Read Karbi KECHENG 11 Bible Online

KECHENG 11 - Karbi bible

KECHENG 11

¹Kechengsi, pirthe adang kedo-an arat atum alam-aki isinat lapen isinat alamthe-heihei si ningjepet-lo.

²Latum nihang anat dam bomsi, latum Bebilon athoi along nanglelo lapen hadak dodamlo.

³Latum lahin lahin chepulo, “Vangnon! Eli ita selam lonang lapen lahei pherang-pame lonang.” Lasonsi latum kekimji aphan ita dolo lapen lahei kerakji aphan ingchin arrita dolo.

⁴Latum pulo, “Non eli isi sining-inghun kelerok ahemchardon arongsopi kimlonang, anke etum emethang amen pado thekpo lapen pirthe adang bithe-bitha pratsei nangnelo.”

⁵Anke rongsopi kelangjisi HEMPHU nanghirlo lapen halahei amonit atum kekim ahemchardon langsi,

⁶Alangli pulo, “Non lahei arat kedo-an latum isinat alam si ningjelo; lake latum keklemji akam kechengsi lo. Latum keklemji aning kehang aling pachun-dapprangpo.

⁷Eli damra latum alam paprek et-lonang, anke latum lahin lahin charju thekthe detpo.”

⁸Lasonsi latum aphan HEMPHU pirthe adang bithe papratseilo, lapen latum rongsopi kekim sangkok-lo.

⁹Laso arongsopi Bebilon pulo, pima hadaksi HEMPHU arat kedo-an alam paprekjam lo, lapen hadak pensi Alangli latum aphan pirthe adang bithe papratseilo.

¹⁰Shem aso-asu atum lahei helo. Langthepi ningkan hini aphi Shem ningkan 100 kepleng ahut, alangli inut asopo dolo, lake Arpakhshad.

¹¹Laso aphi alangli ningkan 500 reng-lo, lapen akaprek asomar dolo.

¹²Arpakhshad ningkan 35 arta ahut, alangli inut asopo do lo, la Shelah;

¹³laso aphi alangli 403 aningkan reng-lo lapen asomar dolo.

¹⁴Shelah arta ningkan 30 ahut, alangli sopo inut Eber dolo:

¹⁵laso aphi alangli ta ningkan 403 reng-lo lapen asomar dolo.

¹⁶Eber arta ningkan 35 ahut alangli sopo inut Peleg dolo;

¹⁷laso aphi alangli ningkan 430 reng-lo lapen asomar dolo.

¹⁸Peleg arta ningkan 30 ahut, alangli sopo inut Reu dolo,

¹⁹laso aphi alangli 209 reng-lo lapen asomar dolo.

²⁰Reu arta ningkan 30 ahut, alangli inut asopo dolo, la Serug lo;

²¹laso aphi alangli ningkan 207 reng-lo lapen asomar dolo.

²²Serug arta ningkan 30 ahut, alangli sopo inut. Nahor dolo,

²³laso aphi alangli ningkan 200 reng-lo lapen asomar dolo.

²⁴Nahor arta ningkan 29 ahut alangli sopo inut Terah dolo,

²⁵laso aphi alangli ningkan 119 reng-lo lapen asomar dolo.

²⁶Terah arta ningkan 70 aphi, alangli Abram, Nahor lapen Haran apo plang-lo.

²⁷Terah aso-asu lahei helo, alangli Abram, Nahor lapen Haran apolo. Haran ke Lot apolo,

²⁸lapen Haran arongsopi methang Ur along si amek chilo, la Bebilon adet, halaso ahut apo reng-et-lang.

²⁹Abram ke Sarai aphan pangrilo, lapen Nahor ta Milkah, la Haran asopi aphan enlo, Haran ke Iskah apolo.

³⁰Sarai ke aso chepado un-e det-lo.

³¹Terah ke asopo Abram aphan, asupo Lot lake Haran asopo, lapen amunpi Sarai lake Abram apiso aphan cheponsi Kanaan adet kedamjisi Bebilon adet Ur arongsopi otekangbub-lo. Latum un an ha Haran an damsi hadak latum dodamlo.

³²Terah arta ningkan 205 ahut alangli thi-lo.