Read Karbi KECHENG 45 Bible Online

KECHENG 45 - Karbi bible

KECHENG 45

¹Aban atum angno Joseph aning alam chekhang un-edet-lo, lasi alangli kadokave atum aphan angdeng pen kepadam-etji aphan hukumpilo. Joseph komatma a-ik atum aphan lam kechethan ahut baduta ave.

²Alangli lapu-an ase kethepen chirulo, Ijip aso atum anta arjulong-et-lo, lapen laso abirta rechohem anta palerok-lo.

³Joseph ke a-ik atum aphan pulo, “Ne helo Joseph lo. Nepo reng-et-langma? Bonta a-ik atum laso alam arjulongsi latum lapu-an pherelo, latum thakdun-thekthe det-lo.

⁴Anke latum aphan Joseph pulo, ‘Kanghonpen nedung nangpateboktha.’ Latum patebok lo, lapen alangli pulo, ‘Neke nangtum akorte Joseph lo, nangtum Ijip adet kejordundet abang-lo.

⁵Non nephan ladak nekejordet apot nangtum methang aphuthak ning chepa-oi mate adai chetin rinon. Rat atum aphan kepajokjisi nangtum aphrang Arnam si nephan ladak nangtoilo.

⁶Lake det adang akhim kethur hini aningkan chot-lang; non ningkan pho haikebai-longle lapen kerot-longle dojilang.

⁷Nangtum aphan lason manghumeme kepajokjisi lapen nangtum lapen nangso-nangsu atum aphan kepareng longvekjisi nangtum aphrang nephan Arnam netoilo.

⁸Lasi nangtumle nephan ladak nangketoi kali, bonta Arnam si Alangli nephan recho kethenei aban nebat-lo. Ne si alangli det kelang ahemphulo; ne si Ijip adang an kepangri abang-lo.’ ”

⁹Epo along damseraknon lapen asopo Joseph si kepulo pura alangphan thannon: “Ijip adang bithe kepangri abang nephan Arnamsi nebat-lo; paderdepin pen nelong vangnon.

¹⁰Nangtum Goshen alongri nedungle donon-nangtum, nangsomar atum, nangso-nangsu atum, nang biresak atum, nangbi, nangchainong, lapen nangtum kopima kedo ason an.

¹¹Nangtum jongsi Goshen along dolote, ne nangtum aphan nang langthekpo. Non ningkan pho akhim thurjilang; lapen nang, nanghemtun isi, lapen nang mar api an kangchirnang nening hanghe.”

¹²Joseph ningjebomlo, “Non nangtum kedo-an lapen nang Benjamin ta chinilorlo ne Joseph lo.

¹³Ne Ijip adet ko-an jakongkethepik loma nepo aphan thannon, lapen nangtum kethek-long an asontin alam alangphan than-etnon. Lapen damserak-ra laphan ladak vandet-non.”

¹⁴Alangli alangli amu Benjamin aphan bamhetsi chiru pangcheng lo; Benjamin ta bamhetsi chirulo.

¹⁵Anke latum lahin lahin chebamsi lapen korte hijan chingjup seroilo. Laso aphi akorte atum alangli pen chingki pangcheng-lo.

¹⁶Joseph akorte atum nanglelo pu abirta rechohem lelo, recho lapen asaihemphu atum aning ingsampik-lo.

¹⁷Alangli Joseph aphan pulo, “Nang ik atum aphan thannon, halatum api anghor pacharthangra Kanaan adet pachedamnon.

¹⁸Latum apo lapen halatum ahemtun pachevanra ladak pavang-etnon. Latum aphan ne Ijip adet alongle kemenei pipo, lapen latum kerengji aphan dorphlup longpo.

¹⁹Halatum apiso atum lapen osomar atum aphan lapen apo kevangjile Ijip adet hem-kong-long-heihei latum kepaponjile latum aphan thannon.

²⁰Latum amar-atar aphi ke-otekang-nang apot latum thangnat ta matha nangnelo; Ijip adet akemenei latum amar plangpo.”

²¹Latum aphan kepu ateng Jakob asomar atum klemlo. Recho hukum kepi ateng latum aphan hemkonglong-heihei lapen tovar aphan anbor Joseph pidunlo.

²²Latum abangphutin aphan pe-ri asele alangli pidunlo, bonta Benjamin aphan alangli rup dum 300 lapen pe-ri chorpho pilo.

²³Alangli apo aphan jonkep agadha anghor Ijip adet angbong akemenei amar lapen tovar kevangji ahut kechoji aphan gadha jonkep anghor asok, ahim, lapen akaprek ason lodunlo.

²⁴Akorte atum aphan alangli toilo lapen latum aphan pulo, “Tovar chebohongri.”

²⁵Latum Ijip adet osi Kanaan adet halatum apo Jakob along ahem chevoilo.

²⁶“Joseph ke thithelang!” Jakob ke mongthing-lo, lapen latum aphan kroithekthe det-lo.

²⁷Bonta Joseph latum aphan kethan alam an alangliphan kethan ahut, lapen alangliphan Joseph Ijip adet keponji pura nangkelodun hem-kong-long-heihei alangli thek-longsi, alangli kemanghuhak pen melo.

²⁸“Nesopo Joseph nonta reng-et-lang” alangli pulo. “Lahelo ne karjuji-an nening kehang! Ne thithe ako dam si alangphan langdamvekji.”