Read Karbi KECHENG 47 Bible Online

KECHENG 47 - Karbi bible

KECHENG 47

¹Lasi Joseph a-ik atum bangpho aphan pon si recho along damlo. Alangli pulo, “Nelipo lapen neli-ik atum latum api ahur lapen amar atar penpen latum Kanaan adet pen vang-lo. Latum non Goshen alongri si do.”

²Anke alangli a-ik atum aphan recho angno paklang-lo.

³Recho latum aphan arjulo, “Nangtum akam kopi?” Nelitum ke kevi-atum, akehai, nelitum aphusar atum keklem ason, latum thak-lo.

⁴“Nelitum laso adet kedoji ninghang-lo, pima Kanaan adet akhim lapu-an kethurlo, hadak pi keviji aphan adim avedet-lo. Kanghonpen Goshen alongri kedolongji aphan hukum nelipi-iktha.”

⁵Joseph aphan recho pulo, “Non nanglipo lapen nangli-ik atum nangle tang-lo,

⁶Ijip adet ke latumlo. Latum akemenei alongle Goshen alongrile padonang. Lapen jongsi latum angbong keklemthek abang do pulote nepi ahur kelang abang pachehemphunang.”

⁷Joseph apo Jakob aphan vansi alangliphan recho angno ponlo. Jakob ahirjume recho aphan pilo,

⁸lapen alangliphan recho arjulo, “Nangli arta ko-anlo?”

⁹Jakob thak-lo, “Neli kedamtap akai ningkan 130 an damtang-lo. Lahei aningkan malomsovet lapen sungpik, neliphusar atum kedamtap ajirkeding kai ason kali.”

¹⁰Recho aphan Jakob isi kechekak ahirjume pitekangsi damjuilo.

¹¹Anke Joseph apo lapen a-ik atum aphan Ijip along padolo, lapen Remeses arongsopi adung kemenei alongle latum aphan pachepahemphu toilo, la recho hukum kepi ateng-lo.

¹²Joseph apo aphan, a-ik atum aphan lapen apo ahemtun kedo-an aphan, lapen kebinei aphan sok-sang pilo.

¹³Akhim lapu-an thurlo, nahokta an avedet-lo, lapen Ijip aso lapen Kanaan aso atum kangchirpen ainihak-huk-lo.

¹⁴Latum sok nang nam si, Joseph kedo-an atangka pangrumsi rechohem ponlo.

¹⁵Ijip adet lapen Kanaan atangka kedo-an padam-et aphi, Ijip aso atum vangsi Joseph aphan pulo, “Nelitum aphan sok-sang nepinon! Nelitum aphan pathilongri. Pine klem iknon! Nelitum atangka an dam-et-lo.”

¹⁶Joseph thak-lo, “Nanglitum atangka jongsi dam-et-lo pulote, nanglitum kepangreng api vannon, sok pen chelar lonang.”

¹⁷Lasi Joseph along latum kepangreng api vanlo, lapen latum alosei, abiresak, abi, achainong, lapen agadha alar alangli sok-sang pidunlo. Halaso aningkan latum aphan alangli halatum kepangreng api alar sok-sang pidunlo.

¹⁸Aphi aningkan latum vangsi pulo, “Nanglipen nelitum thangnat asonta kepatu ji ason ave, akehai, nelitum atangka an ta dam-et-lo, lapen nelitum kepangreng api anta nanglilongsi do-et-lo. Nangliphan nelitum abang arpum lapen longle pen apar thangnat ta nanglikepiji ason avelo.

¹⁹Nelitum aphan pathilongri. Pine klem-iktha! Nelitum ahidi pasamphridang longri. Sok-sang pen nelitum aphan lapen nelitum ahidi nenamdetnon. Nelitum recho aban plangpo, lapen alangli nelitum alongle cherailongpo. Nelitum kerengji aphan sok, lapen kerikji aphan chili nelipinon.”

²⁰Recho aphan Ijip along kedo-an alongle Joseph nampilo. Ijip aso abangphutin ta alongle chejor nangkok-lo, pima akhim kethur sodak; lapen longle kedo-an ta recho amar plang-et-lo.

²¹Ijip arat kecheng ahin pen ha kejut an aphan Joseph ban pinchong-et-lo.

²²Kurusar atum alongle si alangli namnechot. Latum longle jor nangne, pima latum kerengji aphan recho tangka pilo.

²³Rat atum aphan Joseph pulo, “Langnon, non nanglitum aphan lapen nanglitum alongle recho aphan ne nangnam det-lo. Ladak kerikji aphan chili dolo, la nanglitum aphanlo.

²⁴Kerot ahut phanpho pen ephan nangtum recho aphan pinangji. Ahin an ke chili lapen nanglimethang lapen nanglitum ahemtun kechoji aphanlo.”

²⁵Latum thak-lo, “Nangli nelitum apran pajok-lo; nangli nelitum aphan me-o, akehai, lapen nelitum recho aban plangpo.”

²⁶Lasi Ijip adet aphan Joseph isi aron pathik-lo, phanpho pen ephan asok ke recho apharman. Non pu anta laso aron dobomlang. Kurusar atum alongsi recho amar kalichotji.

²⁷Israel aso atum Goshen alongri Ijip along si dolo, hadak latum plang-olo, lapen osomar ongdung-lo.

²⁸Jakob arta ningkan 147 an leletik alangli Ijip adet ningkan 17 dolo.

²⁹Alangliphan kethiji apor nangle si, alangli sopo Joseph aphan alangli hang-lo, lapen pulo, “Nekengtham athak nangri chebat-ra nephan nang Ijip adet nangpippe lo pura semetangnon.

³⁰Nepo atum aphan kepip adimle nekepip-ji aphan nening hang-lo; nephan Ijip angtan nepon-ra halatum aphan kepip adimle nephanta nepipnon.” Joseph thak-lo, “Nang kepu asonthot si ne klempo.”

³¹Jakob pulo, “Nang klempo pura semetangnon.” Joseph seme tang-lo, lapen Jakob hadak ahongplang athak kero pilo.