Read Karang Mbete Ten sa̧wɓay 8 Bible Online

Mbete Ten sa̧wɓay 8 - Karang bible

Mbete Ten sa̧wɓay 8

¹Gunsami nzohlo mbaka a toŋndɔk sayu dale, gel tuk kelek ké nunmbam laɓ gun sa̧wseh bon say.

²Mi ko tem nzak pihnari toŋndɔk say ƴo pol Ŋgerzah ti̧h nun bi. Ku hi̧ niri baw ti̧w ulna ɓa toŋndɔk say.

³Tem nzak pihna a ɓoru gi ƴo ké gel kani Ŋgerzah. Ke mgba ŋgoro lari lɔr ɓay nzuh rekna kpuh. Ku mbu̧h rekna kpuh ɓa ŋgi̧-u mbah ɓil ŋgoro ye ɓay ké nzuh mí mbu̧h ke goŋnari ké sa̧wnzuk Ŋgerzah goŋ si ma gel kani ké na pol arŋgaw mbay ra.

⁴Suh rekna kpuh ké ndɔk tem nzak pihna ra ɗuh mí hil si pol Ŋgerzah mí mbu̧h ke goŋnari ké sa̧wnzuk ye goŋ.

⁵Tem nzak pihna el fa̧h hɔrɔ ra ɓáy ké gel kani mbah ŋgoro lari lɔr ra tuɓ tuɓ, ke vbu toh tusiɓa bale, mbam sak yela yela, mbam pom kpa̧y kpa̧y, mbam nduh rik rik, tusiɓa laŋ yik yik.

⁶Mí tem nzak pihnari ké toŋndɔk say, ké mgba baw ti̧w toŋndɔk say ra, lek mun woyri ɓay ulu.

⁷Mí tem nzak pihna a titilu ul baw ti̧w ye gbururu gbururu bale, sa̧ri ke hɔrɔ zukru ke sem ga̧y ku̧ tusiɓa, mí haŋsekle gel tusiɓari say say, mbew mbew lu hɔrɔ se kum kum. Haŋsekle kpuhri say say, mbew mbew lu hɔrɔ se kum kum. Suy a pa̧-u gbam lu hɔrɔ se kum kum pi.

⁸Tem nzak pihna a seɗe-u ul baw ti̧w ye gbururu gbururu bale, fe eŋ hani ke kasaw a gaŋu ké mgbe hɔrɔ toh ma ɓil mahmbih, mí mahmbihri gbam ké tusiɓa haŋsekle mahmbih say say, mbew mbew sɔɓ si̧h dororo dororo ɓa sem.

⁹Feri gbam ɓil mahmbih, haŋsekle feri say say, mbew mbew hu. Haŋsekle kumbon, a bawuri ke a gunuri gbam, say say, mbew mbew riŋ.

¹⁰Tem nzak pihna a sayu ul baw ti̧w ye gbururu gbururu bale, baw gunwu̧y nunmbam ké mgbe hɔrɔ bilam bilam toh ke nunmbam. Riŋ gunwu̧y nunmbam ra ɓa Zuŋna. Ke toh ɓu ɓil mbihlawri ke nduhri, mí haŋsekle mbih say say, mbew mbew sɔɓ zuŋ mbak mbak. Nzukri hu mburuk mburuk ɓay mbih ké sɔɓ ɓa pom.

¹²Tem nzak pihna a niŋu ul baw ti̧w ye gbururu gbururu bale, seh, few, gunwu̧y nunmbamri zi ŋgerna-teh gel woyri ndi̧-ndi̧. Ŋgerna-teh gel woyri kehr gel say say, mbew mbew zi. Kaŋ mí ŋgerna-teh gel ke se-seh ke suŋ el fal.

¹³Dale mi ko ŋgíŋ ƴo ha̧rma ké síɓa. Mi lah ŋgíŋ ra vuh ɓa mgbe-u ɓahri : « Kúy ! Kúy ! Kúy ! Seh ké tɔr tem nzak pihna a sayuri-aw ul baw ti̧w woyri le, koseh a luki ɓay ziŋ nzuk tukalari. »