Read Karbi KECHENG 24 Bible Online

KECHENG 24 - Karbi bible

KECHENG 24

¹Nonke Abraham sar-olo, lapen alangli keklem aling HEMPHU pahirjumelo.

²Alangli ban kesarnei abangphan alangli pulo, labangpo ke Abraham akhi kedo-an kelang abang-lo. Neli kengtham hini along nangliri bat-tha lapen semetangtha.

³Neli nangliphan HEMPHU, pirthe lapen sining a-Arnam, amen pen semetangtha, nangli neliso aphan ladak Kanaan arat angbong pen piso ripipelo.

⁴Nelimahang kethek adim along nangli damthupo lapen neli don atum nelisopo Isaak aphan piso inut ripipo.

⁵Bonta aban abang arjulo, “Jongsi a-osopi laso adet nelilong nangkedun ji aphan ahem che-o-e pulote kosonlo? Nanglisopo aphan nangli kevang adet toithuphit-non ma?”

⁶Abraham thak-lo, “Nelisopo hadak ketoitedetji aphanle nangli klemnon!

⁷HEMPHU, sining A-Arnamsi neliphan nelipo ahem pen lapen nedon-nerap adet pen nevan lo, lapen laso adet neliso-nelisu aphan piji pusi Alangli chechak pamelo. Nangliphrang Alangli Alangli pherangke nangtoiji, anke nangli nelisopo aphan piso inut hadak longpithekpo.

⁸Jongsi arloso-a-oso nangli long nangkedunji aninghanghe pulote, laso akechak pen nangli jokpo. Bonta nangli jongheseta nelisopo aphan hadak ponnangnelo.”

⁹Lasi aban abang Abraham akengtham hini adak ari bat-lo, lapen Abraham karju ateng keklemji aphan seme deng-lo.

¹⁰Aban, la Abraham akhi kechepahemphu abang-lo, ahemphu aka-ut jonkep ponlo, lapen Nahor kedo arongsopi Mesopotamia anirep anat damlo.

¹¹Alangli le si, rongsopi angtan alangtuk akung alangli, ka-ut atum aphan padomlo, la anerlochitim damchot anvet-lang, arloso atum langkesok apor-lo.

¹²Alangli ardomlo, “HEMPHU, nehemphu Abraham a-Arnam, nephan nepa-untha pini lapen nehemphu aphan nang kechak paplengtha.

¹³Rongsopi a-arloso atum lang nangkesokji kevangji alangtuk alongsi ne dolo.

¹⁴Latum angbong inut aphan nepupo, ‘Nangli tebuk kanghon pen pangdaitha, neli langjunlang.’ Jongsi bangpi pupo, ‘Jun iknon, lapen nangli ka-ut atum aphan ta neli lang nangvanpipo, ‘bangpile nangli ban Isaak aphan nangli kangvaitang abang paplangnang. La plang-lote, nang nehemphu aphan kechak alam klemlo pu, neli chinipo.”

¹⁵Alangli arnam kardom jutje ako, Rebeka atebuk nangchingkep chotsi vang-lo. Bangpi ke Bethuel asopi, la Abraham amu Nahor lapen la apiso Milkah asopolo.

¹⁶Bangpi ke inut arje kelangmepik a-okarjang lapen penan dodelang. Bangpi ha langtuk anat hirdamlo, atebuk papleng si, kechevoithulo.

¹⁷Ban abang bangpi aphan kechetong dunjisi kat-lo lapen pulo, “Kanghonpen nanglitebuk pen neliphan lang nepajunlongtha.”

¹⁸Bangpi pulo, “Jun iknon, akehai,” lapen seraksi bangpi atebuk pangdai si bangpi la otdongsi pajunbomlo.

¹⁹La langpajun tangdet aphi, bangpi pulo, “Nangli ka-ut atum aphan ta neli lang nangvanpipo lapen latum untik pajunnang.”

²⁰Bangpi atibuk pi atum aphan dung-etsi lang ke-ongmuchot ke-endamthujisi langtuk anat kat serak-lo la kedo-an aka-ut aphan lang pitang-et-etik.

²¹Bangpo abang HEMPHU laphan rapdunloma kechinijisi dojoi pen bangpi aphan langdunlo.

²²Bangpi patangsi, bangpo abang adorkesonei a-arnan-ensi la bangpi anokan along thonlo lapen ser aroi hongni thedung thonlo ari along thonlo.

²³Alangli pulo, “Kanghon pen nanglipo komatma nelithantha. Ajo kedoji aphan alanglihem nemonit lapen neliphan kedo adim dojima?”

²⁴Nelipo ke Bethuel, Nahor lapen Milkah asopolo, pusi bangpi thak-lo.

²⁵“Nelitum ahem sokpun lapen Phek-e do-o, lapen nanglitum aphan kedoji adim ta do.”

²⁶Anke bangpo akengphu patongruilo, lapen HEMPHU aphan ardom lo.

²⁷Alangli pulo, “HEMPHU aphan ronon, nehemphu Abraham a-Arnam Alang nehemphu aphan kechak alam chebi pame. HEMPHU-si neliphan nehemphu adon ahem nejaponlo.”

²⁸Osopi apei ahem chekat-lo, lapen kadokave alam than-et-lo.

²⁹Non Rebeka a-ik inut do, amen Laban, lapen alangli Abraham aban kedo alangtuk anat kat-lo.

³⁰Laban ke norik lapen angjirpi ari along aroi-heihei thek-long-lo lapen bangpi aphan bangpo kethan alam an pathan-et-toilo. La Abraham aban along damlo, alangli amethang aka-ut adung langtuk along arjapdinglang,

³¹lapen pulo, “Nelilong hem nangdun non. Nangli ke HEMPHU kepahirjume amonit-lo. Nangli kopi chonghoisi ladak ingtanle karjapther langma? Nelihem nangliphan ingdeng isi kedo adim do, lapen nangli ka-ut atum aphan ta kedo adim do.”

³²Lasi bangpo hem arlo lutdunlo, lapen Laban ke ka-ut pen hormu pasunlo, lapen latum aphan sokpun lapen phek-e pilo. Lapen la Abraham aban lapen la amonit atum aphan akeng kepachingroi jisi lang vanpilo.

³³An kevan pi ahut bangpo pulo, “Neli keningje nangji alam ningje longletik ke an choche.” Laban pulo, “Ningje ikbom non.”

³⁴Neli ke Abraham aban lo, la cheng-lo.

³⁵“Nelihemphu aphan HEMPHU pahirjumepik-lo, lapen inut keplang-o amonit pamanlo. La alangliphan biresak ahur, lapen bi, chainong, rup, ser, pinso-arlo aban, ka-ut hei-hei, gadha-heihei pilo.

³⁶Sarah, nehemphu apiso, bangpi kesarpi ahut alangliphan sopo inut amahang pathekpilo, lapen la aphan nehemphu kedo-an ason pi-et-lo.

³⁷Alangli hukum kekroiji aphan nehemphu nephan seme padeng-lo. Alangli pulo, ‘Kanaan adet a-osopi pen nesopo aphan piso ingvaipiri.

³⁸La alar, nelipo amonit, nedon nerap anat damnon, lapen piso inut laphan ingvaipinon.’”

³⁹Lapen nehemphu aphan ne arjulo, “Jongsi osopi nelilong nangdundedet-lote kosonlo?”

⁴⁰Alangli thak-lo, “Neli kaiketa kekroiver a-Hemphu-si, nanglilong pherangke nangtoidunpo, lapen nangliphan pa-unpipo. Nangli nemonit atum angbong penle, nelipo ahemtun penle nelisopo aphan piso inut ne ingvaipinon.

⁴¹Nangli seme pen kejokji atovar isinat: Nangli jongsi nedon ahem dampen, latum nangpimolo, pulote nangli kejok-lo.”

⁴²Pini neli langtuk along kevang ahut, nelihemphu a-Arnam, HEMPHU aphan neli ardom lo, neli keklem akam nepa-untha pu.

⁴³Ladak langtuk alongsi neli dolo. inutbak animsopi langkesokji aphan nangbar lote, neli lang kejunji aphan atebuk pen lang chohangpo.

⁴⁴Bangpi jongsi kroi lapen neli ka-ut atum aphan ta lang kepiji aninghang pulote, bangpi helo nehemphu asopo apisopu Nangli kangvaitang abangpi plangji tahai.

⁴⁵Neli kardomjoi patangte aphrang, Rebeka langtibuk epum nang ingkep-lok si vang-lo, lapen lang kesokjisi langtuk anat sundamlo, Bangpi aphan neli pulo, “Kanghon pen neliphan lang nepajunlongtha.”

⁴⁶Bangpi atebuk kangkep pen pasunsi pulo, “Jun iknon, lapen neli nangli ka-ut aphan ta langpipo.” Lasi neli junlo, lapen bangpi ka-ut aphan ta langpilo.

⁴⁷Bangpi aphan neli arjulo, “Nangli po komat-lo?” Lapen bangpi thak-lo, “Nelipo ke Bethuel, Nahor lapen Milkah asopo.” Anke anokan along anorik lapen bangpi ari along aroi neli thonlo.

⁴⁸Neli kengphu patongruisi HEMPHU aphan ardomlo. Neli hemphu a-Arnam, HEMPHU, neli hemphu adon nehemphu asopo aphan alangli sopi kelong ahem nekeja ponthor abang, aphan chorolo.

⁴⁹“Non, nangli jongsi neli hemphu aphan nangli deng kepaplengji nangli ninghang, lapen alangliphan pharpame po pulote, kanghon pen neliphan nelithannon; jongsi kali pu seta nelithannon, anke neli kopima keklem nangji neli klempo.”

⁵⁰Laban lapen Bethuel thak-lo, “Laso akam ke HEMPHU pen si kevang apot, lake nelitum le kephar nangji kali.

⁵¹Rebeka daksi dolo, bangpi aphan ponnon, lapen damnon. HEMPHU amethang kepu tang asonsi, bangpi nangli hemphu asopo apiso paplang-lonang.”

⁵²Abraham aban la arjulongsi, alangli angphun patongkisi HEMPHU aphan ardomlo.

⁵³Anke alangli pe-ri lapen rup, lapen ser akechingthang adorson, vanpilo, lapen lahei Rebeka aphan pilo. Alangli adorkesonei adan bangpi a-ik lapen apei aphan ta pilo.

⁵⁴Anke Abraham aban lapen la along kedun amonit atum cholo, lapen junlo, lapen hadak ajo dokok-lo. Latum puthot adap amek prang-lo, lapen la pulo, “Neli hemphu along neli pachevoi longtha.”

⁵⁵Bonta Rebeka a-ik lapen apei pulo, “Nelitum along a-osopi hithi eruibak mate nikep bak padosi nang, anle bangpi nang padun lonang.”

⁵⁶Bonta alangli pulo, “Nelitum aphan khangrinon, Neli kedam akam HEMPHU si pa-unlo; neliphan nelihemphu along pachevoithulong non.”

⁵⁷Latum thak-lo, “Osopi aphan eli hang-lonang lapen bangpi kopitong kepujilone.”

⁵⁸Lasi latum Rebeka aphan hang-lo, lapen arjulo, “Nang labangso amonit along dunji nangning-hangma?” Ninghang, bangpi thak-lo.

⁵⁹Lasi latum Rebeka lapen hemtun along kedo ajir-kedingnei bangpi aban Abraham aban lapen la amonit along paduntoilo.

⁶⁰Lapen latum Rebeka aphan lahei alam ahirjume pidunlo: “Nang, ne ingjir-arlo, suri suri apei paplang lonang! Nangso-nangsu atum, halatum ahotur atum arongsopi-heihei aputhak pahainang!”

⁶¹Anke Rebeka lapen la animsopimar atum chesikkoilo, lapen Abraham aban along kedunjisi ka-ut athak ardonlo, lapen latum kedo-an ta kebar cheng-lo.

⁶²Nephan nekethek-long Abang alangtuk, Pu adim kejejangtang ajo along Isaak nangletang-lo, lapen Kanaan arlo anitur anat la dodamlo.

⁶³Alangli arnikangsam apor kejuidamjisi hidi damlo lapen ka-ut ahur kevang thek-long-lo.

⁶⁴Isaak aphan Rebeka thek-longsi, bangpi aka-ut pen suntuk-lo, lapen

⁶⁵Abraham aban aphan arjulo, “Hidi ajo elitum anat kevangbom a-arlengpo komat-lo?” Alangli ke nilihemphulo, ban abang thak-lo. Lasi bangpi ape che-ensi amahang chekurkilo.

⁶⁶Ban abang keklem asontin alam la Isaak aphan than et-lo.

⁶⁷Anke apei Sarah kedo apehem arlo Rebeka aphan Isaak vanlo, lapen bangpi la apiso plangdet-lo. Rebeka aphan Isaak chinghon-pik, lapen la apei thilot seta la aning ingsamlo.