Read Karbi KECHENG 21 Bible Online

KECHENG 21 - Karbi bible

KECHENG 21

¹Sarah aphan HEMPHU pahirjumelo, Alangli kechechak ateng,

²lapen bangpi oso chopathelo, lapen Abraham kesar ahut bangpi alangliphan inut sopo amahang pathekpilo. La amahang thekjipu apor Arnam kepu atengsi oso amahang thek-lo.

³Laphan Abraham ke Isaak pusi amen irlo,

⁴lapen Isaak ni nerkep kechok ahut, laphan Abraham areng-rot-lo. Arnam hukum kepi ateng.

⁵Isaak amahang kethek ahut an ke Abraham arta ningkan 100 choktang-lo.

⁶Sarah pulo, “Neliphan Arnam ning arong lapen nepangnek long-lo. Abangphutin la karjulong aling abang ne pen ingnek-longpo.”

⁷Anke bangpi puthulo, “Sarah osomar chelanapo pu konatsi Abraham aphan pu-unpo? Seta alangli kesar ahut alangliphan ne inut sopo amahang pathekpilo.”

⁸Oso thebomlo, lapen la mokkechu ke-o arni, Abraham thedung akechopi sikpilo.

⁹Arnisi Ishmael, Abraham aphan Ijip a-osopi Hagar mahang kepathek a-oso, Sarah asopo Isaak pen kepathubom ahut,

¹⁰Latum aphan Sarah thek-long-lo lapen Abraham aphan pulo, “Laso ban a-osopi lapen asopo aphan phlungjuinon. Laso a-osopi asopo nangkhi nanglongdunde det nangji, la nesopo Isaak si chepahemphulong nangji.”

¹¹La Abraham aphan pasungpik-lo, pima Ishmael ta la asopolo.

¹²Abraham aphan Arnam pulo, “Laso a-oso lapen nangbanpi Hagar aphan nangkematha chepasungri. Sarah nangphan kopima nangkepu alingle klemnon, pima la Isaak pen ajoksi Ne nangphan nangkechak nangso-nangsu dopo.

¹³Banpi asopi asopo aphan ta Ne ongdung asomar piji, anke latum isi akhei plangpo. La ta nangsolo.”

¹⁴Adapprang, Hagar aphan Abraham ajehak an lapen ok-reng athoila isithup alang pidunlo. Alangli Bangpi anung asopo pachebu si lapen toijuilo. Bangpi otekangsi Beersheba akejejangtang ajo damthap lo.

¹⁵Lang kedo-an ikdetsi bangpi oso aphan bap ajo bitekang-koksi

¹⁶lapen ingrup 200 kehelo ingni damlo. Bangpi amethang chepulo, “Nesopo kethi ne chelangding un-e.” Hadak bangpi kangnilun un ahut bangpi kechiru pangcheng-lo.

¹⁷Oso kechiru Arnam arjulong-lo, lapen sining pen Hagar aphan Arnam apherangke ningjelo. “Hagar kopisi kechepasung-lo? Nang phereri. Oso akechiru Arnam arjulong-lo.

¹⁸Thurnon, la aphan humdam non, lapen padoknon, La aso-asu pen Ne isi thedung akhei paplangpo.”

¹⁹Anke bangpi amek Arnam ingpulo, lapen isi alangtuk thek-long-lo lapen bangpi damsi ok-reng athoila lang isithup paplengsi lapen ajehak oso aphan pilo.

²⁰Oso along Arnam dodunsi thebomlo; la Paran akejejangtang ajo dosi inut kethekser asekar plang-lo.

²¹La aphan apei inut Ijip asopi piso palongpilo.

²²Halaso ahut Abimelekh, Phikol pen damlo, la alang ron-armu ahemphulo, lapen Abraham aphan pulo, “Nangli keklem asontin along Arnam dolo.

²³La apotsi neliphan nelisomar, mate neliso-nelisu aphan ne pachobeibe-detjile Arnam angno ladak isi aseme dengnon. Neli nangliphan kroi pamelo, la apotsi nangli ta neliphan lapen laso nangli kedo adet aphuthak kroithippo pura chechaknon.”

²⁴Abraham pulo, “Neli chechak-lo.”

²⁵Abimelekh aban atum langtuk kethi alam Abraham ke Abimelekh aphan pasimulo.

²⁶Abimelekh pulo, “La komatsi keklemma neli chinine, lapen laso alam nonsi karju longchenglang.”

²⁷Anke Abraham ajehak abiresak lapen chainong Abimelekh aphan pilo, lapen latum banghini angbong kechechak aloh chepathik-lo.

²⁸Abraham amethang api ahur pen jonthroksi biresak aloso thak-lo,

²⁹lapen alangliphan Abimelekh arjulo, “La nangli kopisi keklemloma?”

³⁰Abraham thak-lo, “La jonthroksi abiresak aloso deng iktha. La keklem pen ajok, nangli chinilo, laso alangtuk nelisi ketuk abang lo pu.”

³¹Lasi laso adim Beersheba pusi irlo, pima hadaksi latum banghini angbong chechak-lo.

³²Beersheba along latum laso akechechak chepathikdet aphi, Abimelekh lapen Phikol ha Philistia anat damjuilo.

³³Anke Beersheba along Abraham isi Tamarisk athengpi arong elo, lapen kaike kedover Arnam, HEMPHU aphan archolo.

³⁴Ajirdingklui an Philistia along Abraham dolo.