Read Karang Mbete Ten sa̧wɓay 4 Bible Online

Mbete Ten sa̧wɓay 4 - Karang bible

Mbete Ten sa̧wɓay 4

¹Falu le, mi ko mahful nunmbam ti̧h nun bi na ŋgah, mí kusol ké mi lah pol ké mgbe kandɔk ti̧w a bawu ra, ɓah ɓay hi̧ mi ɓahri : « Mú hil gi. Mi sɔ́k mu feri ké ɓay laɓu ké fal gaŋ. »

²Sa gelaw mí, Tempuki mgba mi hil si síɓa. Arŋgaw mbay lek ɓa suki ké nunmbam ti̧h nun bi. Nzuk-kaɓ tul arŋgaw mbay ra ƴo ri.

³Nzuk-kaɓ tul arŋgaw ra, mun ye ndu̧y mber mber kandɔk ndu̧yna kasaw zaspe ke sardi kaŋ. Ŋgaburmandi teh yerere kandɔk tehna kasaw emeroɗ kaŋ, vbeh ɗoŋ arŋgaw mbay ra gbuk[14].

⁴Arŋgaw bon seɗe falu niŋ ɗoŋ arŋgaw mbay ra. Ŋgernzukri bon seɗe falu niŋ kaɓ tulu[15]. Ku ndoh gay mbay a puki. Guɓatul woyri ɓa lari lɔr.

⁵Sakna mbam ti̧h, nduhna mbam ke pomna mbam mgbe ké arŋgaw mbay ra. Ké fál pol arŋgaw mbay ba, lampe toŋndɔk say mgbe hɔrɔ ɓa Tem Ŋgerzah ké kehr ɓa gel toŋndɔk say.

⁶Ké fál pol arŋgaw mbay ra ba, gel na ta̧y ta̧y kandɔk mahmbih ké eŋ kristal ver a puki[16]. Ké fál ɓilu ɗih ya ke arŋgaw mbay ra, sam fe ɔknari niŋ ɗoŋ ri. Fál pol woyri ke fal woyri mbah nzuturu ɓa nun.

⁷Sam fe ɔkna a titilu eŋ mbaki, a seɗe-u eŋ gun bahnday. Sam fe ɔkna a sayu, fál nun ye eŋ nzuk pirmatul, a niŋu eŋ ŋgíŋ ké ƴo tul zona.

⁸Gbam woyri ku ƴo ke ta̧y tɔtɔklɔ tɔtɔklɔ. Nunri mbah ta̧yri-aw nzuturu ɓilu ke falu gbam. Kpatara suŋ ke seh, ku ƴo ɗi siŋ kandɔkay : Nzuk lawpuki, Nzuk lawpuki, Nzuk lawpuki, Ŋgerzah, Gaŋ tul feri riw, Nzuk huhrumun a luki, A ye, ke ƴo ri lewsa̧, ke ƴo ri aŋay, ke ƴo gina pi.

⁹Gelke sam fe ɔknari ké niŋ ra el ke tumbɔl dim Ŋgɔhnzuk ké kaɓ tul arŋgaw mbay sew ke sew ra, ku pir ni, ku loŋ riŋ ɗina ye dale, ŋgernzukri ké bon seɗe falu niŋ ra guɓ siɓa ké pol ye ké-e kaɓ tul arŋgaw mbay ra. Ku dim Ŋgɔhnzuk ké ƴo ri sew ke sew, mí ku lu guɓatul woyri ku̧ siɓa ké pol arŋgaw ra ɓahri se :

¹¹Gaŋ tul feri riw, Ŋgerzah wah, mu ma-mah. Riŋ wo mbew yaŋ mgbe-mgbe mí ƴo ke ŋgerna, mah pirna, ɓay fe le, a wo mú-u laɓ feri gbam. Mu hi̧ niri ku ti̧h, ɓa law sana wo, ku ƴo gaŋ ba.