Read Karbi KECHENG 29 Bible Online

KECHENG 29 - Karbi bible

KECHENG 29

¹Jakob dambomlo lapen Nihang adet anat ledamrok-lo.

²Menmen alangli hidi angtan isi alangtuk along nanglelo, hadak la adung jonthom anbak abiresak kedomkur dolo. Pi atum aphan langtuk pensi lang kepi, la amangho arlongthepi isi do.

³Hadak pi ahur kevangpet ahut, kevi abang arlong terekpo lapen latum aphan langpajunpo. Anke latum arlong aphrang adim bithupo.

⁴Kevi atum aphan Jakob arjulo, “Jirpo atum, nanglitum ke konat penlo kevang?” Haran pen, latum thak-lo.

⁵Alangli arjulo, “Nahor asopo Laban aphan nanglitum chinima?” Nelitum chini, latum thak-lo.

⁶Alangli mesen langma? la arjulo. Alangli mesenlang, latum thak-lo. “Lang iktha, alangli sopi Rachel ladak abiresak ahur penpen vangbomlo.”

⁷Jakob pulo, “Non arnisoklang lang, lapen pi ahur kevan apor kalilangle, kopisi nanglitum lang lahei aphan pen latum aphan pachopan ponpedet-lo?”

⁸Latum thak-lo, “Pi ahur kedo-an ladak vangpetpetik lapen arlong adimthot bithuthetik ke nelitum la klem-un-e; ansi nelitum latum aphan langpajun po.”

⁹Jakob latum pen chingkibom ahut, pi ahur penpen Rachel nangledunlo.

¹⁰A-ong abiresak penpen Rachel aphan Jakob thek-longsi, la langtuk along damlo, arlong terek si biresak aphan lang pilo.

¹¹Anke la bangpi aphan ingjup-lo, lapen aning arongpik si hangchir lo.

¹²Bangpi aphan la chethanlo, “Ne ke nangpo adonlo, Rebeka asopolo.” Apo aphan kechethan-damjisi bangpi kat-lo;

¹³lapen alangli osa Jakob alam arjulongsi, kechetong-dunjisi la kat-lo, lapen bamlo, lapen ingjup-lo, lapen laphan hem vandet-lo. Keplangtang an alam Jakob kethan ahut,

¹⁴Laban pulo, “Kalang, chenamsi, nangli ke nemethang a-ok lapen avilo.” Hadak Jakob chiklo ejon kangthim dolo.

¹⁵Jakob aphan Laban pulo, “Nangli nedonlo pura nelilong nangliphan thangnat ale avepinji lason akam klem nangne. Nangli ko-an anam kenangjine?”

¹⁶Laban asopimar banghini do; akleng abang amen ke Leah lapen akebi abang amen ke Rachel.

¹⁷Leah amek langmepik , bonta Rachel abang ke biher lapen arje mepik.

¹⁸Jakob ke Rachel pen si aning kechedok, lasi la pulo, “Rachel aphan neli pangrilong pulote nangliphan neli ningkan throksi kam nangklempiji.”

¹⁹Laban thak-lo, “Anut kaprek aphan kepi apar bangpi nangli phansi nangpidetpo; nelilong ladak nangdo dunnon.”

²⁰Rachel aphan ke-enlongjisi Jakob ningkan throksi kam klemdunlo, lapen laphan apor malomsovet ason, pima bangpi aphan la chinghonlo.

²¹Anke Laban aphan Jakob pulo, “Apor juttang-lo; neliphan nanglisopi pen pachepangri longnon.”

²²Lasi Laban isi piso-pangri akecho amei sikpilo lapen abangphutin aphan ta hangpet-lo.

²³Bonta halaso aningve, Rachel alar alangli Jakob aphan Leah si ponpirong-lo, lapen bangpi pen Jakob che-endet-lo.

²⁴(Leah aphan Laban, Zilpah pu ban a-osopi pilo.)

²⁵La Leah lo pu puthot adap an si Jakob chinipinlo. La Laban along damsi pulo, “Nangli neliphan la kopisi keklemloma?”

²⁶Laban thak-lo, “Ladak akleng aphan penan chopipe ako akebi abangphan penan kepi aron ave.

²⁷Pangri-pangdon arui parpetik inghongtha, jongsi nangli puthot ningkan throksi neliphan kam nang-klempilote Rachel nangliphan nangpipo.”

²⁸Jakob chedondunlo, lapen pangri-pangdon arui damdet aphi Laban laphan alanglisopi Rachel laphan penan chopidet-lo.

²⁹(Laban asopi Rachel aphan Bilhah pu aban-a-osopi pidet-lo.)

³⁰Jakob ke Rachel penta che-endet-lo, lapen bangpi aphan Leah aphan aparta la inghon muchot-lo. Anke Laban aphan la puthot ningkan throksi kam klempilo.

³¹Rachel apar Leah aphan kanghon ave muchot HEMPHU thek-long si, Alangli Leah aphan osomar pilo, bonta Rachel ke osomar avedet-lo.

³²Leah oso chopathe si inut pinso a-oso mahang pathek-lo. Bangpi pulo, “Ne kesung HEMPHU nethek-long-lo, lapen non nepenan nephan ne inghonpo;” lasi bangpi laphan Reuben pusi amen irlo.

³³Bangpi puthot oso chopathelo, lapen inut pinso a-oso amahang pathek-lo. Bangpi pulo, “HEMPHU laso a-oso ta nepilo, pima nephan ne inghonhe pu alangli arjulong-lo;” lasi bangpi laphan Simeon pusi amen irlo.

³⁴Bangpi puthot oso chopathelilo, lapen anut kaprek pinso a-oso mahang pathek-lo. Bangpi pulo, “Non nepenan nedung patebokpikpo, pima laphan ne bangkethom pinso a-oso mahang pathekpilo;” lasi bangpi laphan Levi pusi amen irlo.

³⁵Anke bangpi puthot oso chopathelilo lapen anut kaprek apinso a-oso amahang-pathek-lo. Bangpi pulo, “Non ke ne HEMPHU aphan choropo;” lasi bangpi laphan Judah pusi amen irlo. Anke bangpi oso chopathe ingtonkok-lo.