Read Karang Mbete Ten sa̧wɓay 21 Bible Online

Mbete Ten sa̧wɓay 21 - Karang bible

Mbete Ten sa̧wɓay 21

¹Mí mi ko nunmbam ɓa a foyu ke tusiɓa ɓa a foyu. Nunmbam a titilu ke tusiɓa a titilu kal da. Mahmbih ba, ta mba[63].

²Mi ko Zurusalem ɓa a foyu ti̧h ké nunmbam. Puh-u ɓa puh a luki ké law Ŋgerzah te sa sa ri, ƴo ɗerna ké ta̧w Ŋgerzah. Puh-u ɓa gun wu̧y tikla kú-u mbar mun ye ndɔh geŋ mbana ye kaŋ.

³Mí-i lah baw kusol mgbe ké arŋgaw Mbay ɓahri : « Í ko gel ƴona Ŋgerzah na sakra nzuk pirmatulri da. Ke káɓ ziŋ niri, ku ɓa sa̧w ye. Ŋgerzah ke mun ye gaŋ mí ɓay ƴo ziŋ niri.

⁴Ke ták mbihnun woyri gbam. Hul ɓay ta mba. Rew hul ɓay ta mba, vba̧ mun ɓay ta-a, koseh ɓay ta-a pi. Fe a polri gbam kal da. »

⁵Mbay ké kaɓ tul arŋgaw ra ɓahri : « Í ko, mi ƴo laɓ feri gbam ɓa a foyu. » Ke ɓahri se : « Mú vbeh kandɔkay : Ɓayri-ay ƴo gelu ɓa ketina. »

⁶Ke ɓahri : « Gbam laɓ ɔh da. A bi, mi ɓa sa̧w fe, mi ɓa tul fe, mi ti fe, mi ɔh fe. A ge ge ké kɔkmbih i ni le, a bi gaŋ mí-i hí̧ ni ké nzo mbih ké lu ké law ɓa mbih ɔkna. Mi hí̧ ni ndikpo.

⁷Nzuk ké haw ŋgermu, ke yá̧ fe baah. A bi, mi ná ɓa Ŋgerzah ye, nzuku ba, ke ná ɓa gun bi.

⁸Mí nzuk law hȩkmeri, nzukri ké poŋ mi, nzukri ké laɓ feri ké fa̧h mun bi zir zir, nzuk-i hulri, nzuk-laɓ nunpukiri, nzuk sa̧wkpuhri, nzuk-dim záhri, nzuk-kuŋ ɓayri gbam, fe ziŋna woyri ɓa gel baw hɔrɔ ké som kasaw-lu hɔrɔ mgbe ké ri. » (Sɔk ɓahri, hul a bɔk seɗe-u.)

⁹Tem nzak pihna mbew ké sakra tem nzak pihnari toŋndɔk say kú-u mgba ŋgoro toŋndɔk say ɓa sar fe vba̧na toŋndɔk say ra, gi ɓah hi̧ mi ɓahri : « Mú gi, mi sɔ́k mu wu̧y mbana ké ɓa wu̧y gun sami ra. »

¹⁰Tempuki mgba mi hi̧ tem nzak pihna maŋ mi si tul kasaw ké gaŋ zeŋleŋleŋ, mí ke sɔk mi Zurusalem, puh a luki ké law Ŋgerzah te sa sa ri, ƴo ɗerna ke nunmbam ké ta̧w Ŋgerzah ra.

¹¹Puh-u ndu̧y ver ver mah riŋ ɗina Ŋgerzah. Puh-u teh yerere kandɔk kasaw ké lari-u ŋge-ŋger ké riŋu ɓa zaspe ké teh yerere eŋ kristal ver a puki.

¹²Baw ila a gaŋu ɗoŋ puh-u. Nzakfuluri ɓa boh falu seɗe. Tem nzak pihnari boh falu seɗe ƴo nzakfuluri. Riŋ sa̧w gun Izarayelri ké boh falu seɗe[64] vbeh kan nzakfuluri[65].

¹³Nzakful say na fál tí̧h seh, say na fál ɓel ɓil seh a kperu, say na fál ɓel ɓil seh a lakna, say na fál ríŋ seh.

¹⁴Kasaw diŋ ila-u ɓa boh falu seɗe. Riŋ gun nzak pihna gun sami ké boh falu seɗe vbeh kan tul kasawuri[66].

¹⁵Tem nzak pihna ké ɓah ɓay hi̧ mi ra mgba ka̧w lari lɔr ɓay leh puh ke nzakfulri ke ila gbam.

¹⁶Ɓel ɓil puh-u niŋ riw mah hani, sɔk ɓahri, pehna-u ke ahna-u mah hani. Tem nzak pihna ra leh puh ke ka̧w lari ye ɓa boh falu seɗe gel sɔɗ sɔɗ boh gel boh (12.000). Pehna-u ke ahna-u ke gaŋna-u gbam mah hani[67].

¹⁷Tem nzak pihna ra leh ila ke pehna tulndɔk nzuk pirmatul ɓa boh falu seɗe gel boh falu seɗe (12 x 12 = 144).

¹⁸Ila-u ɓa kasaw zaspe, puh-u ba, ɓa lari lɔr a teh yerere kandɔk kristal ver a puki.

¹⁹Kasaw diŋ ila-u zel ɓa ndɔh-u ke sam kasawri ɓoɗ ɓoɗ ké lari-u ŋge-ŋger. Kasaw a titilu ɓa zaspe, a seɗe-u ɓa safir, a sayu ɓa agaɗ, a niŋu ɓa emeroɗ, a ndiɓi-u ɓa sardonik, a tɔtɔklɔ-u ɓa sardi, a toŋndɔk sayu ɓa krisoliɗ, a toŋndɔk seɗe-u ɓa beril, a toŋndɔk mbewu ɓa topa, a boh-u ɓa krisopa, a boh falu mbewu ɓa tukuwa, a boh falu seɗe-u ba, ɓa amitiɗ.

²¹Nzakfuluri ké boh falu seɗe-aw ɓa perle[68] boh falu seɗe. Ke perle mbew mí nzakfulri boh falu seɗe ti̧h keni. Mahful mgboŋ ka̧w puh ba, ɓa lari lɔr a teh yerere kandɔk kristal ver a puki.

²²Mi ko vul kani ké ɓil puh-aw ya. A ye Ŋgerzah Gaŋ tul feri riw Nzuk huhrumun a luki ke gun sami mbɔk mí ɓa vul kani-u.

²³Puh-u ta ke ɗaka hi̧ seh mini few ɓá teh gel ké ri ya, ɓayu ké riŋ ɗina Ŋgerzah mí ƴo teh gel ké ri. Sa̧w gel tehna-u ɓa gun sami.

²⁴Sa̧wnzuk tusiɓari ƴo ha̧rma ɓil gel tehna ye. Mbay tusiɓari gbam ɓay gi ke fe ziŋna woyri ké ri.

²⁵Nzakfulri ké puh-u ta tu-tuhna ya ɓayu ké suŋ sih puh-u ya.

²⁶Mí sa̧wnzukri gi ke riŋ ɗina woyri ke pirna woyri ɓay roh puh-u.

²⁷Fe a pipiri-u ta rih ri ya. Nzuk-laɓ feri ké fa̧h mun Ŋgerzah zir zir ke nzuk-kuŋ ɓayri ta rih ri ya wu̧m. Sa ɓa nzukri ké riŋ woyri vbeh na ɓil mbete gun sami-hi̧ ɔkna mí ɓay rih ké ri.