Read Karang Mbete Ten sa̧wɓay 2 Bible Online

Mbete Ten sa̧wɓay 2 - Karang bible

Mbete Ten sa̧wɓay 2

¹Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Efeze kandɔkay : « Nzuk ké mgba gunwu̧y nunmbam toŋndɔk say ké ndɔk lakna ye, ké-e ƴo ha̧rma haŋsekle lampe lari lɔr ké toŋndɔk say ra ɓah ɓayay ɓahri,

²mi tu fe laɓna woiri tu-tu. Ta̧hma woiri ke su̧hlaw woiri, mi tu-tu. Mi tu ɓahri, i ik law tul nzuk-mbi fe laɓna tukalari ya. I fah nzukri ké ɗi mun woyri ɓa gun nzak pihna biri, mí i tu niri ɓa nzuk kuŋɓayri kaŋto.

³I ɓer gi̧w, i su̧h law ɓil koseh ɓay riŋ bi ké kan tul woiri, mí i ta̧h ya.

⁴Mí keni-aw kara, mi ƴo ke ɓay ziŋ wuri ɓay fe le, law sana woiri a aŋay mah hani ke law sana woiri a titilu mba.

⁵Í dum law woiri ké tul law sana a titilu. Dale í sɔɓ siŋ sina woiri, í el mbi suki woiri a titiluri ké ti̧h ke law sana. Gelke i el mbi law sana a titilu ra ya le, mi gí ta̧w woiri. Mi lóh lampe woiri ké gel kan-na-u.

⁶Mí fu̧yna woiri ké i ƴo fu̧y keni sa̧w fe laɓna nzuk-dih fal Nikolari[7] mah pirna. I fu̧y kandɔk a bi ké mi ƴo fu̧yu kaŋ.

⁷Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. A ge ge ké haw ŋgermu le, mi hí̧ ni ke lák lehna kpuh ɔkna ké na ta̧w Ŋgerzah. »

⁸Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Simir kandɔkay : « Nzuk ké ti fe, ké ɔh fe, ke hu da, mí ke el ƴo ke ɔkna ɓa ŋgɔh ra ɓah ɓayay ɓahri,

⁹mi tu koseh woiri tu-tu. Mi tu wuri ɓa nzuk sehri tu-tu pi, mí ketina le, i ɓa nzuk fe ziŋnari. Mi tu nani ké ziɓri laɓ ke riŋ woiri ké i mbi mahful bi tu-tu. A woyri ku ɗi mun woyri ɓa sa̧w Izarayel nzuk biri, mí ku ɓa sa̧w vul misoŋ mbay záh tukala, nzukbaa.

¹⁰Í laɓ hȩkme ya, kosehri ɓay ziŋ wuri. Í lah, záh tukala ɓay sek wuri. Ke mgbá nzuk woiri a haniri ku̧ vul mgbal ɓay leh law woiri keni. I kó seh nam boh. Mí ɓa ra hul kara, í kan law woiri na sa tul bi. Ɔkna ké i ziŋu ɓa gay mbay ké i ɓay ndoh-u.

¹¹Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. A ge ge ké haw ŋgermu le, hul a seɗe-u ta i ni ya wu̧m[8]. »

¹²Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Pergama kandɔkay : « Nzuk ké ƴo ke mahwu̧y ké oh mba̧h mba̧h fál seɗe ra ɓah ɓayay ɓahri,

¹³mi tu puh ké i kaɓ ri-aw tu-tu. Puh-u, bohro mbay záh tukala ƴo ri. Sew Antipa nzuk-teh ɓay bi, ké-e ƴo fal ŋgaŋ bi, ku i ni ké puh woiri, gel ƴona mbay záh tukala. Mí a woiri ba, i ƴo tul riŋ bi vbaŋ. Law woiri ma̧y ɓay tul bi ya.

¹⁴Mí keni-aw kara, mi ƴo ke ɓay a hani ziŋ wuri ɓay fe le, ké sakra woiri-aw, nzuk a haniri ƴo ri. Ku dih fal fe sɔkna Balam a lewsa̧[9]. A ye Balam, ke hew mbay Balak hɔl ndaw ké pol gun Izarayelri hi̧ ku su̧ fe su̧na kú-u puh hi̧ záhri ba, mí ku laɓ nunpuki.

¹⁵Kaŋ pi mí, ké sakra woiri kara, nzuk a haniri mbu̧h ke Nikolari mbi nzak fe sɔkna Balam ra dih fal woyri kandɔkaw pi.

¹⁶Dale í poŋ fe sɔknari-aw ra ma sa̧. I poŋ ya le, mi gí ɓa gah-u ké ta̧w woiri. Mi láɓ ŋgermu ziŋ wuri ke mahwu̧y ké ti̧h ke haw bi-ay.

¹⁷Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. A ge ge ké haw ŋgermu le, mi hɔ́l ni ke huru man[10] a mu̧h-u ké ur ke nunmbam. Mi hí̧ ni kasaw a puki kpa̧h kpa̧h ké na roŋa roŋa. Ké tul kasawu, riŋ ye a foyu vbeh kan ri, mí nzuk tú riŋu, ta-a. Sa ɓa nzuk ké ya̧ kasawaw mí tu. »

¹⁸Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Tiyatir kandɔkay : « Gun Ŋgerzah ké nun ye su nda̧w nda̧w kandɔk hɔrɔ, ké bɔk ye ndu̧y kandɔk lari ké si̧h ɓil hɔrɔ vul tiw ra ɓah ɓayay ɓahri,

¹⁹mi tu fe laɓna woiri, law sana woiri, kanlaw woiri ké na sa tul bi, sona ké i so nzukri ke riŋ bi, ɓér gi̧w woiri, mi tu-tu. Mi tu fe laɓna woiri a aŋay mba fe laɓna a titilu mba-mba.

²⁰Mí keni-aw kara, mi ƴo ke ɓay ziŋ wuri ɓay fe le, kpatara i ƴo poŋ Zezabel sɔk fe ké law ye yih ke riŋ Ŋgerzah. Wu̧yu ɗi mun ye ɓa gun nzak pihna Ŋgerzah, mí fe sɔkna ye ƴo rɔk gun biri hi̧ ku laɓ nunpuki, ku su̧ fe su̧na kú-u puh hi̧ záhri.

²¹Mi geŋ ni nam mah fe ɓay ké mbi law ye ké tul fe laɓna nunpuki ke riŋ záhri ma fal, el gi ta̧w bi, mí ke sa-a.

²²Í ko. Mi ƴo vba̧ ni kan hih nunpuki ye. Vba̧na-aw ɓa ŋger sena ɓay tul ye ke nzukri ké laɓ nunpuki ziŋ ni, gelku-u sa lu law woyri ké tul fe laɓna woyri-aw el dih fal bi ya.

²³Mi dúh gun yeri mburuk mburuk. Kaŋ dale sa̧w nzuk Ŋgermbayri gbam ɓay tu ɓa teh-u ɓahri, Mi ƴo ri. Mi ƴo hekre kerɓay nzukri ke law woyri. Mi hí̧ a ge ge le, kpaŋndɔk ye ɓay mah ke fe laɓna ye, fe laɓna ye.

²⁴Mí a woiri, tɔr gun biri ké Tiyatir, ké i kaɓ ɓa dem, i sa dih fal fe sɔkna Zezabel ké nzukri ɗi ɓa ru̧na laɓi ra ya. I sa i laɓi záh tukala ra ya. Kandɔk ké i sa dih fal Zezabel ya, mi ɓáŋ ɓay a ɓoru kan tul woiri ya.

²⁵Sa ɓa ɓay ké i ya̧ ra, í mgba ɓa kpuh-u mah ka̧h namu ké mi ten mun bi.

²⁶Nzuk ké haw ŋgermu, ké ƴo tul fe laɓna bi ɓa kpuh-u ka̧h ɔh tɔru le, mi hí̧ ni ŋgerna-lak mbay tul sa̧wnzuk a ɓoruri kandɔk Bah bi hi̧ mi ŋgerna-u kaŋ pi. Ke háh niri kandɔk nzuk fe hɔlna ke ka̧w lari mbay ye. Ke vbár niri kandɔk iri kaŋ. Mi hí̧ ni roh pele[11] pi.

²⁹Nzuk ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. »