! Babiloŋ puh riŋ ɗina woo, maaah, i ! Gar wo na fi̧nak fi̧nak, gar mbay wo a si̧h-u hola hola, a si̧h-u dororo. Mu mbar mun wo ke lari lɔr-ri ke kasaw lari a ŋgeruri ke zawri ké hi̧ mun wo ndu̧y ver ver. »

¹⁷« Babiloŋ, sa̧wseh mbew yaŋ mí baw fe ziŋna wo zi poŋ mu zolom. » Nzuk a suŋ suŋ ké ha̧rma tul mahmbih, nzuk kumbon-suk fe yehnari, nzuk-hehre kumbonuri, nzuk-dih fal lumuri, ku ƴo ɓa ɗih-u.

¹⁸Ku duh tul ko suh hɔrɔ ké ti̧h dororo dororo bale, ku kazi ɓay ɓahri : « Babiloŋ, puh riŋ ɗina, puh a ɓoru ké na ko-ko ta-a. »

¹⁹Ku buklu mun woyri ke som siɓa. Ku vuh rew, ku vba̧ mun zaɗ zaɗ ɓahri : « Kúy ! Kúy ! Babiloŋ puh riŋ ɗina woo, maaah, i ! Mu hɔl nzuk-ha̧rma tul mahmbihri ke fe ziŋna wo, ku su̧ ɓil woyri si wɔrɔk. » « Babiloŋ, sa̧wseh mbew yaŋ mí mu kaɓ ndɔk zolom. »

²⁰« A wo nunmbam, mú laɓ mun rihna. A woiri, sa̧wnzuk Ŋgerzah, gun nzak pihna Ŋgermbayri ke gun nzak pihna Ŋgerzahri, í zay mun woiri zakra zakra. Ŋgerzah ko suya ké Babiloŋ laɓ ziŋ wuri, mí ke dal baa-u da. »

²¹Bale ŋgertem nzak pihna deŋ baw kasaw-naŋ fe biɗ vbu toh mahmbih bivbiw. Ke ɓahri : « Kaŋ pi mí Babiloŋ, puh riŋ ɗina ɓay toh bivbiw. Nzuk ta ko nun wo mba wu̧m.

²²Háŋ nzaŋa, ɗí siŋ, úl ti̧w ke úl baw ti̧w ta mgbe ké puh wo mba, nzuk goso pihnari mbew ta puh wo mba, tiri fe naŋna ta mgbe ké puh wo mba, lampe ta teh ké puh wo mba, siŋ mun rihna-ya̧ hani sekeri ke tiklari ta mgbe ké puh wo mba, ɓay fe le, nzuk riŋ ɗinari ké tusiɓa mí ɓa nzukri ké ƴah lari ké puh wo, ɓay fe le, sa̧wkpuh wo rah sa̧wnzuk tukalari hi̧ nun woyri pu pih, mí sem nzukri gbam kú-u i niri ɓay riŋ Ŋgermbay, sem gun nzak pihna Ŋgerzahri ke sem sa̧wnzuk Ŋgerzah fer ku̧ puh wo[56]. »