Read Karang Mbete Ten sa̧wɓay 6 Bible Online

Mbete Ten sa̧wɓay 6 - Karang bible

Mbete Ten sa̧wɓay 6

¹Mi ko gun sami ra nzohlo mbaka a titilu bale, mi lah kusol mbew mgbe ké sakra sam fe ɔknari ké niŋ ra kpa̧y kandɔk pomna mbam ɓahri : « Ti̧h ! »

²Mí mi ko ɗeŋe a puki ti̧h nun bi. Nzuk-kaɓ tulu mgba kpuhgoh, ku hi̧ ni guɓatul-haw ŋgermu, mí ke tɔr si haw ŋgermu le, ke el haw ŋgermu ra ɓáy.

³Ke nzohlo mbaka a seɗe-u bale, mi lah kusol sam fe ɔkna a seɗe-u ɓahri : « Ti̧h ! »

⁴Mí ɗeŋe a ɓoru ti̧h ɓa si̧h-u mba̧w mba̧w, ku hi̧ baw mahwu̧y hi̧ nzuk-kaɓ tulu, mí ke tɔr si lu ɗeŋ ké tusiɓa ma fal hi̧ nzukri ɓá i haniri ɓáy.

⁵Ke nzohlo mbaka a sayu bale, mi lah kusol sam fe ɔkna a sayu ɓahri : « Ti̧h ! » Mí mi ko ɗeŋe a piri-u ti̧h. Nzuk-kaɓ tulu mgba ŋgoro-leh fe ké ndɔk ye.

⁶Mi lah kusol ur ké sakra sam fe ɔknari ké niŋ ra ɓah hi̧ nzuk-kaɓ tul ɗeŋe ra ɓahri : « Suy lari ŋgoro naŋ mbew hil mah lari pihna nam mbew. Suy lari ŋgoro mo̧ke say hil mah lari pihna nam mbew, mí num ke yim viyȩh ba, suy lari-u ɓá sɔɓ ya. »

⁷Ke nzohlo mbaka a niŋu bale, mi lah kusol sam fe ɔkna a niŋu ɓahri : « Ti̧h ! »

⁸Mí mi ko ɗeŋe a ké pu hoh ti̧h. Nzuk-kaɓ tulu, riŋ ye ɓa Hul, mí nzuk a ɓoru dih fal ye, riŋ ye ɓa Puhzáh. Nzuk-kaɓ tul ɗeŋe ra ziŋ ŋgerna-i nzuk tusiɓa mbew mbew ké haŋsekle nzukri niŋ niŋ ke mahwu̧y ke ɗaka ke sena ke nay kpahri.

⁹Ke nzohlo mbaka a ndiɓi-u bale, mi ko nzukri. Mi ko niri ƴo huh gel kani Ŋgerzah, sem woyri ku̧ ri. Nzuk tukalari vbeh niri ɓayu kú-u ƴo tul ɓay Ŋgerzah, ketina woyri te-teh ɓay ye.

¹⁰Nzukri kú-u i ra vba̧ nzak ɓa mgbe-u ɓahri : « Gaŋ tul feri riw, a wo nzuk lawpuki, mu ɓa Ketina. Nam a suŋ mú-u kuŋ salɓay kan tul nzuk tukalari ra le ? Nam a suŋ mú-u dal baa hul wah-ay ra le ? »

¹¹Ku ndoh a ge ge le, mah gar a puki puki. Ke el ɓah hi̧ niri ɓahri, kú geŋ tɔɓ ɓáy, hi̧ tɔr bɔh pihna woyri, a woyri yi̧n woyri ké ɓay ziŋ hul kandɔk a woyri, kú i niri ɔh.

¹²Ke nzohlo mbaka a tɔtɔklɔ-u bale, mi ko tusiɓa gbam laŋ yik yik, seh sɔɓ sih ndiŋ ndiŋ, few ba, si̧h dororo kandɔk sem,

¹³gunwu̧y nunmbamri ga̧y raɓ raɓ ku̧ tusiɓa kandɔk lehna nzu̧y ké ga̧y ɓay kuna a bawu ké laŋ kpuh-u.

¹⁴Nunmbam zi kandɔk kpɔɓrɔ kú-u kah. Tusiɓari ké ƴo haŋsekle mahmbih gbam loh ke gel ƴona woyri, kasaw a gaŋuri kara loh pi.

¹⁵Mbayri ké tusiɓa, nzuk riŋ ɗinari, ŋgernzuk sozeri, nzuk fe ziŋnari, nzuk huhrumunri, mgbalri ke nzuk a garuri, nzuk tukalari gbam, mu̧h mun woyri ɓil hoh kasawri ke huh tah kasawri.

¹⁶Ku ɓah hi̧ kasawri ke hereŋri : « Í mu̧h na ké nun Nzuk-kaɓ tul arŋgaw. Í ga̧y ku̧ tul wah. Í mu̧h na ɓay law fa̧hna gun sami pi, ɓay fe le baw nam law fa̧hna woyri ké ɓay toh tul nzuk tukalari ka̧h da. A ge mí mah ƴo pol woyri ɓáy le wo ? »