Read Karbi KECHENG 30 Bible Online

KECHENG 30 - Karbi bible

KECHENG 30

¹Bonta Rachel ke Jakob aphan inutbakta oso amahang pathek pipedet-lo, lasi bangpi ate aphan lang un-elo, lapen Jakob aphan pulo, “Osomar nepinon, kalite ne thilotpo.”

²Rachel aphan Jakob aningthihak-lo, lapen pulo, “Arnam adim ne en-un-e. Alangli si nangphan oso kelongji pen khang-lo.”

³Bangpi pulo, “Ladak nebanpi Bilhah dolo; bangpi pen irap-rap non, anke bangpi nephan inut a-oso nepi unpo. Lasonsi bangpi pen ajok ne inut apei plangpo.”

⁴Lasi bangpi apenan aphan Bilhah pidet lo, lapen alangli ta bangpi pen che-endet-lo.

⁵Bilhah oso chopathe si Jakob aphan inut pinso a-oso mahang pathekpilo.

⁶Rachel pulo, “Arnam nephan akeme si ingsailo. Alangli nekardom arju si sopo inut nepilo;” lasi bangpi laphan Dan pusiamen irlo.

⁷Bilhah puthot oso chopathe lilo, lapen Jakob aphan pinso a-oso adun mahang pathekpilo.

⁸Rachel pulo, “Nete pen ne kesungnei akechedan chedanlo, bonta ne haidet-lo;” lasi bangpi laphan Naphtali pusi amen irlo.

⁹Leah aso avelo pu chechinisi, apiso kepaplangjisi Jakob aphan abanpi Zilpah pidet-lo.

¹⁰Anke Jakob aphan Zilpah inut pinso a-oso mahangpathek-lo.

¹¹Leah pulo, “Ne kopai the-olo;” lasi bangpi laphan Gad pusi amen irlo.

¹²Jakob aphan Zilpah sopinso inut mahang pathekpilo,

¹³lapen Leah pulo, “Ne ko-an ning arong! Non arloso atum nephan ning arong pusi nehangpo;” lasi bangpi laphan Asher pusi amen irlo.

¹⁴Soktipli kerot apor Reuben hidi damlo, lapen amek-kejang abap dovai long-lo, la apei Leah along vandet-lo. Leah aphan Rachel pulo, “Kanghon pen asap-o nangsopo abap-dovai nepichomtha.”

¹⁵Leah thak-lo, “Nang nepenan pondet ta dordelangma? Ako non, nang nesopo abap dovai ta keponjisi kebor-i.” Rachel thak-lo, “Nang jongsi nangsopo abap dovai nephan nepilote peningve nang Jakob along i-dun-longpo.”

¹⁶Arnikangsam Jakob hidi pen nangchevoisi, laphan Leah keche-tongjisi damlo, lapen pulo, “Peningve nang nelongsi nang-i dun nangji, pima nesopo abap dovai pen ne nangphan anam pi-et-lo.” Lasi halaso aningve bangpi pen la i-rap-rap si che-enlo.

¹⁷Leah akardom Arnam thak-lo, lapen bangpi oso chopathelo, lapen Jakob aphan pho adun asopo mahang pathekpilo.

¹⁸Leah pulo, “Arnam nephan ne nong-e nepilo, pima nebanpi ne, nepenan aphan pidet-lo;” lasi bangpi laphan Issakar pusi amen irlo.

¹⁹Leah puthot oso chopathelo, lapen Jakob aphan throk adun sopo inut mahang pathekpilo.

²⁰Bangpi pulo, “Arnam nephan isi kemenei adan nepilo. Non nepenan nephan nedengpo, pima alangliphan ne throk adun sopinso mahang pathekpilo;” lasi bangpi laphan Zebulun pu amen irlo.

²¹Aphi bangpi inut arloso a-oso mahang pathek-lo, laphan bangpi Dinah pusi amen irlo.

²²Anke Rachel aphan Arnam chemathalo, bangpi akardom Alangli thak-lo, lapen bangpi aphan osomar palong undet-lo.

²³Bangpi oso chopathelo, lapen pinso a-oso inut amahang pathek-lo. Bangpi pulo, “Arnam nephan sopo inut nekepi pen ajok nekepinrem an pondet-lo.

²⁴Arnam puthot nephan anut kaprek sopinso nepapilonang;” lasi bangpi laphan Joseph pusi amen irlo.

²⁵Joseph amahang-thekdet aphi, Laban aphan Jakob pulo, “Neli phan nepadam longnon, anke neli hem chevoilongpo.

²⁶Neli nangphan kam nang keklempi anam kelong nepiso, neso nepinon, lapen neli opo. Neli ko-an nangliphan kam nangklempi pameloma, nangli chinilo.”

²⁷Laphan Laban pulo, “Neliphan la nepapu longtha: Neli sangkelang pen ajok chinilo, nanglipen apot HEMPHU neliphan pahirmelo.

²⁸Nangli kechepaduk anam nethannon, lapen neli lahei nangpidetpo.”

²⁹Jakob thak-lo, “Neli kosonsi nangliphan kam nang klempiloma nangli chini lapen kosonsi nangli pi ahur ko-an chanloma nangli chinilo.

³⁰Neli kevang aphrang asap-nat seta nonke dopik-lo, Lapen neli kedam aling HEMPHU nangliphan pahirjumelo, Non lasi neli methang aphan neli kechelang nangji aporlo.”

³¹Nangliphan neli kopi nangpi nangpo? Laban arjulo. Jakob thak-lo, “Neliphan thangnat anam ta nelipi nangne. Nangli jongsi laso alam nang chedondun pulote neli nangli pi ahur bibomji:

³²Pini neliphan nangli pi ahur angbong nepadam longtha lapen biresek ake-ik lapen adak kedo mate akemorok abi aso ajontin nepa-en longnon. Lahelo ne kenangji anam.

³³Neli athikpetma mo nangli chinijoikeji. Neli kelongji anam nangli nangkelang ahut jongsi adak kave mate akemorok-re abi nelilong nanglong pulote lapen biresak ke-ik kalipin thek-long pulote la chonghutang-lo pu ra nangli chininon.”

³⁴Laban thak-lo, “Chedonlo, nangli kepu atengle eli klemlo nang.”

³⁵Bonta halaso arni bi alo adak kedo mate akemorok an, halahei along akelokchot kedo an thakdak-lo; lapen alangli biresak abi-ik an ta thakdak-lo. Lahei aputhak alanglisomar atumsi palang lo,

³⁶lapen Jakob pen chepahelosi lahei abi ha nithom kedam un atovar ponsi damlo. Laban ahin api ahur an ke Jakob si lang-lo.

³⁷Poplar, almond, lapen plane athengpi aro-heihei kelir enlo lapen ajehak ahu chep-lo, anke lahei along akelok chotchat ta dolo.

³⁸Alangli lahei pi ahur lang kejun adim angno bilo. Hadak alangli lahei bilo, pima pi atum langkejunji kevang ahut chardonlo.

³⁹Lasi bi atum aro-heihei angno chardonlote, latum aso ta adak kedo lapen kemorok saide si philo.

⁴⁰Bi ahur pen Jakob biresak atum kebi paprek-lo, lapen lahei Laban api ahur kemorok lapen ake-ik atum anat si papangnolo. Lasonsi la amethang api ahur chepa-ong-lo lapen la Laban api ahur pen kebi pahelolo.

⁴¹Aprankeme api atum chardonlote, lang kejun adim pi angno Jakob thengpi aro-heihei bilo, anke latum thengpi aro-heihei angbong aso punpo.

⁴²Bonta kechungkrenglai api atum angno alangli thengpi aro-heihei bibedet-lo. Laban ke kechungkreng api an si long-lo, lapen Jakob ke kangtulim api an long-lo.

⁴³Lasonsi Jakob plangvoilo. Alangli ongdung api ahur, ban atum, ka-ut-heihei, lapen gadha-heihei chepahemphu long-lo.