Read Karbi KECHENG 18 Bible Online

KECHENG 18 - Karbi bible

KECHENG 18

¹Mamre athengpi kangthir along Abraham aphan HEMPHU cheklang-lo. Kephang-oknei arni apehem ajakan along Abraham kangnilun ahut,

²alangli lang-lo, lapen bangkethom amonit atum karjapding thek-long lo. Halatum aphan alangli thek-long-lok pen, halatum aphan kechetong jisi alangli kat-lo. Longle paphosi alangli angphun patongkilo,

³alangli pulo, “Akehai atum, kanghon pen sangsepin pen nelihem hatpet-ri; nanglitum aphan kangdukjisi neli ladak dolo.

⁴Nanglitum akeng kechamjile neliphan lang pavanlongtha; nanglitum laso athengpi arum sang iktha.

⁵Neli an vanchom lang; nanglitum kedambomji aphan la jakong nangpipo. Nelihem nanglitum kevang pen ajok neliphan nanglitum man pilo, la apotsi nanglitum aphan neli pangduk longtha.” Latum thak-lo, “Nangliphan chorolo, Nelitum deng-lo.”

⁶Abraham apehem arlo chelutdam seraksi Sarah aphan pulo, “Serak-ra nangkemenei ahim aduk thoila isi pen enra ajehak ahim pangdangtha.”

⁷Anke alangli pi ahur anat katsi athu kedo-op achainong aloso enlo, lapen la inut aban aphan pilo, la seraksi sikkoilo.

⁸Alangli ajehak chulang athu, ajehak chulang, lapen ok pon si, monit atum angno bidamlo. Hadak thengpi arum halatum aphan alangli-methangsi ruthailo, lapen latum cholo.

⁹Anke latum alangliphan arjulo, “Nangli piso Sarah konat-lo?” “Bangpi hadak pehem arlosi do,” alangli thak-lo.

¹⁰Latum angbong inut abang pulo, “Nonpen chiklo jonsirkep aphi neli vangthuji, lapen nanglipiso Sarah sopo inut longpo.” Sarah ke alangli nungsi dolo, pehem ajakan along arjuding lo,

¹¹Abraham atum sarpik-lo, lapen Sarah ke arloso-ape ave det-lo.

¹²Lasi Sarah ke amethang chingnek-khuk-lo lapen pulo, “Non ne sarpi tang-lo lapen ningjoinolo, ne pinso-arlo aning kehang akam keklem ningchepajang-thekjilangma? La apar nepenan ta sartang-lo.”

¹³Anke Abraham aphan HEMPHU arjulo, “Kopisi Sarah kangnek-lo, lapen ‘Ne kesar ahut ne oso long-un binongji langma’ pu keningje lo?

¹⁴HEMPHU aphan pine keklem un-e ason doma? Ne putang-lo, non pen chiklo jonsirkep aphi Ne vangthujilang, lapen Sarah sopo inut longpo.”

¹⁵Pima Sarah chepheretang-lo, bangpi la kroimolo. “Neli ingnekne-det ke,” pusi bangpi pulo. Kalang, nangli klemlo, alangli thak-lo. “Nangli ingnek-lo.”

¹⁶Anke bangpo atum osi latum Sodom kechecharphlot adim dodam lo, lapen Abraham ta latum aphan tovar kethondunjisi latum along dunlo.

¹⁷Lapen HEMPHU amethang chepulo, “Ne kopima keklemji akam Abraham aphan patutelo.

¹⁸La aso-asu isi thedung lapen ingtang rak akhei plangpo, lapen alangli pen ajok Ne, khei kedo-an aputhak pahirjumepo.

¹⁹La asomar atum aphan lapen la aso-asu atum Nephan kepakroiji lapen kopisi kechokma lapen ahokpet keklemji aphan hukum kepapijisi Ne laphan ingvailo. Jongsi latum klemlote, Ne la aphan kopima kechechak ason an klem pi-etpo.”

²⁰Anke Abraham aphan HEMPHU pulo, “Sodom lapen Gomorrah aphan kepherememe akebok-heihei do, lapen latum apap thepik-lo.

²¹Lahei akebok Ne karjulongtang an ahok lone ahok-he lone, Ne langdam nangjilang.”

²²Anke banghini amonit damjuilo, bonta HEMPHU ke Abraham along dokok-lo.

²³HEMPHU adung Abraham damsi arjulo, “Nangli ahokpet pen adaikave atum aphan adai-kedo atum penpen pavirdetpoma?

²⁴Rongsopi along jongsi bang 50 adai kave arat do pulote, rongsopi kangthim nangli pavirdetjima? Bang 50 atum aphan kepajokjile nangli la rairedetpoma?

²⁵Chenamsi nangli ke adai-kave atum aphan adai-kedo atum penpen pathi-un-e. Nangli jongsi klemlote adai-kedo atum penpen adai-kave atum anta aduk phodap-po. Lake kaita klem-un-e. Pirthe adang kangsai abang ahokpet pensi ingsai nangji.”

²⁶HEMPHU thak-lo, “Sodom along jongsi bang 50 adai-kave amonit Ne long-lote, halatum pen ajok, Ne rongsopi kangthim pavirve.”

²⁷Abraham ningjethulo, “Neli nangliphan keningje-thuvoiphit apot kanghon pen neli diyanon, HEMPHU. Neli ke monitchot, lapen thangnat ta keningje ji ajakong ave.

²⁸Bonta bang 50 adim bang 45 adai-kave amonit atum do tahaimene ke. Bangpho kavechot pen nangli rongsopi kangthim pavirdet poma?” HEMPHU thak-lo, “Bang 45 adai-kave amonit Ne, long pulote rongsopi Ne pavirve.”

²⁹Abraham ningjethulo, “Jongsi bang 40 amonit dochot pulote kosonlo?” Alangli thak-lo, “Hadak jongsi bang 40 do pulote Ne la pavirve.”

³⁰Abraham pulo, “Kanghon pen nanglining thiri, HEMPHU, bonta neli ningjethuvek nangji, Jongsi hadak bang 30 dokokte kopusonpo?” Alangli pulo, “Ne jongsi bang 30 long-lote la Ne klemkle.”

³¹Abraham pulo, “Kanghon pen nangliphan neli keningjelen apot neli diyatha, HEMPHU, Bisar-alam hadak bang 20 ansi longchot-lo?” Alangli thak-lo, “Bang 2o anbak jongsi Ne long-lote la Ne pavirve.”

³²Abraham pulo, “Kanghonpen ning thi-ik-ri, HEMPHU, neli ephong si lam ningjechotpo. Jongsi bang 10 anbak longchot pulote?” Alangli thak-lo, “Hadak bang 10 anbak do pulote la Ne pavirve.”

³³Abraham pen alangli kechingki pajut si, HEMPHU damjuilo, lapen Abraham ta ahem chevoijuilo.