Read Karang Mbete Ten sa̧wɓay 5 Bible Online

Mbete Ten sa̧wɓay 5 - Karang bible

Mbete Ten sa̧wɓay 5

¹Mi ko mbete ké ndɔk lakna Nzuk-kaɓ tul arŋgaw mbay ra. Ɓilu ke falu mbah ke fe vbehna, mí ku ri̧h mbete-u dȩɗ dȩɗ ke mbaka fal hani fal hani gel toŋndɔk say.

²Mi ko ŋgertem nzak pihna. Ke ka-kah ɓeleŋ ɓeleŋ ɓahri : « A ge mí mah nzohlo mbaka-ayri el mgbur mbete-u le ? »

³Mí nzuk hani ké nunmbam, ké tusiɓa, ké puh záhri kara mah mgbur mbete-u ya, mah ko ɓilu ya.

⁴Mi vuh rew dororo dororo ɓay fe le, nzuk a hani mbew ké mah mgbur mbete-u ta-a, ké mah ko ɓilu kara ta-a pi.

⁵Mí nzuk mbew ké sakra ŋgereri ké bon seɗe falu niŋ ra, ɓah hi̧ mi ɓahri : « Za̧h, mú vuh ya. Mú ko. Gun zih Daviɗ mbay a luki[17], a ye mbaki sa̧w Zuda[18], ke ɓa gaɗa wara, mí ke mah nzohlo mbaka-awri, ke mah mgbur mbete-u. »

⁶Bale mi ko ɓa gun sami ké ƴo arŋgaw mbay ra. Ke ƴo haŋsekle sam fe ɔknari ké niŋ ra ke ŋgernzukri ké bon seɗe falu niŋ ra. Mun ye na kandɔk fe puhna kú-u vbeh, ti̧w ye ɓa toŋndɔk say, nun ye ɓa toŋndɔk say pi, mí ɓa Tempuki Ŋgerzah ké kehr ɓa gel toŋndɔk say ké-e pih si tusiɓa gbam.

⁷Mí gun sami ra gi ya̧ mbete ké ndɔk lakna Nzuk-kaɓ tul arŋgaw.

⁸Ke ya̧ mbete ra bale, sam fe ɔknari ké niŋaw ke ŋgernzukri ké bon seɗe falu niŋ ra guɓ siɓa ké pol gun sami ra. Ku mgba nzaŋa sal, ku mgba ŋgoro lari lɔr ké hɔrɔ rekna kpuh mí suh ɗuh duk duk. Suh hɔrɔ-u fu̧ Ŋgerzah buy buy ɓa goŋna sa̧wnzuk ye.

⁹Mí ku ten siŋ pirna a foyu, mí ku ɗi kandɔkay : « A wo ke hȩk wo, mí mu mah ya̧ mbete ra, mu mah nzohlo mbaka-uri pi, ɓay fe le, ku vbeh mu, mí sem wo uh puh mbɔl hul ké tul nzukri mí el niri hi̧ Ŋgerzah ɓa nzuk yeri, mu lu niri ké sakra sa̧wkaniri, nzak ɓay ɓahnari, sa̧wnzuk Izarayel pi, sa̧wnzuk a ɓoruri, gbam pi.

¹⁰Mu laɓ niri na ɓa puh lakna Ŋgerzah wah, mu laɓ niri ɓa nzuk kani Ŋgerzah pi, mí ku él lak mbay ké tusiɓa. »

¹¹Mí mi ko daɓa tem nzak pihnari ɗoŋ arŋgaw mbay ra ke sam fe ɔknari ké niŋ ke ŋgernzukri ké bon seɗe falu niŋ pi. Tul woyri kal fe ki̧na sɔɗ sɔɗ boh gel sɔɗ sɔɗ boh (1.000.000) ka-kal mí el ka-kal ra ɓáy. Mi lah tiri woyri.

¹²Ku ɗi siŋ gbaw gbaw ɓahri : « Gunsami kú-u vbeh ra, a ye mbew yaŋ mí mah ŋgerna, fe ziŋna, ru̧na, huhrumun, pirna, riŋ ɗina, dimna, gbam ma-mah. »

¹³Bale feri gbam ké Ŋgerzah laɓ ké nunmbam, ké tusiɓa, ké puh záhri, ké mahmbih, feri-aw gbam, mi lah niri, ku ɗi siŋ ɓahri : « Mgbɔkɔ, pirna, riŋ ɗina, lák mbay ɓa nzuku a Nzuk-kaɓ tul arŋgaw mbay ke gun sami sew ke sew ɓa ŋgɔh. »

¹⁴Gelke sam fe ɔknari ké niŋ ra yih « Gelu munu », ŋgernzukri ké bon seɗe falu niŋ ba, guɓ siɓa dim ni.