Read Karbi KECHENG 19 Bible Online

KECHENG 19 - Karbi bible

KECHENG 19

¹Arnikangsam apor banghini Arnam apherangke atum Sodom anat kevang ahut Lot ke rongsopi anghap along si ingnilunlang. Latum aphan alangli kethek-long amat, alangli thur si halatum aphan kechetongji aphan damlo. Halatum angno alangli ingphun patongkilo,

²lapen pulo, “Akehai atum, nanglitum aphan kangdukjisi neli ladaksi dolo. Kanghon pen nanglitum nelihem nangdun non. Nanglitum nangkeng chingroipen ajo sang tame. Adapprang nanglitum thur dapprang-ra, lapen nanglitum atovar chedam ik-tame.” Bonta latum thak-lo, “Kali, Nelitum ladak rongsopi achetai along si ajo pangthangpo.”

³Latum aphan alangli choning-ribomlo, lapen padu latum alangli hem dunjuilo. Aban atum aphan ajehak him kepangdangjisi Lot Hukum pilo lapen alohi atum aphan mesen akecho-kejun pasik-lo. La siktang si, latum la cholo.

⁴Alohi atum amek kejang aphrang, Sodom amonit atum hem kompet lo. Rongsopi pinso amonit atum an, oso lapen akesar ta hadak dopet-lo.

⁵Lot aphan latum hang-lo, lapen arjulo, “Peningve nanglong kesangji amonit atum konat-lo? Latum netum aphan nevanpi-etnon.” Sodom amonit atum latum penpen mek-langno akam kecheklemji pu aning hang-lo.

⁶Lot ingtan barsi inghap ingkirchek-lo, lapen panungthip-lo.

⁷Alangli halatum aphan pulo, “Jirpo atum nanglitum aphan neli nangcho ningrilo, lason mek-langno akam klemri!

⁸Langtha, nelisopimar atum banghini do, latum okarjang saidelang. Latum nanglitum aphan ingtan neli nangvan pidetpo, lapen latum aphan nanglitum kopi ma keklemji nangning kehang aling klemnon. Bonta lahei amonit atum aphan thangnat ta klemri; nehem latum alohi, lapen latum aphan neli raiveknangji.”

⁹Bonta latum pulo, “Netum atovar pen chetereknon, nang bang-adet aso! Netum kopima keklemnangji komat-lo nang netum aphan ne-kethan abang, netum atovar pen chetereknon, kalite latum aphan an sose netum nangphan nangklemji.” Latum Lot aphan aphi ingbaisi inghap kephangnojisi thurpak-lo.

¹⁰Bonta arlo kedo banghini amonit atum Lot aphan arlo pen santhorsi inghap ingkirthip-lo.

¹¹Anke latum kedo-an amonit aphan amek pave-et-lo, anke latum inghap thek-longle det-lo.

¹²Banghini amonit atum Lot aphan pulo, “Ladak jongsi nangsomar, nangsopimar, nang osa, mate rongsopi along mane nangdon nangrap do pulote, latum aphan ladak pen padamnon,

¹³pima laso adim netum pavirpo. Lahei arat aphuthak kepherememe kebok alam HEMPHU arjulongtang-lo lapen Sodom kepavirji aphan netum aphan nangtoitang-lo.”

¹⁴Anke asopimar atum aphan ke-enji pu amonit atum along Lot damlo, lapen pulo, “Serak-ra ladak pen damseraknon; HEMPHU laso adim pavirpo.” Bonta alangli kepachelai pusi latum mathalo.

¹⁵Adapprang pherangke atum Lot aphan patong-lo. “Seraknon!” Latum pulo. “Nangpiso lapen nangsopimar banghini aphan cheponra, damnon, anke rongsopi kepavir ahut nangtum achethe virvelo.”

¹⁶Lot aning pakungkeng-lo. Tebonseta HEMPHU alangli phuthak ingjinsolo, lasi banghini amonit atum alangliphan, apiso aphan lapen asopimar banghini aphan ari pen ponsi ha rongsopi angtan padodam toilo.

¹⁷Anke inut apherangke abang pulo, “Nangpran aphan katnon! Nangphi chelangri lapen arlok along sangri. Inglong anat katnon, anke nangtum thinangnelo.”

¹⁸Bonta Lot thak-lo, “Kalilo, kanghon pen nelitum aphan la nepaklemrinon, akehai.

¹⁹Nanglitum neliphan nerappik-lo lapen nelipran ta pajok-lo. Bonta inglong-heihei an ke helo-ong-lo; kevir neliphan nangphopo, neli hadak lele ako neli thinangpo.

²⁰Hala rongso nangli thek-long-lobo? La tebok muchot. Neliphan hadak nepadam longnon, la nangli thek-long-lo adim asap-ovet lapen la jokvanji.”

²¹Alangli thak-lo, “Chokpo, neta nangchedon dunlo. Halaso arongso ne pavirvelo.

²²Seraknon! Katnon! Hadak nang leletik ne thangnat ta klemklelo.” La bihek pu Lot kepu apotsi, rongso amen Zoar pu hang-lo.

²³Lot Zoar along kele ahut an ke arni vang-ang-lo.

²⁴Sodom lapen Gomorrah arongsopi aputhak HEMPHU menmen kechovurvur mede paklolo

²⁵lapen latum aphan pavirdet-lo, lapen arlok kangthim, hadak kedo arat an aphan, lapen hadak longle athak kejir asontin amar pavir-et-lo.

²⁶Bonta Lot apiso anung chelang-lo, lapen ingti arlong cheplangdet-lo.

²⁷Puthot adap, Abraham, HEMPHU angno alangli karjap adim seraksi damlo.

²⁸Alangli Sodom lapen Gomorrah anat lapen arlok kangthim anat lang-lo, lapen thedung ame angkang pen kebar amehi asonsi, longle pen mehi kethur thek-long-lo.

²⁹Bonta Lot kedo arongsopi a-arlok Arnam kepavir ahut alangli Abraham aphan chemathalo, lapen Lot aphan pajok-lo.

³⁰Zoar along Lot kedoji pherelo apotsi, lapen asopimar atum ha inglong-heihei along cheterek-lo lapen longku along dolo.

³¹Amu aphan akleng abang pulo, “Epo sartang-lo, etum osomar kelong ji aphan lapen eke-enji abang pirthe adang monit avedet-lo.

³²Vangnon, epo aphan hor pangritham lonang, anke alanglilong eli idunlongpo, lapen alangli pen eli oso chopathe longpo.”

³³Halabangso aningve alangliphan latum drakha ahorlang pajunlo, lapen alangli pen asopi akleng abang dim-tar pasi det-lo. Bonta alangli lapu-an kangrilo, la chechinine det-lo.

³⁴Puthot arni asopi akleng abang bangpi amu aphan pulo, Patove alangli long ne i-dunlo; peningve alangliphan puthot pangritham lonang, lapen alanglilong nang i-dunnon. Anke epo pen eli abangphutin ta inut nut oso longrep po.

³⁵Lasi halaso aningve ta latum laphan pangrithamlo, lapen asopi akebi abang alangli pen dim-tar pasidet-lo. Puthot alangli lapu-an ingrilo, alangli la chechinine det-lo.

³⁶Lasonsi Lot asopimar banghini ta halatum apo pen aso chopathelo.

³⁷Asopi akleng abang inut asopo dolo, bangpi laphan Moab pusi amen irlo. Labang helo nonpu arni a-Moab atum aphusarlo.

³⁸Asopi akebi abang ta inut asopo dolo, bangpi laphan Benammi pusi amen irlo. La helo nonpu arni Ammon atum aphusarlo.