Read Karbi KECHENG 25 Bible Online

KECHENG 25 - Karbi bible

KECHENG 25

¹Abraham anut kaprek piso enlo, la amen ke Keturah pulo.

²Alangli phan bangpi Zimran, Jokshan, Medan, Midianan, Ishbak, lapen Shuah amahang pathekpilo.

³Jokshan ke Sheba lapen Dedan, apolo, lapen Dedan aso-asu ke Asshurim, Letushim, lapen Leummim.

⁴Midianan asomar ke Ephah, Epher, Hanokh, Abida, lapen Eldaah helo. Lahei kedo-an ke Keturah aso-asulo.

⁵Isaak aphan Abraham kedo-an amar ta pi-et-lo;

⁶bonta la kerenglang ahut, akaprek apiso alangliphan mahang kepathekpi asomar an aphan alangli dan-heihei pilo. Anke lahei asomar aphan alangli ha Nihang adet, asopo Isaak pen kehelo adim toijuilo.

⁷Abraham sarpame si amek chilong-lo, kethi ahut arta ningkan 175 an lo.

⁸Abraham pirthe kedo padu si lapen alangli kethi ahut sarlongpame, lapen arat aphan pangrumlo.

⁹Laphan asopo Isaak lapen Ishmael ha Makhpelah Alongku, Zoha Hitti asopo Ephron alongle Mamre ahidi-heihei anihang anat pipdamlo.

¹⁰La ke Hitti aso pen Abraham kenam alongle; hadak Abraham lapen apiso Sarah aphan pip-lo.

¹¹Abraham thidet aphi, asopo Isaak aphan Arnam pahirjumelo, la “Nephan nekethek-long Kereng-et Abang Alangtuk” adungsi kedo.

¹²Sarah abanpi, Ijip asopi Hagar, Abraham aphan mahang kepathek aso, Ishmael,

¹³asomar lahei helo, latum mahang kethek angthun atengsi tok-lo: Nebaioth, Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish, lapen Kedemah.

¹⁶Latum Kheikrehini aphusar atumlo, lapen latum amen ateng si rong-heihei amen lapen kepamukam adim-heihei amen irlo.

¹⁷Ishmael kethi ahut an ke arta ningkan 137 dolo.

¹⁸Ishmael aso-asu atum Havilah lapen Shur alongri, Assiria anat kedam atovar, Ijip anihang along si dolo. Latum Abraham aso-asu pen kedo chepahelo lo.

¹⁹Abraham asopo Isaak atomo ke lahelo.

²⁰Bethuel (Mesopotamia pen inut Aram aso) lapen Laban asopi Rebeka angjir pen Isaak kechepangri ahut la arta ningkan 40 dolo.

²¹Pima Rebeka asomar ave, Isaak ke bangpi aphan HEMPHU Arnam ardom pilo, alangli akardom HEMPHU thak-lo, lapen Rebeka oso-chopathelo.

²²Bangpi osocherop longpo, lapen latum mahang kethek aphrang, latum apei apok arlo lahin lahin chemarkot-lo. Bangpi pulo, “Kopi si nephan lapuson keplang-loma?” Lasi laso akethak kelongjisi bangpi HEMPHU aphan arjulo.

²³Bangpi aphan HEMPHU pulo, “Khei hini nangpok arlosi dolo; Pu pu ahotur kechethur arat hini aphan nang mahang pathekpo. Inut abang anut kaprek abangphan ingtang-muchotpo; Akleng abang akebi aphan si ingdukpo.”

²⁴Bangpi mahang kepathekji apor nangletang-lo, lapen bangpi osopomar cherop long-lo.

²⁵Akleng abang prungchop, lapen la areng angmi kejanghu ape ason, la apotsi laphan Iso pu amen irlo.

²⁶Akebi abang ke amahang kethek ahut Iso akeng cheripdunling, lasi laphan Jakob pusi amen irlo. Latum amahang kethek ahut an ke Isaak arta ningkan 60 lo.

²⁷Osomar atum thebomlo, lapen Iso ke inut kethekser asekar plang-lo, la ingtan kedam akai si aning kedok abang, bonta Jakob ke inut hemsi dojoi amonit.

²⁸Iso aphan Isaak ke aning kedok, pima la Iso kevan api a-ok kecho aning-chepajang-lo, bonta Rebeka ke Jakob aphan si aning kedok.

²⁹Arnisi, Jakob abang hantharvo ahan ketunbom ahut Iso abang sekar pen vang-lo. alangli ingchirpik-lo,

³⁰lapen Jakob aphan pulo, “Ne kethisi kedolo; nephan ajehak ke-erring ahan nepitha.” (La apotsi la aphan Idom pulo.)

³¹Jakob thak-lo, “Nephan sonusok-leng ajakong nepilote ne nangphan la nangpidetji.”

³²Iso pulo, “Chokpo! Ne kethiji dokdok-lo; nejakong nephan kopilo nekerap-po?”

³³Jakob thak-lo, “Nang sokleng ajakong nepiji pura aphrang seme tangtha.” Iso semetang si Jakob aphan la sokleng ajakong chepidet-lo.

³⁴Anke laphan Jakob ajehak ahim lapen han aninok ajehak pilo. La cholo lapen junlo, lapen thur si damjuilo. La helo Iso amethang sonu-sokleng ajakong aputhak kechematha.