Read Karang Mbete Ten sa̧wɓay 20 Bible Online

Mbete Ten sa̧wɓay 20 - Karang bible

Mbete Ten sa̧wɓay 20

¹Mi ko tem nzak pihna ɗer ke nunmbam ke baw sen ké ndɔk ye. Ke mgba lakele nzak lɔkɔ a ɗih-u sa̧rara.

²Ke mgba dragoŋ, a ye soy a lewsa̧ kú-u tu ni ɓa diyabolo (sɔk ɓahri, nzuk-sek nzukri) mini satan (sɔk ɓahri, nzukbaa). Ke ŋga̧h ni mah sew sɔɗ sɔɗ boh (1.000)[58].

³Ke mgba dragoŋ ra vbu ɓil lɔkɔ a ɗih-u sa̧rara. Ke dar nzaku, ke ri̧h ke mbaka ɓay hi̧ dragoŋ ɓá rɔk sa̧wnzuk tukalari mba sew sɔɗ sɔɗ boh ɔh dara mí ku sél ni ɓay sa̧wseh ndi̧.

⁴Mi ko arŋgawri. Nzuk-kuŋ salɓayri kaɓ tulu. Ku ya̧ ŋgerna-kuŋ salɓay. Ku ɓa nzukri kú-u kuŋ tul woyri ɓayu kú-u te-teh ɓay Zezu, kú-u ƴo tul ɓay Ŋgerzah. A woyri ku dim fe mgbam a titilu ya, ku dim fe tem ye ya pi, ku ya̧ zezele fe mgbam ra kan nzakpol woyri ya, kan ndɔk woyri ya pi, mí ku el kaɓ ke pa̧ymun a foyu, ku ƴo lak mbay ziŋ Ŋgermbay sew sɔɗ sɔɗ boh ra[59].

⁵A a̧w mí ɓa tí̧h ke puh záh a titilu. Ké ɓil sew sɔɗ sɔɗ boh-aw, tɔr hul a ɓoruri ba, ku ziŋ pa̧ymun a foyu ya.

⁶Pol tehna ɓa nzuku a nzukri ké ti̧h ke pa̧ymun a foyu ke titilu-ay. Ku ɓa nzukri ké sa̧w woyri ɓa Ŋgerzah. Wara mí ku na ɓa nzuk kani Ŋgerzah ke nzuk kani Ŋgermbay, mí ku ƴo lak mbay ziŋ Ŋgermbay sew sɔɗ sɔɗ boh-aw. Hul a seɗe-u ta ɗi riŋ woyri ya.

⁷Sew sɔɗ sɔɗ boh kal dale, ku tén satan, mbay záh tukala, ɓil mgbal ye.

⁸Ke tí̧h si rɔk sa̧wnzuk tukalari ké tusiɓa gbam, mbu̧h niri mbew ke Gɔk mbay Magɔk[60]. Ke mbú̧h niri ɓay laɓ ŋgermu. Tul woyri ŋgi̧ kandɔk sikɔkre ɓel mahmbih kaŋ.

⁹Ku tí̧h pah pah ya̧ tusiɓa gbam. Ku ɗóŋ puh a luki ké law Ŋgerzah te sa tulu, ku ɗóŋ gel nam sa̧w nzuk yeri, mí hɔrɔ ɓay toh buɓ ké nunmbam gi duh niri mburuk mburuk.

¹⁰Mí ku vbu diyabolo, a ye mbay záh tukala ké rɔk sa̧wnzukri ra, ma gel baw hɔrɔ ké som kasaw-lu hɔrɔ mgbe hɔrɔ ké ri. Ke dih fal fe mgbam a titilu ke gun nzak pihna foh fe mgbam. Gbam woyri ku kó seh ké ri sew ke sew suŋ ke seh, suŋ ke seh[61].

¹¹Mi ko baw arŋgaw a puki, mi ko nzuk-kaɓ tulu pi, mí tusiɓa ke nunmbam zi wu̧m ké pol ye. Bolu kara ta mba.

¹²Mi el ko hulri, ŋgereri ke gunri, ku ƴo pol arŋgaw ra. Nzuk-kaɓ tul arŋgaw mbay mgbur mbete-uri. Mbete a ɓoru ké mbew kara ke mgbur pi, ɓa mbete riŋ nzukri ké ƴo ke ɔkna. Ke mgba fe laɓna hulri tuh ke fe vbehna ké na ɓil mbeteri, mí ke kuŋ salɓay tul woyri keni.

¹³Mahmbih poŋ hulri ti̧h, Hul ke Puhzáh poŋ hulri ti̧h, hul a suŋ suŋ le, ke kuŋ salɓay tul ye, tul ye mah ke fe laɓna ye, fe laɓna ye.

¹⁴Bale ku fa̧h Hul ke Puhzáh mbɔk vbu kivbiw ma gel baw hɔrɔ. Gel baw hɔrɔ ra mí ɓa hul a seɗe-u[62].

¹⁵Nzukri ké ƴo ke ɔkna riŋ woyri na ɓil mbete a mbewu-aw, mí nzuk a suŋ suŋ ké riŋ ye ta ɓil mbete-u ya le, ku vbu ni ma gel baw hɔrɔ.