Read Karbi KECHENG 28 Bible Online

KECHENG 28 - Karbi bible

KECHENG 28

¹Jakob aphan Isaak hangsi ardom pilo, lapen laphan pulo, Kanaan a-osopi aphan enri.

²La alar ha Mesopotamia, nangphu, Bethuel, along damnon, lapen hadak inutbak aphan piso ennon, nang-ong, Laban asopimar angbong inut bak aphan ennon.

³Jakongthenei Arnam nangtum kechepangri pahirmenang lapen nangtum aphan ongdung a-osomar nang papilonang, anke nang ke ongdung akhei atum apo plangpo!

⁴La Abraham aphan kepahirme asonthot nangphan lapen nangso-nangsu aphan pahir jume nang, lapen nangkedo laso alongle lapen Abraham aphan Arnam kepi alongle nang pachehemphu longnang!

⁵Jakob aphan Isaak ha Mesopotamia, Laban anat, Aram aso Bethuel asopo, lapen Jakob lapen Iso apei Rebeka a-ik along toijuilo.

⁶Jakob aphan Isaak pahirmelo lapen piso kepa-enjisi Mesopotamia toijuilo pu alam Iso chinilo. Lapen ke Isaak laphan hukum kepi ahut Kanaan a-osopi inut penta chepangri-ri puta chinilo.

⁷La thek-long-lo, Jakob ke apo aphan lapen apei alam kroisi Mesopotamia damtang-lo.

⁸Iso chechinilo, Kanaan a-osopi ke-en ke la apo Isaak aningdokde.

⁹Lasi la Abraham asopo Ishmael along damlo, lapen alanglisopi Mahalath pen chepangrilo, bangpi ke Nebaioth angjirlo.

¹⁰Jakob Beersheba osi Haran anat bar pangcheng-lo.

¹¹Arnikangsam ahut alangli isi kangthir-adim nanglelo, lapen hadak sakok-lo. Amek-kejangjisi alangli tilailo, isi a-arlong athak aphu chepuhuilo.

¹²La amang hemanlo, isi pirthe pen sining kechepho adon-don thek-long-lo, la athak pherangke atum kehir lapen karlu helatpit.

¹³Alangli dung HEMPHU si arjapding. “Ne helo HEMPHU, Abraham lapen Isaak a-Arnam,” pusi alangli pulo. “Nang ketilai alongle Ne nangphan lapen nangso-nangsu aphan nangpipo.

¹⁴Latum pirthe athak alongle-aduk asonsi ongdungji. Latum alongri konaphli anta parji, lapen nang, lapen nangso-nangsu pen ajok khei kedo-an aphan Ne pahirjumeji.

¹⁵Chematha-tha, Ne nanglong doji, lapen nang kedam aling nangraiji, lapen laso alongle along Ne nangphan nang-vanthudetji. Nangphan Ne kechak ason an paplengpletik Ne nangphan nang-lole.”

¹⁶Jakob amek-prang si pulo, “HEMPHU dak si dolo! Alangli laso adim si dolo, lapen ne la chinine det-lo!”

¹⁷Alangli pherelo, lapen pulo, “La isi kepherememe adimlo! La ke Arnam ahem plangvekpo; la si sining kedamji kangpu anghap plangpo.”

¹⁸Jakob puthot adap thurdap-prang-lo, kechepuhui a-arlong en si, la kechekimoji aphan elo. La Arnam kehodaijisi alangli la athak jit ajangthu dung-lo.

¹⁹Laso adim alangli Bethel pusi amen irlo. (Laso adim arong aphrang ke Luz pusi kechethang.)

²⁰Anke HEMPHU aphan Jakob isi chechak-lo! “Ne kedambom ahut jongsi nang nelongdoji lapen neraiji lapen an nepiji lapen pe-ri nepiji,

²¹lapen nepo ahem mesen pen nepachevoi longji pulote, Nang ne Arnamlo.

²²Ne ke-e kechekimo a-arlong ke Nangphan karcho adim plangpo, lapen Nang nekepi amar asontin phankep pen ephan Nangphan ne nangpi po.”