Read Karang Mbete Ten sa̧wɓay 22 Bible Online

Mbete Ten sa̧wɓay 22 - Karang bible

Mbete Ten sa̧wɓay 22

¹Tem nzak pihna ra el sɔk mi nduh mbih ɔkna. Mbih-u teh yerere kandɔk kristal ver a puki mí sa̧w uhna-u ur ké arŋgaw Ŋgerzah ke gun sami.

²Mbih-u uh ke mahful haŋsekle puh. Haŋsekle-u, kpuh ɔkna ƴo ri[69]. Kpuh-u ƴo leh bɔk boh falu seɗe Few mbew le, leh bɔk mbew mbew. Gayuri ɓa sa̧wkpuh-gah sa̧wnzuk tusiɓari.

³Nazi ta mba. Arŋgaw Ŋgerzah ke gun sami ƴo ɓil puh-u. Gun yeri ɓa nzuk kani, ku ƴo dim ni.

⁴Ku ƴo ko nun ye[70]. Riŋ ye ba, vbeh na nzakpol woyri.

⁵Kandɔkaw mí suŋ ta mba, nzuk ké na ɗaka gel tehna lampe mini suna seh ta-a ɓay fe le, Gaŋ tul feri riw, a ye Ŋgerzah mí teh gel tul woyri. Gun yeri ƴo lak mbay sew ke sew.

⁶Ke ɓah hi̧ mi ɓahri : « Ɓayri-ay ɓa ketina ƴo gelu. » Gaŋ tul feri riw, a ye Ŋgerzah ké Tem ye ɓaŋ ɓay ndoh ɓil law gun nzak pihna yeri, ke pih tem nzak pihna ye si sɔk gun-laɓ pihna yeri ɓay feri ké zah le ɓay laɓu.

⁷Ke ɓahri : « Mú ko, mi ƴo gina ɓa gah-u. Pol tehna ɓa nzuku a nzuk ké ƴo tul ɓayri ké Tempuki ɓah ku̧ ɓil mbete-ay. »

⁸A bi Za̧h, mi lah ɓay feri-ay, mi ko fe-uri. Bol falu ké mi lah, ké mi ko feri-ay ra, mi guɓ siɓa ké pol tem nzak pihna ké sɔk mi feri-ay, mi ƴo dim ni.

⁹Mí ke bak mi ɓahri, mí dim ni ya. Mí dim Ŋgerzah ma. A ye, ke ɓa bɔh pihna bi ke yi̧n biri, bɔh pihna gun nzak pihna Ŋgerzahri ke nzukri ké ƴo tul ɓayri ké na ɓil mbete-ay.

¹⁰Ke ɓahri se, mí mu̧h ɓayri ké Tempuki sɔk mi ké na ɓil mbete-ay ya. Sew fe-uri ɗih ya-ay ɓay hi̧ ɓo nzuk-poŋ ketina ɓá laɓ foh ye ɓáy, nzuk-mbi fe laɓna tukala ɓá si ke fe laɓna tukala ɓáy, nzuk-ƴo tul ketina ɓá ƴo tul ɓay a ketina ɓáy, nzuk-mbi mun ye hi̧ Ŋgerzah ɓá mgba mun ye ɓáy.

¹²« Mú ko, mi ƴo gina ɓa gah-u, mí kpaŋndɔk nzukri na ta̧w bi-ay ɓay mí wal. A ge ge le ɓay ya̧ mah ke fe laɓna ye, fe laɓna ye.

¹³A bi gaŋ, mi ɓa sa̧w fe, mi ɓa tul fe, mi ti fe, mi ɔh fe, mi ɓa mbay-nda pol, mi ƴo gbu̧h-u pi.

¹⁴Pol tehna ɓa nzuku a nzukri ké wɔk gar woyri[71]. Ku zíŋ ful rih puh ke nzakfulri, ku lák lehna kpuh ɔkna. Mí a woyri nzuk sa̧wkpuhri, nzuk-laɓ nunpukiri, nzuk-i hulri, nzuk-dim záhri, nzukri ké fe-rih law woyri ɓa kuŋɓay, fe laɓna woyri ɓa foh, sam gáy a kandɔkawri gbam, ku ƴó kala.

¹⁶A bi Zezu, mí-i pih tem nzak pihna bi si te-teh ɓay feri-ay hi̧ wuri ɓay sa̧w in Ŋgermbay ké gel mbu̧h hani woyri ɓoɗ ɓoɗ. Mi ɓa sa̧w Daviɗ mbay a luki, mi ɓa mi̧hri ye pi, mi ɓa roh pele[72] ké ndu̧-ndu̧y. »

¹⁷Tempuki ke wu̧y mbana gun sami ɓahri : « Gi ! » Nzuk-lah ɓay mbete-ay ɓá ɓahri : « Gi ! » « Nzuk ké kɔkmbih i ni le, ké gi ké nzo mbih law ké lu ɓa mbih ɔkna, ndikpo. »

¹⁸Mi ƴo te-teh ɓayay hi̧ wuri, nzuk a suŋ suŋ ké lah sa̧wɓayri ké Tempuki ten na ɓil mbete-ay, mí a ge ge ké ɓaŋ ɓay a ɓoru dɔɓ ri le, Ŋgerzah ɓay el ke fe vba̧nari ké na ɓil mbete-ay ku̧ tul ye.

¹⁹Mí nzuk lu ɓay ké na ɓil mbete-ten sa̧wɓay Tempuki-ay ma fal le, Ŋgerzah ɓay lu ni ké gel-lak lehna kpuh ɔkna ma fal pi. Ke ta rih puh Ŋgerzah ké mbete-ay vbeh ɓayu ra ya.

²⁰Nzuk-teh ɓayri-ay ɓahri : « Kaŋ gaŋ, mi ƴo gina ɓa gah-u. » « Gelu munu, Zezu Gaŋ tul feri riw, mú gi ge. »

²¹Mi vah wuri gbam ke lawsuki Zezu Gaŋ tul feri riw ké ƴo ziŋ wuri.