Read Karbi KECHENG 31 Bible Online

KECHENG 31 - Karbi bible

KECHENG 31

¹Laban asomar atum keningje Jakob arjulong-lo, “Epo amar an Jakob cherai-et-lo. La akhi an epo kechepahemphu tang pensi kevang.”

²Alangli thek-long-lo, Laban ta aphrang ason an chingkidakde.

³Anke alangliphan HEMPHU pulo, “Nangpo lapen nangdon-nangrap kedo adim chedamnon, Nanglong Ne nangdodunpo.”

⁴Rachel lapen Leah hidi ajo biresak kevi adim kepachetongjisi Jakob birta lolo. Latum aphan alangli pulo, “Nangpo aphrang ason an nepen chepame-o-e la ne thek-long-lo; bonta nepo Arnam ke nelong dolo.

⁵Halatum aphan alangli pulo, ‘Nangpo kai ateng ason nephan kechingkime-o ne thek-longledet-lo, bonta nepo a-Arnam nelong dolo.

⁶Nangtum banghini ta chinilo, ne jakong do-an pen nangpo aphan kam klempilo.

⁷Seta alangli nephan chobei lo, lapen ne kelong nangji anam phan kep lartang-lo. Bonta Arnam nephan Alangli phangnotoite det-lo.’”

⁸“Adak kedo abi ke nangli nam lo” pu Laban kepu aphongtin ta kedo-an pi aso kephi an adak do et-lo. “Akemorok abi an ke nangli pharman lo” pu alangli kepu ahut ta pi an ta aso kemorok si philo.

⁹Arnam si nangpo pen pi ahur pon si nephan lahei nepilo.

¹⁰“Aso kephi ahut ne mang hemanlo, alo kechardon abi an adak kedo akelokchot, lapen akemorok saide.

¹¹Nemang along Arnam apherangke nephan thansi pulo, ‘Jakob!’ ‘Kopilo,’ Ne thak-lo.

¹²‘Langtha’ alangli ningjebomlo, ‘api kardon abi alo an adak kedo, akelokchot, lapen akemorok saide. La ne paplang-lo, pima nangphan Laban kopisi keklemloma ne thek-long-lo.

¹³Ne helo nangphan Bethel along nangke cheklang a-Arnamlo, hadak nang isi kechekimo a-arlong hodai lo, lapen la athak jit ajangthu nang dung-lo, lapen hadak nang Nephan isi asemetang-lo. Non lasi nang mahangkethek adim chedamnon.’ ”

¹⁴Jakob aphan Rachel lapen Leah thak-lo, “Epo pen keche-pahemphuji ason thangnat ta avelo.

¹⁵Etum aphan bang adet aso asonsi alangli echekamlo. Etum aphan alangli pulo, lapen non etum aphan anam ekepi atangka an alangli khorot et-lo.

¹⁶Epo pen Arnam kepon akhi an etum lapen esomar atum akhilo. Arnam kopisi nangphan nangpaklemtoi ma lale klemnon.”

¹⁷Lasi Jakob Kanaan adet apo along kechedamthujisi chesik-lo.

¹⁸Alangli asomar lapen apiso atum aphan ka-ut athak pardonlo, lapen Mesopotamia along alangli kelong asontin amar an alangli-phrang phrangsi padambomlo.

¹⁹Laban ke abiresak angmi kangtipjisi damjuilo, lapen alanglibang kave ahut Rachel abang apo mar hem a-arnam-heihei nangchonghudet-lo.

²⁰Jakob ke-olo pu Laban aphan pachininepin pen ajok alangli Laban aphan pachobeilo.

²¹Alangli kelong akhi an chepon-et-lo, lapen oserak-rak-lo. La Euphratis Aroi hat si Gilead anglong akeng-ri aphan kebar cheng-lo.

²²Nithom aphi Jakob kat-et-lo pu Laban aphan thanlo.

²³La amonit cheponsi Gilead adet Jakob aphan longletik nithroksi hung dunlo.

²⁴Halabangso ajo Laban aphan Arnam amang thanlo, lapen pulo, Cherepametu, alingseta Jakob aphan ther-ri.

²⁵Inglongpi along si Jakob amukam chekimlo, lapen Laban ta adon-arap penpen ha Gilead anglong akeng-ri si amukam chekimlo.

²⁶Jakob aphan Laban pulo, “Nangli kopisi neliphan nechobei lo, lapen nesopi atum aphan ron along kenep ra kepon asonle kepon ma?

²⁷Kopisi nangli neliphan pachobeiloma, lapen nephan nethanthe pin pen dam chonghujoilo ma? Nangli jongsi neliphan nethan asonte, ning arong pen, lapen kumbeleng, prakso arki alun pen nangliphan tovar nangthon dunji apot-lo.

²⁸Nesu atum aphan nangli nelipangjup longledet-lo, lapen nelisomar atum aphan chepadidun longle det-lo. La ke kelu akam si keklemlo!

²⁹Nangliphan kepasungdetji nelijakongdo, bonta patove nanglipo a-Arnam nangliphan aling pen seta ketherthe detji aphan nepacheretoilo.

³⁰Neli chini nangli hem kechingtung ong apotsi nangli ke-o, bonta nangli kopi apotsi nelihem arnam kechonghu pon det-loma?”

³¹Jakob thak-lo, “Neli pherelo, pima neli mathalo nangli nangli sopi atum aphan nelipen cheponthudet na pu.

³²Bonta nangli jongsi ladak kedo angbong inut bak along nangli arnam long-lok-lo pulote halaphan pathilotpo. Ladak nelimonit atum si ahakilo, nanglimar an chelangnon, lapen nanglimar an cheponnon.” Laban a-arnam Rachel si chonghudet pu alam Jakob chinine.

³³Laban damsi Jakob apehem ridamlo; lapen alangli Leah apehem ta lutdamlo, lapen banpi banghini apehem ta damlo, bonta alangli a-arnam chelongle det-lo. Anke alangli Rachel apehem arlo lutdamlo.

³⁴Rachel si hem a-arnam inghupondet-lo lapen lahei bangpi ka-ut kardon-i ajarong arlo thap-lo lapen lahei athak ardonthip-lo. Laban pehem angton pen rilo, bonta lahei longledet-lo.

³⁵Apo aphan Rachel pulo, “Neliphan ningthiri, po, bonta neli nangli ingno arjap un-edet-lo; neli pe kechechok aporlo.” Laban ri-et-lo, bonta ahem a-arnam chelongledet-lo.

³⁶Anke Jakob aning chekhang un-edet-lo. “Neli kopi akehingno keklemlo?” alangli aning kethi pen arjulo. “Neli kopi aronsi kangdi lo, nangli lapu-an neliphan nangkehungdun?

³⁷Nelimar an nangli ri et-lo, nangli nanglihem amar kopipilo kelong? Nangli monit lapen nelimonit atum kethek-longphrongjile ladak ingtan nangpaklangnon, nanglipen nelitum angbong komatsi kechokchema latum pangsailonang.

³⁸Nanglilong neli ningkan ingkoi nangdodunlo; nangli biresak lapen bi atum chanche pupedet-lo, lapen nangli pi ahur pen neli ejon ta chochelang.

³⁹Aphongtin ingnam api nangli biresak chodet lote nelisi kaita konlo. La nelidai ave pu nangliphan neli nang paklangkle det-lo. Ajo tame anerlole kangbo setame nelisi papleng nangpo pu nangli nehang-lo.

⁴⁰Penang an aphong anerlo kephang-ok lapen ajo kangsam neli chechaknang-lo. Nelimek jang-un-e-det-lo.

⁴¹Ningkan ingkoi neli nanglilong nangkedodun lapuson saidelo. Ningkan krephli nangsopi banghini kelongji aphan lapen ningkan throk nangli nanglilong nangdodunlo. La apar ta nangli neliphan anam ta phankep larlo.

⁴²Jongsi nelipo a-Arnam, Abraham lapen Isaak a-Arnam, nelilong avete, neliphan nangli neliri angse si nangtoijuipo. Bonta neli kesung lapen nelikam Arnam nangthek-longpet-lo, lapen patove Alangli Alangli kangsai nangli paklang-lo.”

⁴³Jakob aphan Laban thak-lo, “Lahei a-osomar ke nelisomar, latum asomar nesu, akaprek kalilo, lapen lahei api ahur ta nemar. Pudam-et lote nangli ladak kethek-long an amar ta nelimar. Bonta nelisomar aphan lapen latum asomar atum aphan neli kekhangji thangnat ta ajakong avedet apotsi,

⁴⁴nangli pen neli isi kechechakji nelininghang. Elitum akechechak alam kechematha-damji aphan arlong-heihei abui builonang.”

⁴⁵Lasi Jakob isi a-arlong kechematha-damji aphan humlo.

⁴⁶La amonit atum arlong kepangrumjisi lapen kebuijisi pulo. Anke latum arlong abui adung an esan cholo,

⁴⁷Laban la aphan Sahadutha pusi amen irlo, lapen Jakob ke Galeed pusi irlo.

⁴⁸Jakob aphan Laban pulo, “Laso arlong abui elitum banghini aphan ta isi kechematha-damji aphanlo.” Lasi laso adim ke Galeed pulo.

⁴⁹Laban puthulang, “Elitum banghini kechekak ahut seta HEMPHU la amek pen epalangding-bom lonang.” Lasi laso adim amen Mizpah puta pulo.

⁵⁰Laban pubomlang, “Jongsi nangli nelisomar atum aphan langpameme mate kaprek arloso enlo pulote, neli nangthek dunde seta, chechininon Arnamsi elangding.

⁵¹Elitum angbong ladak arlong buichom dolo, lapen ladak kechematha-dam a-arlong dolo.

⁵²La arlong abui lapen kechematha-dam a-arlong hinita ephan epinpurlo. Laso abui apar neli nangliphan tengkheng-khelo, lapen nanglita laso apar damri, mate neliphan ketengkheng-jira laso kechematha-dam a-arlong apar vangrinon.

⁵³Abraham a-Arnam lapen Nahor a-Arnamle elitum angbong nangpangsai lonang.” Anke apo Isaak karcho a-Arnam amen pen semetang-lo.

⁵⁴La pi ejon pathilo, isi athok asonsi inglongpi athak arklilo, lapen amonit aphan la an kepachojisi hang-lo. Latum chodet aphi, latum inglongpi along ajo pangthang-lo.

⁵⁵Puthot adap Laban asu atum aphan lapen asopi atum aphan kechepadi akangjup pen ingjup lo, lapen ahem kechevoijisi damjuilo.