Read Karang Mbete Ten sa̧wɓay 3 Bible Online

Mbete Ten sa̧wɓay 3 - Karang bible

Mbete Ten sa̧wɓay 3

¹Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Sarde kandɔkay : « Nzuk ké Tem Ŋgerzah kehr ɓa toŋndɔk say ƴo ziŋ ni, ké-e mgba gunwu̧y nunmbamri toŋndɔk say ké ndɔk ye ra ɓah ɓayay ɓahri, mi tu pihna woiri tu-tu. Riŋ ɗina woiri mgbe-mgbe. Nzukri pir wuri ɓahri, “i ƴo ke ɔkna”, mí a bi ba, mi ɓahri, i ɓa hul[12].

²Fe laɓna woiri mah nun Ŋgerzah bi ya dih. Í tom, í ger tɔr fe laɓnari ké toŋ ɗih ya ɓay huna ziŋ Nzuk sa̧w ɔkna rɔkɔ tɔru ɓá hu wu̧m.

³Í dum law woiri ani mí i lah, ani mí i ya̧. Í hȩk ɓayu, í poŋ fe laɓna woiri, í el mbi fe laɓna bi. Ta-a le, mi tí̧h tul woiri kpur kandɔk riɓa kaŋ. I tú sa̧wseh ké mi tí̧h tul woiri ya.

⁴Mí nzuk riŋ ɗina a kpakpaŋuri ndi̧ ƴo ri ké Sarde. Ku mbi fe laɓna a sih gar ya. Le ku ndóh gar a puki si keni sina ziŋ mi ɓay fe le, ku ma-mah.

⁵Nzuk ké haw ŋgermu, ke ndóh gar a puki. Riŋ ye na ɓil mbete riŋ nzukri ké ƴo ke ɔkna. Mi ta lu riŋ nzuku ya, mi sɔ́k teh riŋ ye ké pol bah bi, ké pol tem nzak pihna yeri ɓahri, ke ɓa nzuk bi gaŋ.

⁶Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. »

⁷Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Filadelfi kandɔkay : « A ye ké deɓ ye ta-a, ke ɓa Ketina, ke mgba lakele ké Daviɗ mbay a luki ƴo keni, ke mgbur le, nzuk ké mah tuh-u ta-a, mí ke tuh-u le, nzuk ké mah mgburu ta-a pi, ke ɓah ɓayay ɓahri,

⁸mi tu fe laɓna woiri tu-tu. Í ko. Mi mgbur ful hi̧ wuri mgbu-mgbur, nzuk ké mah tuh-u kan tul woiri ta-a ɓay fe le, ŋgerna woiri ŋgi̧ ya kara, i ƴo tul ɓay bi, mí i ma̧y riŋ bi ya.

⁹Í ko, mi hi̧ nzuk vul misoŋ mbay záh tukalari, ku gí ta̧w woiri. A woyri ku ɓa ziɓri ké ɗi mun woyri ɓa sa̧wnzuk Ŋgerzah wara le, ɓa kuŋɓay. Ku húk pol woiri dale, ku tú ɓahri, a bi mi sa wuri sa-sa ɓay fe le, i mgba ɓay su̧hlaw bi ma law woiri. A bi kara, mi mgbá wuri ɓa suki ɓil koseh ké ɓay gi leh law nzuk tukalari.

¹¹Mi ƴo gina ɓa gah-u, í mgba fe ké i ƴo keni ɓa kpuh-u rɔkɔ nzuk ɓá nah kpaŋndɔk woiri.

¹²Nzuk ké haw ŋgermu, mi láɓ ni ɓa kpuh-tuhru mahful vul kani Ŋgerzah. Ke ta loh ké ri si kala ya. Mi vbéh riŋ Ŋgerzah bi kan tul ye pi, mi vbéh riŋ bi a foyu kan tul ye pi, Zurusalem a foyu kara, mi vbéh riŋu kan tul ye pi. Puh-u ɓa puh Ŋgerzah ké ɗer ké nunmbam.

¹³Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. »

¹⁴Mú vbeh nzak pihna-ay hi̧ tem nzak pihna ké ƴo fal sa̧w in Ŋgermbay ké Lawdisi kandɔkay : « A ye ké-e ɓa nzuk-bal tul ɓay, ké riŋ ye ɓa Gelu Munu, ke ɓa nzuk-teh ɓay, ke ɓa nzuk-ƴo tul ɓay, ke ɓa Ketina, ke ɓa sa̧w feri gbam ké Ŋgerzah laɓ, ke ɓah ɓayay ɓahri,

¹⁵mi tu fe laɓna woiri tu-tu. I ɓa mbih nzona ké voh ya, i ɓa mbih zaŋna ya pi, mí mah ɓay í mbi mbew.

¹⁶Mí i ƴo haŋsekle. Ké i zaŋ ya, i voh ya, le mi zóh wuri pur ké haw bi ku̧ kpah.

¹⁷Ɓay fe le, i ɓahri, i ɓa nzuk fe ziŋna, i ti̧h baw nzuk da, fe mbew ké poh wuri ta-a, mí i tu ya. I ɓa nzuk seh. Ko wuri sa̧h law mbem. I ɓa ko̧hko, I ɓa ra̧w. Mun woiri na ndikpo.

¹⁸Le mi ƴo hew wuri ɓahri se, í yeh lari lɔr a vbo ke hɔrɔ ké ta̧w bi ɓay í ti̧h ɓa nzuk fe ziŋna, í yeh gar a puki ɓay pɔr su̧hru mun woiri keni, í yeh sa̧wkpuh nun ɓay í el ko gel.

¹⁹A bi ra, nzuk a a̧y ké mi sa ni sa-sa, mi zɔm ni, mi ndar ni. Kaŋ dale í mbi law woiri ké tul kerɓay woiri, í hi̧ law woiri ri̧h si̧w tul bi.

²⁰Í lah. Mi ƴo vba̧ nzak vul woiri. Nzuk ké lah kusol bi, mí ke mgbur ful le, mi ríh si ta̧w ye, mi sú̧ fe ziŋ ni, a ye kara, ke sú̧ fe ziŋ mi pi[13].

²¹Nzuk ké haw ŋgermu, mi hí̧ ni kaɓ ɓel bi ké tul arŋgaw mbay bi kandɔk a bi ké mi haw ŋgermu, mi el kaɓ ɓel Bah bi ké tul arŋgaw mbay ye ziŋ ni.

²²Nzuk a suŋ suŋ ké ƴo ke suk-lah ɓay le, ké lah ɓay ké Tempuki ƴo sɔk sa̧w nzuk Ŋgermbayri. »