Read Karang Mbete Ten sa̧wɓay 9 Bible Online

Mbete Ten sa̧wɓay 9 - Karang bible

Mbete Ten sa̧wɓay 9

¹Tem nzak pihna a ndiɓi-u ul baw ti̧w ye gbururu gbururu bale, mi ko gunwu̧y nunmbam ké tusiɓa. Ke to-toh. Lakele nzak lɔkɔ a ɗih-u sa̧rara na ndɔk ye.

²Gunwu̧y nunmbam ra mgbur nzak lɔkɔ-aw, mí suh hɔrɔ ɗuh ké ri duk duk kandɔk suh hɔrɔ ɓaw[20] kaŋ, nunmbam ke seh el sih nduŋ.

³Zehleri ti̧h ké ɓil suh hɔrɔ ra ya̧ tusiɓa liɓ liɓ. Ku ziŋ ŋgerna-ndo fe kandɔk nday kaŋ.

⁴Ku sɔk niri ɓahri, kú ɓeɓ suyri ya, fe payri ya, kpuhri ya pi. Wara le, nzukri ké dan zezele Ŋgerzah ké nzakpol woyri, mí kú laɓ niri koseh.

⁵Ku hi̧ zehleri ra ful í nzukri ya. Le ku hi̧ niri ku laɓ nzukri koseh mah few ndiɓi. Ndona woyri-aw se mah hani ke ndona nday kaŋ.

⁶Ké ɓil few ndiɓi-aw, nzukri yih hul, mí ziŋ ya. Ku tásol ɓay hu-u, mí hul ba, ɗuk ɓa ɗih-u ké ta̧w woyri.

⁷Mun zehleri ra ba mun ɗeŋe ku-u mbar ke fe ŋgermuri kaŋ. Guɓatul-haw ŋgermu ndu̧y ké tul woyri kandɔk lari lɔr. Fál nun woyri eŋ nun nzuk.

⁸Pirmatul woyri sa kandɔk pirmatul wu̧ynzuk. Sel woyri eŋ sel mbaki.

⁹Haŋ woyri ƴo ke ŋgaŋ lari yéŋ mun woyri. Tiri ta̧y woyri mgbe giriri giriri eŋ tiri daɓa ɗeŋeri ké takra ɓay si ma ŋgermu kaŋ.

¹⁰Nzak sa̧w woyri na sȩreɗ kandɔk sa̧w nday. Sa̧w woyri-aw mí ɓa ŋgerna woyri, ku laɓ nzukri koseh keni few ndiɓi.

¹¹Ku ƴo ke mbay tul woyri, a ye tem nzak pihna lɔkɔ a ɗih-u sa̧rara ra. Riŋ ye ke nzak ebere ɓa Abadoŋ, ke nzak gerek ba, ɓa Apoliyoŋ, sɔk ɓahri, ɓeɓna.

¹²Koseh a titilu le, kal da, mí tɔr kosehri toŋ seɗe ƴo gina ɓáy.

¹³Tem nzak pihna a tɔtɔklɔ-u ul baw ti̧w ye gbururu gbururu bale, mi lah kusol mgbe ké ti̧w gelri niŋ ké ti̧h ke gel kú-u mboh ke lari lɔr ɓa gel-nzuh rekna kpuh ké pol Ŋgerzah.

¹⁴Kusol ra sɔk tem nzak pihna a tɔtɔklɔ-u ké mgba baw ti̧w ra ɓahri : « Mú sel tem nzak pihnari ké niŋ kú-u mbih niri sa mahmbih Efaraɗ. »

¹⁵Bale ku sel tem nzak pihnari ké niŋ kú-u mbih niri ra geŋ sa̧wseh-u, namu, fewu ke mbihmbamu ɓay hi̧ kú i nzukri. Haŋsekle nzukri say say le, ku i nzuk mbew mbew.

¹⁶Soze-kaɓ tul ɗeŋeri ƴo ri. Ku sɔk mi ŋgi̧na woyri ɓa miliyoŋ sɔɗ sɔɗ seɗe (200.000.000), mí-i lah.

¹⁷Mi ko ɗeŋeri ti̧h nun bi, mi el ko nzuk-kaɓ tuluri pi. Haŋ woyri ƴo ke ŋgaŋ-yeŋ mun woyri mí si̧h wuh kandɔk hɔrɔ, pu hoh kandɔk suh hɔrɔ, si̧h ɓa mun gbahla kandɔk kasaw-lu hɔrɔ. Tul ɗeŋeri ba, eŋ hani ke tul mbaki. Hɔrɔ, suh hɔrɔ, som kasaw-lu hɔrɔ ti̧h wulam wulam ké haw woyri ɓa vba̧na say.

¹⁸Vba̧na ké ti̧h ke haw ɗeŋeri ɓa say ra mí i nzukri. Haŋsekle nzukri say say le, nzuk mbew mbew hu.

¹⁹Ŋgerna ɗeŋeri-aw na ɓil haw woyri ke sa̧w woyri. Sa̧w woyri eŋ hani ke soy, mí ku laɓ nzukri koseh keni.

²⁰Mí nzuk a ɓoruri ké vba̧nari-aw i niri ya ra, ku sa mbi law woyri ké tul záh woyri ma fal ya. Ku toŋ dim záh woyri mgbum. Ku dim fe záh woyri kú-u mboh ke lari lɔr, ke lari a puki, ke lari a si̧h-u mini ku dim fe záh woyri kú-u fel ke kpuh, ke kasaw. Mí fe záh woyri-aw ko kona ya, lah ɓay ya, si sina ya pi.

²¹Nzukri-aw, ku sa poŋ i haniri ya, laɓ sa̧wkpuh ya, ku sa poŋ laɓ nunpuki ya, ku sa poŋ riɓa ya pi.