Read Karbi KECHENG 40 Bible Online

KECHENG 40 - Karbi bible

KECHENG 40

¹Penang an arni aphi, Ijip arecho ahor lapen ahim ahemari kethe atum recho aphan aning pakang-lo.

²La banghini aban atum aphan alangli aningthilo,

³lapen keton ahemphu ahem along latum aphan bengchok-lo, ha Joseph aphan kebeng adim along.

⁴Latum hemkangsam arlo penang an arni donang-lo, lapen kebeng ahemphu abang Joseph aphuthak halatum aban paplangtoilo.

⁵Ningve isi hemkangsam arlo, hor ahemaripo lapen him ahemaripo latum abangphutinta amang hemanlo, lapen amang athe ta prekjamlo.

⁶Latum along Joseph adapprang kevang ahut, latum aning kebi la thek-long-lo.

⁷Latum aphan la arjulo, “Kopi apotsi nanglitum pini lapu-an kematha kesung asonlo?”

⁸Latum thak-lo, “Netum abang-phutin ta mang hemanlo, lapen mang athe kopima, ladak baduta nekethan abang ave.” Arnam si mang athe kethan ajakong pi-unchot, Joseph pulo. Nanglitum amang neliphan nethannon.

⁹Lasi hor ahemaripo abang pulo, “Ne mang ke ne ingno erong drakha arikang thek-long-lo,

¹⁰la along rothom dolo. Arvo kechingjok pen amat, angphar pangpharlo, lapen athe men-ang-lo.

¹¹Neli recho aharlung otdong-lo, lasi neli drakha athe enlo, lapen lahei harlung arlo sorlo, lapen alangliphan la pilo.”

¹²Joseph pulo, “La-so amang athe ke lahelo: Aro kethom la ke nithom aphanlo.

¹³Nithom aphi recho nangliphan lo-po, nangli diyapo, aphrang akamthot nangpithupo. Nangli alangli hor ahemari aphrang kedo asonthotsi nangli alangliphan harlungpipo.

¹⁴Bonta kadokave nangli phan mesenlo pulote neliphan kanghonpen chematha ik-tha, lapen neli lam kanghonpen recho aphan pinpur iktha lapen laso ahemkangsam pen kebar thekjile nerap iktha.

¹⁵Jonghe seta neliphan Ibri atum adet pensi ne nep-ponchek-lo, lapen ladak Ijip along seta nephan nekebengchok nangji adai akam neli klemklelang.”

¹⁶Hor ahemaripo aphan kethan athe akemesen pu him ahemaripo abang Joseph aphan pulo, “Nelita mang hemanlo; neli tonthom ahim parpu ponlo.

¹⁷Athaksi aton along ke recho kecho amar an ajat ajat dolo, lapen vo atum lahei cholo.”

¹⁸Joseph thak-lo, “Laso amang athe ke lahelo: tonthom ke nithom aphanlo.

¹⁹Nithom aphi nangliphan ta recho nang-lophlotpo, lapen nangliphu nang ingthanpetpo! Anke alangli nanglibang arpum nujok ehong along vek-lokpo, lapen vo atum nangli-ok chopo.”

²⁰Amahang kethek arni nithom aphi kadokave aban atum aphan kecho-i amei recho pathik-lo; alangli hor ahemaripo lapen him ahemari kethe aphan lophlot-lo lapen alangli ban atum angno vandet-lo.

²¹Hor ahemaripo aphan alangli aphrang akamthot pacheklemtoilo,

²²bonta him ahemarikethe aphan alangli pathilot-lo. Joseph kepu atengsi la kadokave ta plang-et-lo.

²³Bonta Hor ahemaripo abang Joseph aphan mathathepin-alangli alam laphan la tengnebub-lo.