Read Karbi KECHENG 12 Bible Online

KECHENG 12 - Karbi bible

KECHENG 12

¹Abram aphan HEMPHU pulo, “Nangdet, nangdon-nangrap, lapen nangpo ahem che-onon lapen Ne nangphan nang-kepaklangji adet-le damnon.

²Nangphan Ne ongdung nangso-nangsu nangpiji, lapen latum isi thedung akhei plangpo. Ne nangphan pahirme po lapen nangmen pachethang phlup po, anke nang isi ahirjume plangpo.

³Nangphan kepahirjume aling abangphan Ne pahirjume ji, Bonta nangphan kepahirjuno aling abang aphan Ne pahirjunoji. Lapen nang pen ajok Ne kadokave akhei aphan pahirmepo.”

⁴Abram arta ningkan 75 ahut, alangli Haran pen barsi, HEMPHU alangliphan kepaklemtoi ateng, Lot ta alanglilong dunlo.

⁵Abram apiso Sarai, lapen akorte asopo Lot, lapen akhi kedo-an lapen Haran along kelong aban atum an ta la cheponlo, lapen Kanaan adet aphan latum barlo. Latum Kanaan nanglesi,

⁶Moreh athengpi kangthir, Shekem along kangthir adim nangleletik Abram det adang bithe damlo. (Halaso ahut Kanaan aso atum det arlo dobomlang.)

⁷Abram aphan HEMPHU cheklang si alangphan pulo, “Nangso-nangsu aphan Ne kepiji alongle la helo.” Anke Abram aphan kecheklang a-HEMPHU aphan alangli hadak isi adovan buipilo.

⁸Laso aphi, alangli nitur anglong akeng-ri Bethel arongsopi anihang anat alangli damlo lapen hadak nichi ke Bethel lapen nihang ke Ai angbong si alangli mukam chekimlo. Hadak ta alangli isi adovan buisi HEMPHU aphan archolo.

⁹Anke alangli adim pen adim dambomsi Kanaan angbong anitur anat lelo.

¹⁰Bonta Kanaan along akhim thurlo, lapen lapu-an hingnolo Abram ha Ijip anitur anat malomso kedodamji aphan damlo.

¹¹Alangli Ijip ahoi kehatji dokdok ahut, alangli piso Sarai aphan pulo, “Nang ke inut kelangmepik a-arloso lo.

¹²Ijip aso atum nangphan nangthek-long lote nang nepisolo pu latum mathapo, lapen latum nephan pathilotsi lapen nangphan ke nang-pareng-longpo.

¹³Halatum aphan thannon nang ke ne ingjirpilo; anke nangpen apot latum nephan pareng-longpo lapen nelang pamepo.”

¹⁴Alangli Ijip ahoi hat det aphi, alangli piso arje langmepik la Ijip aso atum thek-long-lo.

¹⁵Ajehak kangdai a-saikhi atum bangpi aphan thek-longsi, bangpi arje kelangme alam recho aphan thanlo, lasi bangpi aphan rechohem pondet-lo.

¹⁶Bangpi pen apot Abram aphan recho kelang pamepik lo lapen alangli phan biresak api ahur pilo, lapen bi, chainong, gadha, ban atum lapen ka-ut ta pilo.

¹⁷Bonta Sarai aphan recho pondet-lo, HEMPHU pherememe akeso la aphuthak, lapen rechohem arat atum aphuthak pavang-lo.

¹⁸Anke Abram aphan recho pahang-lo lapen arjulo, “Nangli neliphan kopi si keklempor-loma? Kopi athesi bangpi ke nanglipiso lo pu nekethanthe det-loma?

¹⁹Bangpi ke nang-ingjir lo pu kopisi nephan nekethan ma, pupete ne en-e detji apot-lo? La nangpisolo, bangpi aphan pon ra damnon!”

²⁰Recho alangli monit atum aphan hukum pilo, Abram lapen apiso aphan lapen alangli kechepahemphu amar asontin ta det pen ingtan toijuilo.