Read Karbi KECHENG 37 Bible Online

KECHENG 37 - Karbi bible

KECHENG 37

¹Jakob ke Kanaan adet si doverlo, hadaksi apo atum ta dolo,

²lapen Jakob ahemtun atomo la helo. Joseph, inut ningkan krethroksi ariso, la apo enpangtar apiso, Bilhah lapen Zilpah asomar, la a-ik atum pen pen biresak lapen bi hei hei langbomlo. A-ik atum kehingno keklem alam apo aphan la thanlo.

³Akaprek asomar apar Joseph aphan Jakob chinghon muchot-lo, pima la kesar ahut si laphan la amahang-thek pilo. Laphan alangli epak arikeding achoidingpo paroipilo.

⁴Latum aphan apar latum apo abang Joseph aphan inghon muchot thek-longsi, amu aphan latum lapu-an langselet-lo, latum laphan ingki pameme det-lo.

⁵Ningve isi Joseph mang heman-lo, lapen la a-ik atum aphan laso alam kethan apot a-ik atum laphan langselet muchot-lo.

⁶La pulo, “Ne keheman nemang alam arjutha.

⁷Etum kadokaveta soktipli apeng kerak ahut nesok apeng abang thursom si arjap pakengsonlo. Nangtum asok apeng ke nesok apeng aphan komdirlo, lapen la aphan angphun patongkika lo.”

⁸“Nang inut arecho plangji putong nang kechemathama, lapen netum aphuthak pangrijima?” A-ik atum arjulo. Lasi latum laphan ansose langselet-lo, pima la amang alam lapen halahei la kepu apot.

⁹Anke Joseph akaprek amang thek-long tang-lo, lapen a-ik atum aphan thanlo, “Ne akaprek amang thek-longlilo, halabangso along ne, arni, chiklopi, lapen chiklolongso kre-isi latum nephan nekardomri thek-long-lo.”

¹⁰Laso amang alam la apo aphan chethanlo, lapen apo abang laphan ingchek-lo: La kopi amang-lo? Nangpei, nang-ik atum an, lapen ne ta nangphan nangcho-ardom nangjilangma?

¹¹Joseph a-ik atum laphan langselet-olo, bonta apo ke laso alam aputhak mathabomlo.

¹²Arnisi Joseph a-ik atum, apo api ahur kevijisi Shekem anat damlo,

¹³Joseph aphan Jakob pulo, “Nang ik atum pi ahur kevi adim, Shekem anat nang kedamji aphan ne ninghang-lo.” Joseph thak-lo, “Ne dampo.”

¹⁴La apo pulo, “Damra nang-ik atum mephunlangma lapen pi ahur ta dopet ma langdamtha; anke nangchevoira nephan nethan non.” Lasi Hebron Arlok pen laphan apo toijuilo. Joseph Shekem along nanglelo

¹⁵lapen keriduntap keridunphru ahut inut amonit laphan arjulo, “Nang kopisi kerilo?”

¹⁶“Pi ahur kevi ane-ik atum aphansi ne keri, “ la thak-lo. “Nangli latum konat si kedoma nelithan thekjima?”

¹⁷Bangpo abang thak-lo, “Latum dak o-et-lo, Latum Dothan anat si kedamji pu ne arjudun long-lo.” Lasi Joseph a-ik atum aphi aphi ridunlo lapen Dothan along latum aphan thek-long-lo.

¹⁸Laphan achar pen latum thek-long-lo, lapen halatum along la kele aphrang, laphan kepathijisi halatum mang-lo lapen chesik-lo.

¹⁹Latum lahin lahin chethan seroilo, “Mang keheman abang ladak vang-lo.

²⁰Non vangpetnon, eli laphan pathilot-lonang lapen la abang arpum lang kave alangtuk arlo jokchok-lonang. Laphan ingnam api si pathilot-lo pule than-lonang. Anke eli lang-lonang, la amang kopi cheplang thekjima.”

²¹Reuben halahei arjulong-lo, lapen Joseph aphan keraiji bor-i lo. “Laphan eli pathinangne,” la pulo.

²²“Kejejangtang ajo alangtuk arlo le jok-chotnon, bonta laphan phangnori.” Alangli la so alam pulo, lake laphan halatum pen kepajokji si kemang-lo, lapen apo along ketoijuiji si kemang-lo, lapen apo along ketoijuiji aphan lo.

²³A-ik atum along Joseph nangkele ahut, latum laphan arikeding achoidingpo phlokjok-lo.

²⁴Latum laphan ponsi lang kave alangtuk arlo jokdamthot-lo.

²⁵Latum an kechobom ahut, menmen latum Gilead pen Ijip anat Ishmael aso atum esong kevang thek-long-lo. Halatum aka-ut mosola-heihei, lapen jangthu-heihei si arthang-lo.

²⁶Judah abang a-ik aphan pulo, “Etum ebong aphan pathilotpen lapen prankarmut kedip pen kopi ale si kedopo?

²⁷Laphan eli lahei Ishmael aso atum along chojor dundet-lonang. Anke eli laphan phangno jokphlotpo, jat-le pu seta, la ebong-lo, emethang a-ok lapen avi apok abong-lo.” La akorte atum chedondunlo,

²⁸lapen ajehak Midian aso akiripo atum nanglelo, a-ik atum Joseph aphan langtuk arlo pen rung si, Ishmael aso arideng laphan rup dum ingkoi pen jordet-lo, laphan latum ha Ijip pondet-lo.

²⁹Langtuk along Reuben chevangthulo, lapen hadak Joseph aphan thek-longle det-lo, aning ke oi pen ape chingsek lo.

³⁰Akorte atum along la damsi pulo, “Oso hadak avedet-lo! Ne kopisi klempoma?”

³¹Anke latum ejon abi that-ot-lo, lapen Joseph achoidingpi la avi athak tut-lo.

³²Choidingpi latum apo along pondet-lo, lapen pulo, “Netum la si longchot-lo. La nangsopo achoi kalima?”

³³Alangli la pangthek-unlo lapen pulo, “Kalang-lo, la ke alang choilo! Ajehak ingnam api si laphan pathilot-lo. Nesopo Joseph aphan ingsek-i-lo!”

³⁴Aningduk si Jakob ape chingsek-lo, lapen pethoila che-umlo. Asopo aphan alangli penang an arni ningduk-lo.

³⁵Asopomar lapen asopimar kedo-an laphan than-pangsamlo, bonta alangli ning chepangsamji molo, lapen pulo, “Nesopo aphan kechiru kechiru pen chepathipin po.” Lasi alangli sopo Joseph aphan aning chepadukbom-lo.

³⁶Halaso ahut, Ijip along, Midian aso atum Joseph aphan Potiphar arideng jordet-lo, alangli recho a-saihemphulo, lapen rechohem keton atum ahemphulo.