Read Karbi KECHENG 38 Bible Online

KECHENG 38 - Karbi bible

KECHENG 38

¹Halaso ahut malom Judah ke a-ik atum aphan obub-lo lapen Hirah pu amonit along kedodunjisi damlo, Hirah ke Adullam arong pen.

²Hadak inut Kanaan a-osopi, apo amen ke Shua, pu aphan Judah chetong-lo. Bangpi aphan alangli en-det-lo,

³lapen laphan bangpi inut sopo amahang pathekpilo, laphan la amen Er pusi irlo.

⁴Bangpi puthot oso chopathethulo, lapen sopinso inut amahang-pathek-lo, lapen laphan Onam amen irlo.

⁵Puthot bangpi inut sopinso dothulo, lapen laphan Shelah pu amen irlo. Oso amahang kethek ahut Judah ke ha Akhzib si do.

⁶Aso akleng Er aphan, Judah piso inut ripilo, amen ke Tamar.

⁷Er a-ot hingnodak, lapen la HEMPHU aphan aning padokdelo, la apotsi HEMPHU laphan pathilot-lo. Anke Er akorte Onam aphan Judah pulo,

⁸“Damra nang-ik ahemepi along i-dunnon. Bangpi aphan nang keklemnangji apenan akorte nangdeng paplengnon, ansi nang-ik apoton dopo.”

⁹Bonta Onam chechini lo, osomarke alang pharman kalilo, lasi la a-ik ahemepi pen dim-tar pasi lote, la amar alang longle athak si paklolo, anke a-ik apharman osomar avedetpo.

¹⁰Alangli keklem akam ke HEMPHU aphan aning padokdelo, lapen HEMPHU laphan ta pathilot-lo.

¹¹Anke amunpi Tamar aphan Judah pulo, “Nanglipo ahem chedamthunon lapen nelisopo Shelah the-thetik pahemevernon.” Alangli la kepu lahelo, a-ik atum ason thakthak Shelah aphan ta pathilot na pu pherelo. Lasi Tamar apo ahem chedamjuilo.

¹²Penang an aphi Judah apiso ta thilot-lo. Alangli aning keduk apor jut si, alangli lapen alangli jirpo Adullam asor, Hirah penpen ha Timnah anat damlo, hadak alangli biresak aphan angmi ingtip-po.

¹³Alok-hei abiresak angmi kangtipjisi Tamnah anat dambomlo pu mane Tamar aphan thanlo.

¹⁴Lasi bangpi kechingthang-bom hemepi ape chelar si, amahang pe chekurkilunlo, lapen Enaim kelut atovar along ingnilunlo, la Timnah anat kedam atovar arongso lo. Judah asopo akebisi Shelah abang thedung-lo pu bangpi chini pamelo, lapen bangpi aphan non an ta pa-en-elang.

¹⁵Judah bangpi aphan thek-longsi bangpi inut abeisapi pusi mathalo, pima bangpi amahang chekurkithip-lo.

¹⁶Bangpi anat alangli damhamlo, ha tovar akung anat lapen pulo, “Mesenlo, nang ko-ansi anam kehangpo?” (Bangpi ke alangli munpilo pu alangli chechininedet-lo.) Bangpi pulo, “Nangli neliphan kopilo nekepipo?”

¹⁷Alangli thak-lo, “Ne pi ahur pen nangphan ejon abi nangpipo.” Bangpi thak-lo, “Mesen, nangli bi nangthonthe aphrang kopine asim neliphan pi tekangjima?.”

¹⁸Isi asim ne kopisi nangkepi nangpo? alangli arjulo. Bangpi thak-lo, “Nanglisap ketheng a-arnan lapen nangli ke-ot dong achin.” Lahei alangli bangpi aphan pidet-lo. Anke latum dim-tar pasilo, lapen bangpi oso-chopathelo.

¹⁹Tamar ahem chedamjuilo, bangpi kechekurki ape chephlokjok-lo, lapen hemepi ape chepindengthulo.

²⁰Hirah aphan Judah ke bi papontoilo, lapen arloso aphan alangli kepitekang sim-bon ta pavantoilo, bonta bangpi aphan Hirah thek-longle det-lo.

²¹Enaim along alangli ajehak amonit aphan arjulo, “Tovar akung kedo abeisapi konat-lo?” Ladak beisapi aphrang penta ave, latum thak-lo.

²²Alangli Judah along chevoilo, lapen pulo, “Bangpi aphan neli thek-longle det-lo. Hadak lason abeisapi aphrang penta ave pusi hadak kedo amonit atum pulo.”

²³Judah pulo, “Bangpi le mar pakhang-lonang. Etum aphan bang epangnekchoi longle-det nangji. Bangpi aphan ne anam kepiji bor-ilo, bonta nang bangpi aphan longle det-lo.”

²⁴Chiklo jonthom anbak aphi mane Judah aphan pulo, “Nangmunpi Tamar ke beisapi asonsi cheplang-lo, lapen non bangpi oso-chopathelo.” Judah hukumpilo, “Bangpi aphan pondet-ra me phrindutnon.”

²⁵Bangpi aphan kepon ahut, alok-hei aphan bangpi lam pathan damtoilo: “Lahei amar ahemphu pen ajoksi neli oso chopathelo. Lahei langnon, lapen lahei komat amar ma langnon-laso asap a-arnan lapen laso achin.”

²⁶Lahei Judah pangthek undet-lo, lapen pulo, “Bangpi ahok si kedo. Bangpi aphan keklempi nangji akam ne klempipedet-lo-bangpi aphan nesopo Shelah pa-en nangji apot-lo.” Bangpi pen Judah aphi an dim-tar pasise det-lo.

²⁷Bangpi oso amahang kepathekji apor nangkele ahut, bangpi oso-cherop kelongji chinikoilo.

²⁸Bangpi oso amahang kepathek ahut, inut bang ari nangchejarlo, lapen oso mahangkethek kerapdun a-arloso la otdundong si honjeng ke-er kokdunlok-lo, lapen pulo, “Labangsi mahangkethek paphrang.”

²⁹Bonta la ari chesanthudet-lo, lapen akleng abang si mahangthek paphrangrong-lo. Anke oso amahang-kethek kerapdun abangpi pulo, “O nang lasonsi nangbar paphrang-lo!” Lasi laphan ke Perez pusi amen irlo.

³⁰Anke la abong honjeng ke-er kekok abang mahang nangthek-lo, lapen la amen Zerah irlo.