Read Karbi KECHENG 22 Bible Online

KECHENG 22 - Karbi bible

KECHENG 22

¹Ajirdingklui aphi Abraham aphan Arnam asat-enlo; la aphan Alangli hang-lo, “Abraham!” Lapen Abraham thak-lo, “Pilo, nelidaksi dolo!”

²“Nangsopo ponnon,” Arnam pulo, “Nangsopo po epumpet, Isaak, nang kechinghonnei abangphan ponnon, lapen Moriah adet damnon. Hadak Ne nang kepaklangji anglongpi athak, la Nephan athok nepinon.”

³Puthot adap karkliji aphan Abraham ajehak atheng thumlo, agadha arthang-lo, lapen Isaak aphan lapen banghini aban atum cheponlo. Alangliphan Arnam kethan adim aphan latum bar pangcheng-lo.

⁴Nithom arni heloving pen Abraham adim thek-long-lo.

⁵Anke alangli ban aphan la pulo, “Gadha penpen ladak donon. Hadak oso pen ne athak arludampo lapen archodampo, anke netum nanglong chevangthupo.”

⁶Karkliji aphan atheng Isaak aphansi Abraham paponlo, lapen alangli-methang ke isi atari lapen me kethorjisi me akri pon lo. Latum damrapchom ahut,

⁷Isaak pulo, “Po!” Alangli thak-lo, “Kopilo, po?” Isaak arjulo, “Nang me akri lapen thengpi dolo, ne thek-long-lo, bonta karkliji aphan biresak konat-lo?”

⁸Abraham thak-lo, “Arnam amethangsi ejon chevanpo.” Lapen latum banghini dam rapbomlo.

⁹Alangliphan Arnam kethan adim along latum nanglesi Abraham isi adovan builo, lapen la athak thengbat-lo. Asopo aphan alangli rak-het lo lapen dovan angsong theng athak batkok-lo,

¹⁰lapen laphan kepathijisi la tari humlo.

¹¹Bonta HEMPHU apherangke alangliphan ha sining pen hang-lo, “Abraham, Abraham!” Alangli thak-lo, “Kopilo, ne daksido.”

¹²“Oso aphan arengpasori mate thangta klemri, “alangli pulo. “Non Ne chinilo, nang Arnam aphan man pi lapen kroi, pima nang sopo po epumpet ta Nephan kepidetji pen chebibe det-lo.”

¹³Abraham adung arei chelang-lo, lapen biresak alo ingsu ajo anu chingthang-lok thek-long-lo. Alangli damlo lapen la endamlo lapen asopo alar la kephrin athok pilo.

¹⁴Halaso adim “HEMPHU si chevan,” pu amen irlo.

¹⁵Bataihini aphong sining pen HEMPHU apherangke, Abraham aphan hang-lo,

¹⁶“Nemen pen Ne chechak-lo HEMPHU-si ningjelo, Ne nangphan pahirmepikpo. Pima nang la klemlo, lapen nangsopo po epumpet ta Ne pen khangkhedet-lo,

¹⁷sining angsong achiklolongso-heihei ason mate talo akung asangtimili ason nangso-nangsu ongdung nangkepiji aphan ne chechak-lo. Nangso-nangsu atum halatum ahotur atum aphan parempo.

¹⁸Ne nangso-nangsu aphan kepahirjume apot ongdung akhei atum halatum aphan kepahirjume nangjisi latum Nephan hangpo-pima nang Nehukum kroilo.”

¹⁹Abraham aban atum along chedamthulo, lapen latum Abraham kedopathir adim, Beersheba anat damrappet-lo.

²⁰Ajirdingklui aphi Abraham chinilo, Milkah bang nerkep osomar akor Nahor aphan mahangpathek pilo:

²¹Uz aklengsi, la amu Buz, Aram apo Kemuel,

²²Khesed, Hazo, Pildash, Jidlaph, lapen Bethuel,

²³Rebeka apo. Abraham akor, Nahor aphan Milkah bangnerkep a-osomar amahang-pathek pilo.

²⁴Reumah, Nahor ke-enpangtar apiso, Tebah, Gaham, Tahash, lapen Maakah amahang pathekpilo.