Read Karbi KECHENG 17 Bible Online

KECHENG 17 - Karbi bible

KECHENG 17

¹Abram arta ningkan 99 ahut, alangliphan HEMPHU cheklang-lo, lapen pulo, “Ne helo Jakongkethenei a-Arnam lo. Nephan kroinon lapen kaita kopisi kechok ma lale klemnon.

²Nang pen Ne kechejok Aloh pathikpo, lapen ongdung nangso-nangsu nangpipo.”

³Longle papho si Abram angphun tongkilo, lapen Arnam pulo,

⁴“Laso akechejok aloh nangpen Ne chepathik-lo: Nang ke ke-ongdung akhei atum aphusar plangpo pusi Ne chechak-lo.

⁵Nang men Abram pupelo, bonta Abraham pupo, pima nangphan Ne ke-ongdung akhei atum aphusar nangpaplang-lo.

⁶Nangphan Ne ongdung nangso-nangsu nangpipo, latum khei-heihei plangpo.”

⁷“Nangphan lapen nangso-nangsu aphan mo-aphi a-ove-ove anta isi kaike-kedover akechepathik aloh ason Nelamchak chebilo. Ne ke nang Arnam lapen nangso-nangsu atum a-Arnam plangpo.

⁸Non nangkedo bang adet alongle Ne nangphan lapen nangso-nangsu aphan nangpidetpo. Kaike aphan Kanaan alongle adang bithe nangso-nangsu atum chepahemphu longpo, lapen Ne ke latum a-Arnam plangpo.”

⁹Abraham aphan Arnam pulo, “Ne penpen nangta kechechak aloh kekroiji aphan nang chedondun nangpo, nang lapen nangso-nangsu atum anta, mo aphi a-ove-ove anta.

¹⁰Nang lapen nangso-nangsu atum areng-kecherotji aphan nangtum angbong pinso atum an chedon-dunsar nangji.

¹¹Non pen apar pinsomar abangphutin ni nerkep kechok ahut areng-rot nangji, ban aso nanghem mahang kethek atum an, lapen bang adet pen kenamdet aban atum anta.

¹²La pen ajok nang lapen Ne angbong kechejok aloh chepathik-lo pu pachinipo.

¹³Abangphutin ta arengcherot nangji, la ke Ne pen nang angbong kaike kedover akechejok aloh dolo pu kepaklang isi abang angthek.

¹⁴Badu apinso a-oso tame arengkerot-re abang ke Ne rat aso lo pu pupelo, pima alangli Ne pen kechejok aloh chebibe det-lo.”

¹⁵Abraham aphan Arnam pulo, “Nang nangpiso aphan Sarai pu hanglonglelo; pini pen bangpi amen Sarah pupo.

¹⁶Bangpi Ne pahirjumeji, lapen bangpi pen Ne nangphan inut sopo nangpipo. Bangpi aphan Ne pahirjume po, lapen bangpi ke khei atum apei plangpo, lapen bangpi aso-asu pen recho atum plangpo.”

¹⁷Longle paphosi Abraham angphun patongki lo, bonta alangli kematha un ahut la chingnek-lo, “Inut amonit arta ningkan pharo dolote la oso inut longjilangma? Sarah ningkan 90 ahut oso inut long unjilangma?”

¹⁸Alangli Arnam aphan arjulo, “Kopisi Ishmael aphan Nepoton paplangple det-lo?”

¹⁹Bonta Arnam thak-lo, “Kali, nangpiso Sarah nangphan inut pinso a-oso amahang nang pathek pipo lapen laphan nang Isaak pule amen irnon. Alangli pen lapen alangli aso-asu pen Ne kechejok aloh pathikpo kaiketa. La ke isi kejut un-epin akechejok.

²⁰Ishmael aphuthak nang kechoningri alam ne arjulong-lo, la apotsi alangphan ta Ne pahirjumepo lapen ongdung a-osomar lapen aso-asu laphan Ne pipo. La bangkrehini arechoso apo plangpo, lapen la aso-asu isi thedung akhei paplangpo.

²¹Bonta Ne kechejok aloh nangsopo Isaak pensi chebi po, Sarah pen moning nonpu apor mahang kethekji a-oso pen chepathikpo.”

²²Abraham aphan Arnam kethan pajut si, laphan otekangbub-lo.

²³Halaso arni amat Abraham Arnam aphan kroilo, lapen asopo Ishmael lapen akaprek ahem kedo pinso a-osomar atum lapen ahem aban asomar lapen la kenamdet aban asomar atum aphan areng-rot-lo.

²⁴Abraham areng-kecherot ahut alangli arta ningkan 99 dolo,

²⁵lapen asopo Ishmael ke ningkan 13 dolo,

²⁶Latum banghini ta arni isinatsi arengcherot-rappet-lo.

²⁷Abraham aban atum an penpen arengcherot rappet-lo.