Read Karbi KECHENG 33 Bible Online

KECHENG 33 - Karbi bible

KECHENG 33

¹Iso bang pharophli amonit pen kevang Jakob thek-long-lo, lasi Leah, Rachel, lapen banghini ke-enpangtar apiso atum angbong asomar la thakdak-lo.

²La ke-enpangtar apiso atum lapen asomar atum aphan kechengsi asong along toidunlo, adun Leah lapen asomar atum, lapen aphi si ke Rachel lapen Joseph.

³Jakob latum aphrang dambomlo, lapen a-ik anat patebokbomsi longle athak batai throksi ardomlo,

⁴Bonta laphan kechetong jisi Iso kat-lo, lapen laphan ingjup-lo, Latum banghini ta chirulo.

⁵Iso abang adung arei chelangsi arloso atum, lapen osomar atum aphan thek-longsi arjulo, “Lahei nanglong komat atumlo?” Akehai, lahei ke Arnam mesensi nekepi asomarlo, Jakob thak-lo.

⁶Anke enpangtar a-arloso atum asomar penpen vang-lo, lapen angphun patongkilo;

⁷anke Leah lapen asomar atum nanglelo, lapen kejutsi Rachel lapen Joseph nanglesi latum ta angphun patongkilo.

⁸Iso arjulo, “Hala akaprek asong ne kechetong atum komat-lo. Halatum ke kopi aphanlo?” Jakob thak-lo, “Lake nangpen kangjinso kelongji aphanlo.”

⁹Bonta Iso pulo, “Ne ke do-olo, bong, nangmar an nang chebinon.”

¹⁰Jakob pulo, “Kali, kanghonpen, jongsi ne nangpen kangjinso long-lo pulote, ne kepi adan dengtha. Nang arje ne kethek-longke ne Arnam amahangsi kethek-long asonlo, non nang ko-an kanghon kethe.

¹¹Ne nangphan nangkevanpi adan kanghonpen dengtha; Arnam nephan ingjinsopik-lo, lapen ne kenangji ason an nepilo.” Alangli dengdetik Jakob choningribomlo.

¹²Iso pulo, “Etum olonang, nangtum aphrang ne dambompo.”

¹³Jakob thak-lo, “Osomar atum ingtangtelang nang chinilo, lapen biresak lapen pi ahur, halatum asomar atum aphan ta ne matha nangkok. Latum aphan jongsi arnisi bak kepon pasodak pulote, ahur pen amat thi-etpo.

¹⁴Kanghonpen nang netum aphrang dambomnon, lapen ne vang pajobompo, Edom along ne nangphan pi ahur lapen osomar atum penpen nang-chepho-dundetik ne un an vangbompo.”

¹⁵Iso pulo, “Tangte ne monit ajehak ne nanglong otekangpo.” Bonta Jakob thak-lo, “Lason akenang thangnat ta ave, muthe ne nangpen kangjinso kelongji aphanchot.”

¹⁶Lasi halaso arni Iso atovar Edom anat chevoi pangcheng-lo.

¹⁷Bonta Jakob ke Sukkoth anat si damlo, hadak la amethang aphan ihum ahem chekimlo, lapen pi atum aphan kebeng aroi kimpilo. Laso apotsi laso adim Sukkoth pulo.

¹⁸Mesopotamia pen Jakob nangkechevoi ahut alangli Kanaan adet Shekem arongsopi along nangle pamelo, lapen alangli mukam rongsopi adung isi ahidi along si chekimlo.

¹⁹Alangli rup dum pharo isi anam pen Shekem apo Hamor asu atum pen echet ahidi namdunlo.

²⁰Hadak alangli isi adovan builo, lapen El, Israel a-Arnam pusi amen irlo.