Read Karbi KECHENG 48 Bible Online

KECHENG 48 - Karbi bible

KECHENG 48

¹Penang an aphi apo so-olo pu Joseph aphan thanlo. Lasi alangli asopo, Manasseh lapen Ephraim aphan cheponsi Jakob along damlo.

²Asopo Joseph ke Jakob aphan kelangjisi kevang-lo pu alangliphan kethan ahut, alangli ajakong chepatir si hongplang athak ingnilun lo.

³Joseph aphan Jakob pulo, “Kanaan adet Luz pu adim along Jakongkethe Arnam nephan nangcheklang-lo, lapen nephan pahirjumelo.

⁴Alangli nephan pulo, ‘Ne nangphan ongdung a-osomar nangpiji, anke nangso-nangsu atum ongdung akhei plangpo; laso alongle kaike aphan nangso-nangsu aphansi kepilo.’ ”

⁵Jakob ningjebomlo, “Ne ladak kevangve aphrang Ijip adet mahang nangkethekpi nangsomar banghini ke nelo; Ephraim lapen Manasseh latum ke nesopo Reuben lapen Simeon atum asonlo.

⁶Jongsi nang osomar dolang pulote, halahei ke nesomar pu ne lakhakhelo, latum kechepahemphuji ke Ephraim lapen Manasseh pensi vangpo.

⁷Nangpei Rachel aphansi ne la keklempilo. Kanaan adet bangpi thisi nening padukpik-lo, ne Mesopotamia pen kechevoi ahut, Ephrath pen helole. Ne bangpi aphan hadaksi Ephrath atovar akung pip-lo.” (Ephrath aphan non kechethan ke Bethlehem pu.)

⁸Joseph asopo atum aphan Jakob thek-longsi, alangli arjulo, “Lahei komat asomarlo?”

⁹Joseph thak-lo, “Latum ke nesomarlo, ladak Ijip adet Arnam nekepi asomarlo.” Jakob pulo, “Latum aphan ne hirjume kepijile latum aphan nedung vannon.”

¹⁰Kesarlo apotsi Jakob amek chechar-cherimlo. Alanglilong Joseph asomar vanlo, lapen latum aphan alangli arbak-lo lapen ingjup-lo.

¹¹Joseph aphan Jakob pulo, “Ne nangphan puthot nangkethek-longji aphan nening chethethepinlo, seta non Arnam nephan nangsomar anta nepathek-long-lo.”

¹²Anke latum aphan Jakob arideng pen Joseph endet-lo, lapen aphu longle papho si alangliphan ardomlo.

¹³Jakob ari arvi anat ke Ephraim aphan lapen ari ar-e anat ke Manasseh aphansi Joseph bilo.

¹⁴Bonta Jakob ari kebat pupu parpanpetsi ari ar-e Ephraim aphuthak, la akebi abang seta, ari arvi ke Manasseh, akleng abang aphuthak bat-lo.

¹⁵Anke alangli Joseph aphan pahirjumelo: “Nephusar Abraham lapen Isaak kangduk a-Arnamle laso a-osomar atum aphan pahirjume nang! Nephan pini anta nekeja a-Arnamle, latum aphan pahirjume nang!

¹⁶Nephan kedo-an akephonangji pen nekepajok apherangkele, latum aphan pahirjume nang! Lahei a-osomar atum pen ajok nepo Abraham, lapen Isaak amen padolongver nang! Latum asomar pa-ongdung nang, aso-asu pado-onang!”

¹⁷Ephraim aphuthak apo ari ar-e kebat apot Joseph aning-oilo, lasi Ephraim pen Manasseh anat apo ari keterekjisi ari ot-lo.

¹⁸Alangli po aphan pulo, “Lason kali, po. Lahelo akleng-lo, la aphu athak-le nangri batnon.”

¹⁹Alangli po kroikredet-lo, pulo, “Ne chini lo, po, ne chinilo. Manasseh aso-asu ta thedung arat plangpo. Bonta la apar ta la amu abang themuchotpo, lapen la aso-asu thedung akhei plangpo.”

²⁰Lasi halaso arni latum aphan alangli pahirjumelo, lapen pulo, “Israel aso atum ahirjume kepi ahut nangtum amen si enpo. Latum pupo, ‘Ephraim lapen Manasseh aphan ason Arnam nangtum aphan paplang-lonang.’ ” Lasonsi Manasseh aphrang Jakob ke Ephraim aphan bat-lo.

²¹Anke Joseph aphan Jakob pulo, “Nang thek-long-lo, ne thi dapprangpo, bonta Arnam nanglong dopo lapen nangphusar atum adet nangpondet-po.

²²Lake nangphan, bonta nang-ik atum aphan kali, nenokjir lapen nethai pen Amor atum arideng pen ne kelong a-Shekem, aho-or kedonei alongle, nangphan si ne nangpidet-lo.”