Read Karbi KECHENG 35 Bible Online

KECHENG 35 - Karbi bible

KECHENG 35

¹Jakob aphan Arnam pulo, “Non amat Bethel along damseraknon, lapen dodamnon. Hadak Nephan isi adovan nebuipinon, nang ik Iso pen nang kekat ahut nang kecheklang a-Arnam aphan.”

²Lasi hem isi aphan Jakob thanlo, lapen alanglilong kedo atum an aphan thanlo, “Bang adet a-arnam-heihei pen nangtum che-onon; nangtum chepangthirnon lapen pe kangthir chepindengnon.

³Etum ladak onangpo, lapen Bethel damnangpo, nekesung ahut nekerap abang lapen ne kedamtang alongtin nekedo dunkri a-Arnam aphan hadak ne isi adovan buinangji.”

⁴Lasi latum bidet arnam-heihei kedo-an Jakob aphan pi-et-lo, lapen latum kechingthang anorik-heihei ta pi-et-lo. Alangli lahei Shekem tarabeng athengpi arum si pip-lo.

⁵Jakob lapen asomar atum ke-oji kecheng ahut, adung arei arong-heihei arat aphuthak jasemet kephere vang-lo, lapen latum alangli tum aphi-phi hungdunde det-lo.

⁶Kanaan adet Luz pu adim, nonke Bethel pusi chethang-lo, laso adim Jakob lapen alangli rat atum an vangpet-lo.

⁷Hadak alangli isi adovan builo, lapen adim amen Bethel a-Arnam amen irphit-lo, pima a-ik pen alangli kekat ahut laphan Arnam amethangsi cheklang-lo.

⁸Rebeka a-obok Deborah thilot-lo, lapen Bethel anitur tarabeng arum si pip-lo. Lasi la amen “Kechiru atarabeng pulo.”

⁹Mesopotamia pen Jakob nang-chevoidet aphi Arnam alangliphan puthot cheklangthulo, lapen alangphan pahirjumelo.

¹⁰Alangliphan Arnam pulo, “Nangmen ke Jakob, bonta pini pen nangmen Israel lo.” Lasi Arnam alangliphan Israel pu amen irlo.

¹¹Lapen laphan Arnam pulo, “Ne ke Jakongtheparpik Abang. Osomar chepa-ong-onon. Nangpen khei atum plangpo, lapen nang ke recho atum aphusar manpo.

¹²Ne Abraham lapen Isaak aphan kepi alongle la nangphan lapen nangso nangsu atum aphan nangthilot aphi ne nangpidetpo.”

¹³Anke Arnam laphan obub-lo.

¹⁴Hadak, laphan Arnam kepu adim, Jakob isi kechematha-dam a-arlong elo, lapen la drakha ahorlang lapen jit ajangthu kedung pen ajok pangthirlo.

¹⁵Alangli bangso adim amen Bethel irlo.

¹⁶Jakob lapen la ahemtun Bethel olo, lapen latum Ephrath pen helovinglang, Rachel oso amahang kepathek ji apor nangletang-lo, lapen bangpi sungnangpik-lo.

¹⁷Bangpi sopik khangjangsi, a-obok bangpi aphan pulo, “Rachel phereri, la pinso a-osolo.”

¹⁸Bonta bangpi kethipo pulo, lapen achethe kechevung ahut bangpi asopo aphan Benoni pu amen irlo, bonta apo ke laphan Benjamin pusi irlo.

¹⁹Rachel thilot-lo, bangpi aphan Ephrath atovar akung anatsi pip-lo, Non ke la Bethlehem pusi chethang-lo.

²⁰Hadak Jakob isi kechematha dam a-arlong isi elo, lapen pini anta laso adim Rachel athirilo pu pangthek-lo.

²¹Jakob dambomsi Eder ahemchardon parai si amukam chekimlo.

²²Halaso adet Jakob kedo un ahut, Reuben ke apo ke-enpangtar apiso, Bilhah pen irap-rap-lo, Jakob laso alam arjulongsi aningthihak lo. Jakob asomar bang krehini dolo.

²³Leah pen aso ke Reuben (aso-akleng), Simeon, Levi, Judah, Issakar, lapen Zebulun.

²⁴Rachel pen aso ke Joseph, lapen Benjamin.

²⁵Rachel abanpi, Bilhah asomar ke Dan lapen Naphtali.

²⁶Leah abanpi, Zilpah asomar ke Gad lapen Asher, Lahei asomar ke Mesopotamia si amahang-kethek.

²⁷Jakob ha apo Isaak kedo adim Mamre damlo, Hebron adung, ladak si Abraham lapen Isaak atum dolo,

²⁸Isaak ningkan 180 an reng-lo.

²⁹lapen sarpame si thilong-lo; lapen laphan asopo Iso lapen Jakob si pip-lo.