Read Karang Mbete Ten sa̧wɓay 19 Bible Online

Mbete Ten sa̧wɓay 19 - Karang bible

Mbete Ten sa̧wɓay 19

¹Bale mi lah suhɓay daɓa nzukri mgbe gbaw ké nunmbam, ku ɗi siŋ ɓahri : « Náh dim wuri Miƴori, sa̧w-ya̧ nzukri, sa̧w riŋ ɗina, sa̧w huhrumun, gbam ɓa nzuku a Ŋgerzah wah

²ɓay fe le, kúŋ salɓay ye ɓa ketina, kúŋ salɓay ye-ay si gelu gaŋ. Ke kuŋ salɓay tul Babiloŋ puh a luki, Babiloŋ ɓa a ye wu̧y nunpuki, ke ɓeɓ tusiɓa ke nunpuki ye ɓeɓ, mí Ŋgerzah dal baa gun-laɓ pihna yeri ké-e i. »

³Ku yih siŋ ɓahri : « Náh dim wuri Miƴori. Hɔrɔ ké se puh a luki-aw suh-u ɗuh sew ke sew. »

⁴Ŋgernzukri ké bon seɗe falu niŋ ke sam fe ɔknari ké niŋ, ku guɓ siɓa, ku pir Ŋgerzah nzuk-kaɓ tul arŋgaw mbay, ku yih siŋ ɓahri : « Gelu munu. Náh dim wuri Miƴori. »

⁵Mí kusol mgbe ké arŋgaw mbay ra ɓahri : « Í pir wuri Ŋgerzah wah, a woiri gun-laɓ pihna yeri, gunri ke ŋgereri, a woiri gbam ké i ƴo hȩk ni, náh pir wuri Ŋgerzah wah. »

⁶Bale mi lah kusolri mgbe gbaw kandɔk tiri mbih ké nzɔk gbɔh gbɔh ké tul kasaw, kandɔk nduhna mbam ké mgbe gbururu gbururu. Ku yih siŋ ɓahri : « Náh dim wuri Miƴori ɓay fe le, puh lakna Gaŋ tul feri riw ten mun da, a ye ké-e ɓa Ŋgerzah, Nzuk huhrumun a luki. Náh zay wuri mun wah, náh laɓ wuri mun rihna, náh loŋ wuri riŋ ye, ɓay fe le nam-ya̧ wu̧y gun sami ka̧h da. Wu̧y mbana ye lek mun da.

⁸Wu̧y mbana ya̧ gar a foyu ké taŋ fi̧nak fi̧nak, ké ndu̧y mgbelek mgbelek. » Gar a taŋu ra ɓa ketina sa̧wnzuk Ŋgerzah.

⁹Tem nzak pihna sɔk mi ɓahri, mí vbeh mbete kandɔkay : « Pol tehna ƴo ziŋ nzukri kú-u ɗi niri gi gel ti̧hmbih-ya̧ wu̧y gun sami. » Ke ɓah ra ɓáy ɓahri : « Ketina ɓay Ŋgerzah munu. »

¹⁰Bale mi guɓ siɓa ké pol tem nzak pihna ra ƴo dim ni, mí ke bak mi ɓahri, mí dim ni ya. A ye ke ɓa bɔh pihna bi ke yi̧n biri kú-u ƴo te-teh ɓay Zezu. Mí dim Ŋgerzah ma, ɓayu ké Tempuki ƴo fal tehɓay Zezu ké gun nzak pihnari ɓah.

¹¹Mi ko nunmbam na ŋgah, mí ɗeŋe a puki ti̧h nun bi. Nzuk-kaɓ tulu, riŋ ɗina ye ɓa Ketina, riŋ ɗina ye ɓa Ndɔk-ɗɔr sal in ya. Ke ƴo kuŋ salɓay ke gelu gelu, ke ruh ŋgermu pi.

¹²Nzuk-kaɓ tul ɗeŋe ra, nun ye su nda̧w nda̧w kandɔk hɔrɔ kaŋ. Daɓa kasaw lari a ndu̧yuri suh ɗoŋ guɓatul mbay ye. Fe vbehna riŋ ye na ri, mí nzuk-tu riŋu ta-a, sa ɓa a ye ke hȩk ye mí ke tu.

¹³Nzuk-kaɓ tul ɗeŋe ra ndoh mah gar ké ndoh ɓil sem, riŋ ɗina ye ɓa Ɓay Ŋgerzah

¹⁴Nzuk ŋgermuri ké nunmbam, ku ndoh mah gar a foyu ké pu kpa̧h kpa̧h, ké taŋ fi̧nak fi̧nak. Ku kaɓ tul ɗeŋe a pukiri, mí ku dih fal nzuk-kaɓ tul ɗeŋe[57].

¹⁵Nzuk-kaɓ tul ɗeŋe ra ndakla lehna kpuh viyȩh ha̧h mbih a si̧h dororo ɓa yim. Yimu ɓa law sena Ŋgerzah Nzuk huhrumun a luki ké-e ri̧h siw tulu. Mahwu̧y a oh-u mba̧h mba̧h ti̧h ke haw ye. Ke túŋ keni sa̧wnzuk tukalari. Ke háh niri ke ka̧w lari ye kandɔk nzuk-hɔl sami kaŋ.

¹⁶Riŋ vbeh kan mah gar ye pi, kan tul mah-hul ye pi kandɔkay : Mbay tul mbayri, Gaŋ tul gaŋri.

¹⁷Mi el ko tem nzak pihna ké nunmbam ƴo ɓil seh. Ke vba̧ nzak ɓeleŋ ɗi gundoyri ké zo síɓa ɓahri : « Gi wuri su̧ fe su̧na baw ti̧hmbih Ŋgerzah !

¹⁸Gi wuri lak hul mbayri, hul ŋgernzuk kumandahri, hul nzuk ŋgermuri, hul ɗeŋeri ke nzuk-kaɓ tuluri, í lak hulawri gbam, mgbalri ke nzuk a garuri, nzuk a lukiri ke nzuk a gunuri. »

¹⁹Mi el ko fe mgbam ra ke mbay tusiɓari ke soze woyri, ku mbu̧h ɓay ruh ŋgermu ke nzuk-kaɓ tul ɗeŋe ke nzuk ŋgermu yeri.

²⁰Nzuk-kaɓ tul ɗeŋe mgba fe mgbam a titilu mbih ni ɓa mgbal ke fe mgbam a seɗe-u, a ye gun nzak pihna fe mgbam a titilu. Lewsa̧ gun nzak pihna foh-aw laɓ fe saŋri ke riŋ fe mgbam a titilu. Ke rɔk keni nzukri ké ya̧ zezele fe mgbam a titilu, kú-u ƴo dim fe tem ye. Mí nzuk-kaɓ tul ɗeŋe ra vbuk niri seɗe mbɔk ke nun ma gel baw hɔrɔ ké som kasaw-lu hɔrɔ mgbe ri.

²¹Ke tuŋ tɔr nzuk a ɓoruri i ke mahwu̧y ké ti̧h ke haw ye, mí gundoyri lak huluri mbah ɓil woyri tuɓ tuɓ.