Read Karbi KECHENG 23 Bible Online

KECHENG 23 - Karbi bible

KECHENG 23

¹Sarah ningkan 127 arta an reng-long-lo.

²Bangpi Kanaan adet Hebron along si thilo, lapen bangpi kethi apot Abraham aning duk-lo.

³Alangli piso kethi abang arpum ketilai adim otekang si, Hitti aso along damsi pulo,

⁴“Nanglitum angbong neli inut bang adet amonit asonsi nangdo dunlo; ajehak alongle neliphan nejortha, anke nelipiso aphan neli pip unpo.”

⁵Latum thak-lo.

⁶“Nelitum aphan arjutha, akehai. Nangli inut akangtangrak ajalin aphansi nelitum cholangding-lo; nelitum along kedo kemenei athiri along le nanglipiso aphan pipnon. Nelitum abang phutin ta thiri isi nangliphan nangkepiji aninghangpet, la apotsi bangpi aphan nangli pip unpo.”

⁷Anke halatum angno Abraham angphun patongki lo,

⁸lapen pulo, “Nanglitum jongsi nelipiso aphan ladak nepapip-long pulote kanghon pen Zohar asopo Ephron aphan

⁹la ahidi akung Makhpelah Alongku neliphan kepajorjile arjunon. La anam do-an pen neliphan kejorjile arjunon, ladak nanglitum angno, anke la isi athiri aphan neli chepahemphu unpo.”

¹⁰Akaprek a-Hitti atum penpen si Ephron ta rongsopi anghap kechingvai adim chongnidunlo; hadak kedo-an keparjulong-phrongjisi alangli thak-lo.

¹¹“Arjutha, akehai; neli nangliphan hidi adang kangthim lapen la along kedo alongku nangpilo. Ladak neli monit atum angno, la neli nangliphan nangpilo, anke nanglipiso aphan nangli pip longpo.”

¹²Bonta Hitti atum angno Abraham angphun patongkilo,

¹³lapen kadokave ta karjulong-phrongjisi Ephron aphan pulo, “Nangli phan neli arju tamema, kanghon pen arjutha. Hidi adang kangthim neli namdetpo. Anam nelideng iktha, lapen hadak nelipiso aphan neli pippo.”

¹⁴Ephron thak-lo,

¹⁵“Akehai, longle anam ke rup dum 400 vet-elitum angbong lema! La along nanglipiso pip iknon.”

¹⁶Abraham chedondunlo lapen rat angno Ephron keparjulong-phrong alam dum 400 arup halaso ahut kedobom bepari atum alin ateng alangli linlo.

¹⁷Lasonsi Makhpelah along Ephron alongle, Mamre anihang, Abraham amar plang-lo. La hidi anta parloponlo, la along kedo alongku, lapen alongle akung kedo athengpi arong-heihei anta lo.

¹⁸Mei along kechetong a-Hitti atum an ta la Abraham akhilo pu hokdunlo.

¹⁹Anke Abraham Kanaan adet halaso alongku along si apiso Sarah aphan pip-lo.

²⁰Lasi Hitti aso ahidi lapen la along kedo alongku isi athiri aphan Abraham alongle plang-lo.