Read Karbi KECHENG 13 Bible Online

KECHENG 13 - Karbi bible

KECHENG 13

¹Ijip adet anihang anat Abram barlo ha Kanaan arlo anitur anat apiso lapen alangli kechepahemphu amar asontin ta cheponlo, Lot ta alanglilong dunlo.

²Abram ke inut keplangpik amonit-lo, abiresak, abi, lapen achainong lapen ser, rup ta do.

³Anke alangli hadak osi adim adim dambomlo, ha Bethel anat damlo. Alangli Bethel lapen Ai angbong adim lelo, hadak alangli aphrangta mukam chekimlo,

⁴lapen dovan ta isi builo. Hadak alangli HEMPHU aphan archolo.

⁵Lot ta biresak, bi, chainong do lapen ahem asor lapen aban atum ta do.

⁶Lasi hadak banghini kedorrappetji aphan kepa chopan alongle dorphlup ave, pima latum pi ongpik.

⁷Lasonsi Abram api kevi amonit atum pen Lot api kevi amonit atum kechebohong nangdolo. (Halaso ahut Kanaan aso atum lapen Perizzi aso atum det arlosi dobomlang.)

⁸Anke Lot aphan Abram pulo, “Etum ke don, lapen nangmonit lapen nemonit atum pachebohong nangne.

⁹Lasi eli chekak lonang. Nang nangning kehang aling alongle chongvainon. Nang ehin anat damnon lapen ne ta ahin kaprek anat dampo.”

¹⁰Lot adung-arei lang-lo, lapen Jordan Arlok kedo-an, Zoar atovar anat an, dorphlup alang do, HEMPHU aberi ason mate Ijip adet ason. (Lake HEMPHU Sodom lapen Gomorrah arongsopi kepavir aphrang-lo.)

¹¹Lasi Lot amethang aphan Jordan Arlok bithe kedo-an cherailo, lapen nihang anat cheterek-lo. Lasonsi banghini amonit atum chekak-lo.

¹²Abram ke Kanaan adetsi dolo, lapen Lot ke arlok arongsopi-heihei angbong dosi Sodom adung mukam chekimlo,

¹³hadak amonit atum hingnopik lapen HEMPHU aphan langplotsi pap klemlo.

¹⁴Lot otekangdet aphi, Abram aphan HEMPHU pulo, “Nang kedo adim pen bithe-bitha lang pamenon.

¹⁵Nang lapen nangso-nangsu aphan nang kethek-long an alongle nangpidetpo, lapen lake nangphan kaike aphan chepahemphu longpo.

¹⁶Ne nangphan lapu-an ke-ongdung nangso-nangsu nangpiji latum aphan baduta lakha un-e detji; pirthe athak asangti aduksi kelakha kejoithuji!

¹⁷Non damra longle adang bithe langdamnon, pima la kedo-an Ne nangphan nangpi detpo.”

¹⁸Lasi Abram amukam cheterek-lo lapen Hebron along Mamre athengpi kangthir adung si dolo, lapen hadak alangli HEMPHU aphan isi adovan builo.