Read Karang Mbete Ten sa̧wɓay 7 Bible Online

Mbete Ten sa̧wɓay 7 - Karang bible

Mbete Ten sa̧wɓay 7

¹Mí-i el ko tem nzak pihnari niŋ pi. Ku ƴo ké ti̧w tusiɓa niŋ gbam. Ku gboh kuna ɓá ku ké tusiɓa ya, ɓá ku ké tul mahmbih ya, ɓá ku ké tul kpuhri ya.

²Mi ko tem nzak pihna a ɓoru ur ké fál tí̧h seh. Ke mgba fe ɓay vbeh zezele fe Ŋgerzah Ŋgɔhnzuk. Ke vba̧ nzak ɓeleŋ hi̧ tem nzak pihnari ké niŋ ra, a woyri kú-u ziŋ ŋgerna-ɓeɓ tusiɓa pi, ŋgerna-gbur mahmbih pi.

³Ke ɓahri : « Í ɓeɓ tusiɓa ya, í gbur mahmbih ya, í haw kpuhri ya. Náh vbeh zezele Ŋgerzah wah ku̧ nzakpol gun yeri pol dara ɓáy. »

⁴Mi lah ŋgi̧na nzukri ké tem nzak pihna vbeh zezele ku̧ nzakpol woyri ra, laɓ sɔɗ sɔɗ boh gel boh falu seɗe ɓa gel boh falu seɗe (12.000 x 12 = 144.000) ké mi̧hri gun Izarayelri-ay gbam :

⁵Sɔɗ sɔɗ boh gel boh falu seɗe (12.000) ké fál nzak ndɔk Zuda, sɔɗ sɔɗ boh gel boh falu seɗe (12.000) ké fál nzak ndɔk Ruben, sɔɗ sɔɗ boh gel boh falu seɗe (12.000) ké fál nzak ndɔk Gaɗ, sɔɗ sɔɗ boh gel boh falu seɗe (12.000) ké fál nzak ndɔk Aser, sɔɗ sɔɗ boh gel boh falu seɗe (12.000) ké fál nzak ndɔk Naɓtali, sɔɗ sɔɗ boh gel boh falu seɗe (12.000) ké fál nzak ndɔk Manase, sɔɗ sɔɗ boh gel boh falu seɗe (12.000) ké fál nzak ndɔk Simiyoŋ, sɔɗ sɔɗ boh gel boh falu seɗe (12.000) ké fál nzak ndɔk Levi, sɔɗ sɔɗ boh gel boh falu seɗe (12.000) ké fál nzak ndɔk Isakar, sɔɗ sɔɗ boh gel boh falu seɗe (12.000) ké fál nzak ndɔk Zabuloŋ, sɔɗ sɔɗ boh gel boh falu seɗe (12.000) ké fál nzak ndɔk Zezeɓ, sɔɗ sɔɗ boh gel boh falu seɗe (12.000) ké fál nzak ndɔk Benzameh[19]. A woyri-ay mí ziŋ zezele fe Ŋgerzah kan nzakpol woyri.

⁹Kaŋ mí-i el ko ŋgi̧na nzukri-aw ɓa daɓa ho̧ko ho̧ko ké mah ki̧na ya ti̧h nun bi. A woyri-aw ku ur ké haŋsekle sa̧wnzuk Izarayel ke sa̧wnzuk a ɓoruri ke sa̧wkaniri ke nzak ɓay ɓahnari ɓoɗ ɓoɗ gbam. Ku ƴo pol arŋgaw mbay ke pol gun sami. Ku ndoh mah gar a puki. Ku mgba gay ké ndɔk woyri gbiri gbiri.

¹⁰Ku vba̧ nzak ma síɓa ɓeleŋ ɓeleŋ ɓahri : « Sa̧w-ya̧ nzuk ɓa nzuku a Ŋgerzah wah a ye ké kaɓ tul arŋgaw mbay, sa̧w-ya̧ nzuk ɓa nzuku a gun sami mbew yaŋ. »

¹¹Tem nzak pihnari gbam ɗoŋ arŋgaw ra ke ŋgernzukri ké bon seɗe falu niŋ ke sam fe ɔknari ké niŋ ra, ku guɓ siɓa gba̧y ké pol Ŋgerzah. Ku mbu̧h nzak ziŋ daɓa nzukri-aw ɓahri : « Gelu munu. Mgbɔkɔ, riŋ ɗina, ru̧na, tumbɔl, pirna, ŋgerna, huhrumun ɓa nzuku a Ŋgerzah sew ke sew ɓa ŋgɔh, gelu gaŋ. »

¹³Mí ŋgernzuk mbew ké sakra ŋgernzukri ké bon seɗe falu niŋ ra gi vbi mi ɓahri se : « Nzukri ké ndoh mah gar a puki da-aw, ku ɓa geri ? Ku ur ke fál suŋ ? »

¹⁴Mi yih nzak ye ɓahri : « Ŋgernzuk, a woiri mí i tu. » Ke sɔk mi ɓahri : « A woyri-aw, ku su̧h law ɓil koseh tukala a mbamba-u, mí ku ti̧h ɓilu ɓa suki. Sem gun sami ké ɓa fe puhna, mí ku wɔk mah gar woyri keni pu kpa̧h kpa̧h. »

¹⁵Sa̧wu mí ku ƴo pol arŋgaw Ŋgerzah ƴo dim ni suŋ ke seh ɓil gel ƴona ye. Nzuk-kaɓ tul arŋgaw ra, ya̧ niri kaɓ huh bohro ye.

¹⁶Ɗaka ke kɔkmbih ta i niri mba. Zaŋna seh ke gel zaŋna ta ziŋ niri mba pi ɓay fe le, gun sami ké ƴo haŋsekle arŋgaw ra ɓa nzuk-hɔl niri, ke nda pol woyri maŋ niri si nzo mbihlaw ɔkna. Ŋgerzah ba, tak mbihnun gbam ké nun woyri.