Read Karbi KECHENG 34 Bible Online

KECHENG 34 - Karbi bible

KECHENG 34

¹Arnisi Dinah, Jakob lapen Leah asopi, ajehak Kanaan a-arloso along kevurdamjisi damlo.

²Hivi aso Hamor asopo Shekem, halaso alongri apinpolo, bangpi aphan thek-lok-lo, la bangpi aphan endet si langremlo,

³Bonta osopi laphan palangmepik-lo , bangpi aphan la aninghang-o-lo, lapen ke bangpi aphan kelongji si bor-i-lo.

⁴La apo aphan pulo, “Laso a-osopi nepiso keplangjile piso nehangpi non.”

⁵Asopi aphan langremdet-lo pu Jakob chechinilo, bonta asomar atum pi ahur pen hidi dam-et apotsi, latum vangvetik la thangnat ta klemkledet-lo.

⁶Shekem apo Hamor ke Jakob pen kechingkijisi barlo,

⁷Jakob asomar atum ke hidipen nanglechit anchot-lang. Latum laso alam arjulongsi, latum thirikjok-lo, lapen Shekem lason akam keklem apot aningthihak-lo, lapen Jakob asopi aphan kelangrem pen ajok Israel aso aphan patherk-lo pu aningthilo.

⁸Alangliphan Hamor pulo, “Nelisopo Shekem ke nanglisopi pen si aningchedok-lo, kanghonpen bangpi aphan la pa-enlongnang.

⁹Nanglitum arat pen nelitum arat angbong pache-en-pachedo lonang pu chepathikdet lo nang.

¹⁰Anke nangli nelitum adet along doverlongpo; nanglining kehang adim dolongpo, beha klemlongpo, lapen mar chepahemphu long po.”

¹¹Anke Dinah apo lapen a-ik atum aphan Shekem pulo, “Neliphan la nangkroidunnon lapen nanglitum nanglining kehang aling neli nanglitum aphan nangpipo.

¹²Kopi adan ma kenangji neliphan nethan non, lapen arloso anam ko-an ma ador kepasoji pathiknon; nanglitum kehang aling neli nangpidetpo, jongsi bangpi aphan nanglitum neliphan pangrilong lote.”

¹³Halatum angjir Dinah aphan Shekem langremdet apot Jakob asomar atum Shekem lapen apo Hamor aphan thak parlinlo.

¹⁴Alangli phan latum pulo, “Nelitum angjir areng kecherot-re abangphan penan chopi thekthe; lake nelitum aphan isi ahirjuno plangpo.

¹⁵Nangli pinso atum an nelitum ason areng cherot lote nelitum nangchedon dunthekpo.

¹⁶Anke nelitum ta pupu pangri-pangdon seroi alam aputhak nangchedondun thekpo.

¹⁷Bonta nanglitum jongsi nelitum kepu alam nangchedon-dun thekthe lapen rengcherot-re pulote bangpi aphan nelitum chepondet po lapen damjuipo.”

¹⁸Laso akephar Hamor lapen asopo aphan mesen thek-long-lo,

¹⁹lapen riso abang la keklemji apor padam ingtungte det-lo, pima la Jakob asopi pen aningchedok-lo. La ke ahemtun angbong akenangsot nei abangphulo.

²⁰Rongsopi anghap along Hamor lapen asopo Shekem mei along dunlo, lapen halatum adon arap atum aphan pulo:

²¹“Laso amonit atum jirpo mesen, latum etum adet along nangpadodun lonang, lapen aning kehang aling padam longnang. Longle latum aphan dorphlupji. Latum asopi eli vanlonang lapen esopi ta latum aphan chopi lonang.

²²Bonta alanglitum etum angbong nangdodun nangpo, lapen etum arat pen isinat plang nangpo, ansi eli pinso atum an, latum areng-kecherot asonsi elita cherotdunpo.

²³Latum api ahur kedo-an lapen latum kechepahemphu amar an elitum amar kalidetpoma? La apotsi alanglitum etum angbong nangpadodun-jile eli chekroi dunsarlonang.”

²⁴Hamor lapen Shekem kepinkhat alam rongsopi abang phutin ta chedondunsarlo, lapen pinso atum an amar areng cherot-lo.

²⁵Nithom aphi latum areng amek anta cheparem-relang, Jakob asomar banghini, Simeon lapen Levi, Dinah a-ik atum, anok cheponsi, bang pachininepin pen rongsopi lutdamsi, pinso kedo-an aphan pathi-et-lo.

²⁶Hamor lapen asopo Shekem aphan ta lo. Anke latum Shekem ahem pen Dinah aphan pondetsi damjuilo.

²⁷Kethu-kethat-det aphi Jakob akaprek asomar atum rong lutdamsi angjirpi aphan kelangrem apot alar huilo.

²⁸Pi ahur latum pon-et-lo, chainong ahur, gadha ahur, rongsopi lapen hidi ajo kedo amar an latum pon-et-lo.

²⁹Ador kedo amar asontin, arlosopimar atum lapen osomar atum aphan lapen hem kedo amar anta pon-et-lo.

³⁰Simeon lapen Levi aphan Jakob pulo, “Nangtum nephan nepa sungtang-lo; non Kanaan aso atum, Perizi atum, det abangphutin ta nephan nehijimripo, ne monit ong-e, latum jongsi chingrumpet-ra nephan tengkheng lote, etum ahemtun kangthim virklungpo.”

³¹Bonta latum thak-lo, “Netum angjir aphan bang kedamhur abeisapi aphuthak keklem ason paklem longle.”