Read Karbi KECHENG 42 Bible Online

KECHENG 42 - Karbi bible

KECHENG 42

¹Ijip along sok do pu Jakob arjulongsi, asomar atum aphan alangli pulo, “Nangtum pine eson klemnon,

²Ijip adet sok do pu alam ne arjulong-lo; kangchir kethinangpen kejokjile hadak damra ajehak asok nam damnon.”

³Lasi Joseph a-ik bangkep atum Ijip adet sok kenamjisi damlo,

⁴bonta Joseph amu apok Benjamin aphan Jakob latum along toidunde det-lo, pima la pine cheplangdetna pu alangli pherelo.

⁵Sok kenamjisi Jakob asopo atum akaprek pen vang-lo, pima halaso ahut Kanaan adet ta akhim thurlo.

⁶Joseph, Ijip adet a-Govornor ke pirthe adang bithe pen kevang arat atum aphan sok jorlo. Lasi Joseph a-ik atum vang-lo, lapen aphu longle paphosi alangliphan ardomlo.

⁷A-ik atum aphan Joseph thek-longsi, latum aphan alangli chinilo, bonta halatum aphan alangli chininepin asonben si cheplang lo. Latum aphan alangli pasedengkok-lo. Nangtum konat pensi kevang-lo? Nelitum sok kenamjisi Kanaan adet pensi kevang-lo, latum thak-lo.

⁸A-ik atum aphan Joseph chinilo seta, latum alangliphan chini ne det-lo.

⁹Latum aphuthak alangli kethek-long amang alam alangli chemathalo lapen pulo, “Nangtum kelengchonghu atum, netum adet kodak si ajakong kave ma la kerijisi nangtum kevang-lo.”

¹⁰Kali akehai, latum thak-lo. “Nelitum ke nangliban asonsi sok kenamji aphan vang-lo.

¹¹Nelitum ke kadokaveta korte saidelo. Nelitum ke kelangchonghu atum kali, akehai, nelitum ke athikpet atumlo.”

¹²Latum aphan Joseph pulo, “Kali! Netum adet kodaksi ajakong kavema kelangjisi nangtum kevang-lo.”

¹³Latum pulo, “Nelitum kadokave korte bangkrehini do, akehai, Kanaan adet along po inutpet asomarlo. Inut akorte ke thilot-lo, lapen akebisi abang ke nelitum apo alongsi non dolo.”

¹⁴“La ne kepu tang asonthot-lo, “Joseph thak-lo.” Nangtum kelang chonghu atumlo.

¹⁵Nangtum aphan lasonsi asat langpo: Ne recho amen pen semetang-lo, nangtum akorte akebisi aphan ladak vanvetik-ke nangtum ladakpen damlongle.

¹⁶Nangtum angbong inut abang damra laphan endamnon. Akaprek atum anke nangtum keputang alam ahok chekok ke tik ke nangtum aphan nangtondingpo. Kalite, recho kerenglang asonthotsi nangtum ke kelangchonghu atumlo.”

¹⁷Anke alangli latum aphan nithom hemkangsam bengthot-lo.

¹⁸Kethom arni latum aphan Joseph pulo, “Ne ke Arnam aphan kephere amonit, lapen eson alam pen ajok ne nangtum apran pajokpo.

¹⁹Nangtum athikpet lo pu aporman kepaklangjile nangtum angbong inut abang nangtum aphan kebeng ahem kangsam adim dokoknon, lapen ahin atum an ke nangtum kangchir ahem asor aphan nangtum kenamtang asok ponpira hem chedam non.

²⁰Anke nangtum nelong nangkorte akebisi van nangji. La pen ajoksi nangtum nekethan alam ahokpet pu aporman paklangpo lapen nangtum aphan ne nang pathithelo.” Laso alam latum chedondunlo,

²¹lapen lahin lahin chepulo, “Chenamsi emu aphan eli keklem apotsi eli laso anam non kephonang-lo; hala kerap kechohang kar-em ahut ko-an kesungpik kepholoma eli thek-long-lo, bonta eli arjudun long-lo. La apotsi eli non lapu-an kesungnang.”

²²Reuben pulo, “Oso aphan thangta klemri pu ne nangtum aphan nangpulo ke, bonta nangtum ne arjuje. La kethinang apotsi non eli anam ketunang-lo.”

²³Latum kopima kepu Joseph chinilo, bonta laso alam latum chechinine, pima latum kechingki ahut lamkelar atum pen ajoksi chingkilo.

²⁴Latum aphan Joseph otekang-lo, lapen kechiru pangcheng-lo. Alangli puthot keningje ajakong chelongsi, chevangthulo, Simeon aphan ingvaisi halatum angno pangnangchek-lo.

²⁵A-ik atum athoila sok kepathapjisi Joseph hukumpilo, lapen abangphutin athoila arlo atangka ta pathap dunrep-lo, lapen tovar kedam aphan anbor halatum aphan papiduntoilo. Lahei klem-et-lo.

²⁶A-ik atum kenam asok halatum agadha athak arthangrep-lo, anke latum damlo.

²⁷Ajo latum kesang adim, latum angbong inut abang gadha aphan an kepijisi athoila ingpulo, lapen athak si atangka chethek-long-lok-lo.

²⁸“Ne tangka nephan nevoiphak-lo,” la akorte atum aphan chehang-lo. “Ladak nethoila arlosi do!” Latum aning ardik-hup-lo, lapen pheresi lahin lahin latum che-arjuseroilo, “Ephan Arnam kopisi ekeklemloma?”

²⁹Kanaan along latum apo Jakob along nangkele ahut, alangliphan latum la keplangtang an alam than-et-lo:

³⁰“Ijip a-Govornor netum aphan lamtang pen nepulo, lapen alanglidet aphan kelangchonghu pusi netum aphan nekebok.

³¹‘Netum ke kelangchonghu atum kali, ‘pusi netum thakdunlo, ‘netum ke athikpet amonit atum.

³²Netum kadokave korte bangkrehinido, lapenpo inut pet lo. Inut akorte abang ke thilot-lo, lapen akebisi abang ke Kanaan adet nepo alongsi do.’

³³Bangpo nethak lo, ‘Nangtum jongsi athikpet amonit pulote lasonsi ne asat nanglangpo; Nangtum angbong inut abang nelong dokoknon, kaprek atum an ke nangtum kangchir ahem asor aphan sok ponpira damnon.

³⁴Nelong nangtum akorte akebisi vannon. Anke nangtum kelangchonghu atum kali, bonta athikpet amonit pu chinipo; nangtum akorte aphan ne nangpithudetji, lapen nangtum ladak do-unji lapen beha ta klem-unji.’ ”

³⁵Anke latum athoila keho ahut latum abangphutin ta atangka athia chelongpet-lo; latum tangka theklongsi latum lapen apo Jakob ta pherelo.

³⁶Latum aphan apo pulo, “Nangtum nephan nesomar kedo-an ta papangbo-toipoma? Joseph ke avedet-lo; Simeon ta avedet-lo; lapen ke non nangtum Benjamin aphan ta keponjisi nangninghang-lo. Ne si kesung nang-lo!”

³⁷Apo aphan Reuben pulo, “Nang-phan jongsi ne Benjamin nangvanpi thekthe pulote nesopo banghini aphan nang pathilot tame. Laphan ne rideng padolongnon, lapen laphan ne vanthudetpo.”

³⁸Bonta Jakob pulo, “Neso nanglong nang-lodunde; la a-ik ta thilot lo, lapen la inutvet-lo. Tovar la aphuthak pine cheplangdet tahai. Ne ke sartang-lo, lapen nangtum neningpaduk-loksi thinangpo.”