Read Karbi KECHENG 14 Bible Online

KECHENG 14 - Karbi bible

KECHENG 14

¹Recho bangphli, Bebilon adet arecho Amraphel. Ellasar arecho Ariok, Elam recho Chedorlaomer, lapen Goiim arecho Tidal,

²damsi akaprek bangpho arecho atum pen ron chedanlo: Sodom arecho Bera, Gomorrah arecho Birsha, Admah arecho Shinab, Zeboiim arecho Shemeber, lapen Bela arecho (mate Zoar.)

³La bangpho arecho chelangpetsi Siddim Arlok along asong chelangpet-lo, laso adim nonke Kethitang Atalo.

⁴Latum aphan Chedorlaomer si ningkan krehini pangrilo, bonta krekethom aningkan latum alangli be thurlo.

⁵Krephli aningkan Chedorlaomer lapen alangli pen kechelangpet asong vangpak si Rephaim atum aphan Ashteroth Karnaim adim along, Zuzim atum aphan Ham adim along, Emim atum aphan Kiriathaim athoi along,

⁶lapen Hor atum aphan Edom anglongpi-heihei along paremdet-lo, latum aphan ha Elparan asangtimili akung an hungdung-lo.

⁷Anke latum adung arei langsi nang chiruilo, ha Kadesh anat (Enmishpat pusi halaso ahut chethang-lo). Kedo-an adet Amalek atum aphuthak latum haidet-lo, lapen Amor atum aphan paremdet-lo, latum Hazazon Tamar adim si kedo atum lo.

⁸Anke Sodom, Gomorrah, Admah, Zeboiim, lapen Bela arecho atum halatum aron-armu kechedanjisi Siddim Arlok along patebok-lo, lapen,

⁹Elam, Goiim, Bebilon adet arecho, lapen Ellasar, recho bangpho pen ron chedanlo, recho bangpho pen recho bangphli,

¹⁰Arlok hilik-heihei si plengset, lapen Sodom lapen Gomorrah arecho atum ron pen kekatji bor-i ahut latum hilik-heihei arlo jangthot-lo; bonta akaprek bangkethom arecho atum ke ha inglongpi anat katjuilo.

¹¹Bangphli arecho atum Sodom lapen Gomorrah along kedo-an amar pon et-lo, kecho ahormu an ta ponsi kat ponlo.

¹²Abram amu asopo Lot ke Sodom alongsi kedo, lasi latum laphan lapen la amar an ta pondet-lo.

¹³Bonta inut amonit joksi Abram aphan lahei alam an than et-lo, la Ibri, la Mamre along kedo thengpi kangthir adung kedo, la Amor atum kedo ajolo. Mamre lapen la akor Eshkol lapen Aner atum ke Abram pen kechelangpet atumlo.

¹⁴Abram amu asopo aphan bang pondet lo pu arjulongsi, alangli kedo-an ron kechedanthek amonit aphan pangrumsi amukam along hangpet-lo, kadokave 318 amonit lapen ha Dan atovar anat an bangphli arecho atum aphi aphi hungdunlo.

¹⁵Hadak alangli song thaksi hotur aphan ajo tengkheng-lo, lapen latum aphan paremdet-lo. Alangli latum aphan ha Hobah an phlungdunlo, la Damaskas anirep.

¹⁶Lapen kethipontang amar an chelongthu-et-lo. Alangli amu asopo Lot lapen la amar an vanpithu-et-lo, arloso atum lapen akaprek kenep pon amonit atum aphan anta van et-lo.

¹⁷Ron Chedorlaomer lapen akaprek arecho atum aphuthak kehai pen Abram nangkechevoi ahut Shaveh Arlok (Recho arlok pusi chethang) along Sodom arecho alangliphan chetong damlo.

¹⁸Lapen Melkizedok ke Salem arecholo lapen alangli ke inut Kangtuinei Arnam akurusarlo, alangli Abram along him lapen drakha ahorlang vanlo,

¹⁹lapen ahirjume pilo, lapen pulo, “Kangtuinei Arnam, sining lapen pirthe kepinchong abang, Abram aphan pahirmenang!

²⁰Kangtuinei Arnam, nangphan nanghotur aphuthak nangkepahai abang, anong pathenang!” Anke Melkizedok aphan alangli kelongthu kethi pon amar an angbong pen phankep pen ephan pilo.

²¹Sodom arecho Abram aphan pulo, “Kethipon amar an chebinon, nephan nemonit-le nepichotnon.”

²²Abram thak-lo, “Kangtuinei Arnam, HEMPHU amen pen neli semetang-lo, Sining lapen pirthe kepinchong abang amen pen,

²³neli nanglimar isita khangkhe, hon ejeng ta mate keng-op ari ejeng ta en-elo. Anke nangli pu un-elo, ‘Ne si Abram aphan paplang-lo’ pu.

²⁴Nelimethang aphan neli thangnat ta chekhangkhelo. Nelimonit atum kopima ke-en lasi neli ke dengchotpo. Bonta nelilong kechelang dun Aner, Eskol, lapen Mamre, latum apharman pachepon nang.”